“Plis Sevem Laef blong Mama,” Liahona, Maj 2024.
Ol Voes blong Ol Lata–dei Sent
Plis Sevem Laef blong Mama
Mi bin fraet tumas taem mama blong mi i nidim wan open hat operesen, be wan fetful tija i bin tijim mi blong prea.
Christi Gerlach mo mama blong hem
Hem we i raet i glad blong givim pikja ia
Taem we mi gat 10 yia, mama blong mi i gat wan bigfala hat atak. Hem i spendem plante wik long hospital we i stap faet from laef blong hem.
Long taem ia, tija blong mi long Praemeri, Sista Ellen Johnson, i kam long hom blong mi wan taem long wik blong luk mi. Mi jes stat blong go long Praemeri mo save blong mi long gospel i smol nomo. Evri wik Sista Johnson i serem testemoni blong hem long mi mo tokbaot prea. Hem i tijim mi se sapos mi prea, Papa long Heven bae i save ansa.
Afta sam wik i pas, helt blong mama i kam moa nogud. Hem i gat wan paep blong hat we i damej we i nidim blong oli fiksim. Dokta blong hem i talem se bae hem i save ded sapos hem i no go tru long operesen blong hat. Ol jenis we i stap hapen long hem oli bin 50/50 nomo.
Long eli 1960, operesen blong open hat i niu mo i gat denja. Ol bigfala dokta oli mekem plan blong katem jes blong hem i go kasem bun long bak blong hem i open mo afta, katem openem rif blong hem blong kasem hat blong hem. Plante sikman oli no bin laef afta we oli go tru long operesen. Mi bin harem nogud mo fraet se mama blong mi bae i save ded.
Plante taem papa i stap long wok o long hospital wetem mama. Bigfala sista blong mi, Pam, i lukaot long mi mo brata blong mi. Long naet mi filim se mi stap miwan mo mi fraet, be mi tingabaot wanem Sista Johnson i bin stap tijim long mi abaot prea. Oltaem mi nildaon long bed blong mi mo krae, mi stap askem wetem tru filing blong hat long Papa long Heven blong sevem laef blong mama blong mi.
Long taem blong wan kaen prea olsem, wan bigfala pis i kam kavremap mi mo mi stop blong krae. Mi filim se evri samting bae i Oraet. Mi filim hop se mama blong mi bae i laef blong luk mi mi gro mo se mi no nid blong wari. Mi no bin harem wan voes o luk wan visen, be mi gat ol filing we oli kwaet mo blong pis. Mi no gat tu tingting abaot olgeta. Papa long Heven i bin ansarem prea blong mi mo mi save.
Pikja i kam long Alex Nabaum
Mama i bin go tru long operesen mo i bin go gud. Hem i bin wik mo i stap sik kolosap ful laef blong hem, be Papa long Heven i bin ansarem prea blong mi mo sevem laef blong hem. Hem i bin laef blong luk mi mi gro, mared mo gat ol pikinini.
Ol yia afta, taem Presiden Russell M. Nelson i kam Aposol, mweama i talem long mi se hem nao i bigfala dokta i bin sevem laef blong hem. Mi raetem wan leta long hem blong talem tangkyu i go long hem. Taem hem i raetem leta i kambak long mi, hem i talem tangkyu from leta blong mi mo glad long help blong God long wok blong hem.