“3 Prinsipol blong Sefti blong Stap Yusum Teknoloji mo Media,” Liahona, Maj 2024.
3 Prinsipol blong Sefti blong Stap Yusum Teknoloji mo Midia
Olsem we teknoloji i stap gohed blong develop, ol toktok ia blong media bae oli helpem yumi blong muv i go fored wetem waes tingting.
Teknoloji i stap gogohed blong jenis oltaem. Mo evri samting we i mekem teknoloji i kam moa gud, i bin tekem ol niu wei blong stap yusum media i kam. Speseli ples blong print nao i jenisim huia i save kasem ol toktok we oli raetem. Ol wei we redio mo televisen oli wok oli jenis long wei we yumi tokbaot nius, ol infomesen mo entetenmen. Intanet i jenisim olsem wanem, hamas samting we i stap insaed we yumi save yusum mo huia i save krietem. Sosol media i jenisim fasin blong yumi blong faenem, toktok wetem mo konek wetem ol pipol. Taem waes i go insaed long ol masin, yumi fesem ol niufala kwestin.
Niu teknoloji i no evri samting long hem i gud o evri samting long hem oli no gud. Be from hemia, oltaem hem i olsem wan glas blong lukluk ol smosmol samting oli klia o bigwan we i mekem blong luk ol niufala janis mo ol wari. Taem yumi traehad moa blong gat ol fasin olsem hemia blong Kraes, ol ansa blong yumi long niufala teknoloji mo long midia i save tekem ol samting nomo we oli impoten i kam long laef blong yumi.
Wan Prinsipol Rul blong Folem
I tru se i no gat lis blong ol rul blong lidim evri desisen we yumi mekem abaot teknoloji mo midia. Be from hemia, yumi save lanem ol prinsipol we oli save helpem yumi blong mekem ol joes. Elda Dieter F. Uchtdorf blong Kworom blong Olgeta Twelef Aposol i bin tijim se: “Ol prinsipol oli no save finis mo oli blong evri samting antap mo daon long wol. Ol stret rul o aplikesen blong ol prinsipol ia, oli wok gud long wan ples mo no wok gud long nara ples. Wanem i yunaetem yumi hem i Jisas Kraes mo ol trutok we Hem i bin tijim, iven sapos wanwan long ol aplikesen i jenis ova long taem mo folem ol kalja.”1
Blong stap folem ol prinsipol we i stap long ol trutok blong gospel bae i helpem yumi blong stap long rod blong kavenan rod. Spirit bae i lidim yumi taem yumi traehad blong mekem ol joes folem ol prinsipol ia. So, ?wanem nao ol prinsipol we oli save help blong lidim ol joes abaot teknoloji mo midia?
1. Mi save yusum tingting blong jusum raet o rong blong mekem ol joes blong kontrolem teknoloji. Hem i no save kontrolem mi.
Samtaem yu save filim olsem se teknoloji i stap tekova long laef blong yu. Hem i impoten blong tingbaot se yu save mekem joes blong kontrolem teknoloji. Hem i no save kontrolem yu. Yu save wantem blong mekem folem tingting blong yu blong stap jusum blong yusum teknoloji mo midia blong mekem ol gudfala samting i hapen mo blong lukaotem ol samting “we i klin, i luk naes, o i gudfala mo i nambawan tru” (Ol Toktok blong Bilif 1:13).
Lod i talem, “Mi, Lod, mi gat wan bigfala wok blong yu mekem” (Doktrin mo Ol Kavenan 112:6). Tingting long olsem wanem yu save yusum teknoloji blong mekem i hapen bigfala wok ia “mas wok wetem strong tingting long wan gud wok,” (Doktrin mo Ol Kavenan 58:27). Bae yu save nidim blong yusum teknoloji long wok blong yu. Bae yu save yusum blong faenem ol gudfala samting blong gat wan gudtaem. Hem i save helpem yu blong konek wetem ol narawan. Mo hem i save helpem yu blong lanem samting, kam antap long eni wei, mo mekem i hapen wok blong Lod. Be, ol narafala samting blong yusum long hem oli save pulum tingting, oli no gud o oli save spolem yu. Yusum waes tingting mo daereksen blong Spirit blong mekem ol joes we i putum yu blong kontrol be i no blong letem teknoloji i kontrolem yu.
2. Taem mi yusum tingting blong mi blong luksave gud mo nogud blong mekem plan fastaem, mi filim i moa gud mo mi mekem ol moa gud joes.
Maet yu gat wan eksperiens long taem we yu bin mekem wan joes long saed blong teknoloji we yu no filim se i raet. Hem i save gat tu midia we yu yusum o taem we yu spendem long wan kaen aktiviti. Hem i helti blong lukluk nomo long hamas yu stap gogohed blong kam antap be i no blong fulumap maen blong yu wetem ol mistek we yu bin mekem. Sapos yu bin mekem plan bifo finis, bae yu save mekem ol moa gud joes bitim we bae yu mekem evri desisen blong yu long taem ia. Yu save putum ol gaedlaen blong yuwan we i go wetem ol standet blong gospel blong helpem yu blong mekem ol gudfala joes.
Sapos yu luk se yu no stap yusum gud o yusum ova media, gat strong paoa long tingting blong traehad blong mekem jenis. Eksampol, sapos i gat ol kaen midia we i no givim insperesen o givim wan gudfala filing, jenisim ol evri dei fasin blong yu. Sapos yu stap yusum tumas midia o fasem yu wetem ol fasin we yu save se i no stret, gat strong paoa long tingting blong mekem jenis—mo gat fasin blong stap wet longtaem wetem yuwan taem yu traehad blong mekem ol jenis ia. Tingting long sam samting we yu save praktis long hem blong mekem jenis. Eksampol, sapos yu luk se i had tumas blong mekem ol gud desisen long ol kaen taem ia long dei, yu save mekem plan blong ol taem we bae yu yusum teknoloji mo ol taem we bae yu no yusum teknoloji.
Hemia i semmak long taem we yu stap yusum teknoloji blong givim paoa long yu, konek wetem ol narawan, mo mekem i hapen wok blong Lod, mo yu filim Spirit, gohed blong mekem ol samting ia. Taem yu stap ones tru wetem yuwan abaot ol joes blong yu, fet blong yu long Lod i save helpem yu blong yusum fridom blong mekem joes long ol wei we bae i lidim yu blong filim moa gud mo gohed blong mekem ol moa gud joes.
3. Mi save yusum tingting blong mi blong luksave gud mo nogud blong stop mo stopem blong smoltaem.
Bae yu save filim se ol kwestin ia abaot teknoloji mo midia oli stap semmak oltaem. ?Hamas hem i tumas? ?Bae mi mas mekem ol taem we mi yusum long midia mo teknoloji i kam antap o godaon? ?Mi mi stap yusum taem blong mi wetem waes tingting? Traem blong no letem ol tingting olsem oli fulumap yu. Tingbaot se hem i Oraet blong stop mo stopem midia blong smoltaem. Wan stop blong smoltaem, i save minim se, blong stap jusum blong mekem ol aktiviti bitim blong stap lukluk long wan skrin blong sam aoa o iven blong no yusum ol kaen teknoloji, olsem sosol midia, blong wan longfala taem.
Teknoloji i stap givim ol bigfala blesing blong helpem yumi blong stap konek nomo wetem ol narawan; be from nomo se yumi save stap konek long eni taem i no minim se yumi nidim blong stap konek long eni taem. Lod i rimaenem yumi blong, “Stap kwaet mo save we Mi Mi God” (Doktrin mo Ol Kavenan 101:16). Mekemsua se yu stap mekem taem blong konek wetem Hem.
Stap Waes
Olsem we teknoloji bae i gohed blong develop, bae yumi evriwan i fesem plante jalenj. Yumi save tanem yumi i go long Papa long Heven, Sevya, ol skripja mo ol toktok blong ol profet tedei blong kasem ol prinsipol blong help lidim ol joes blong yumi bitim blong stap lukaotem ol spesel rul o lis blong Jos. Spirit bae i helpem yumi blong save sapos ol joes we yumi mekem oli stret. Ol toktok blong Jekob oli kam long yumi tedei blong yusum olsem we oli bin mekem long taem we hem i tokbaot fastaem we hem i tijim olgeta: “O stap waes, ?wanem moa nao bae mi save talem?” (Jekob 6:12).