“Mi Save Se Mi Bin Kasem Proteksen,” Liahona, Maj 2024.
Ol Voes blong Ol Lata–dei Sent
Mi Save Se Mi Bin Kasem Proteksen
Wan strong wo i stap tekem ples aotsaed, be taem mi ridim Buk blong Momon, mi bin filim pis mo no bin fraet.
Pikja i kam long Alex Nabaum
Long 1992, wo long Yugoslavia i bin strong tumas. Evri dei oli bin bomem taon blong mifala long Mostar. Evri pablik seves oli bin klos we i tekem tu seves blong sendem leta.
Be, long 1 Epril, i gat wan noknok long doa blong mi. Taem mi openem, wan man we mi neva bin luk i givim wan pasel we i kam long gel blong mi, we afta bae hem i stap long Malaga, Spain, long ples ia, hem i joenem Jos Ia blong Jisas Kraes blong Ol Lata-dei Sent. Insaed, i gat wan kopi blong Buk blong Momon.
Mi stat blong ridim long semmak dei ia. Wan wo i stap tekem ples aotsaed, be taem mi ridim, mi filim pis mo no bin fraet. Afta, mi bin lanem se pis we mi bin filim hem i Tabu Spirit. Mi Save Se Mi Bin Kasem Proteksen mo bae mi no ded.
Taem mi ridim, mi lan abaot Jisas Kraes mo se Hem i stap laef yet. Mi bin lanem abaot baptaes mo Jos blong Sevya. Mi bin filim se evri samting we mi bin ridim oli tru. Wanwan taem, gel blong mi bae i save ansa long ol kwestin blong mi.
Taem hasban blong mi i bin ded long 2019, mi jusum blong go long Yunaeted Stet, long ples ia nao we gel blong mi i stap long hem naoia. Mi bin wantem luk hem mo lanem moa abaot Jos Ia we i bin kambak.
Mi bin stap long Sol Lek Siti Yuta, blong fo mo haf manis. Mi go long jos evri wik wetem gel blong mi. Mi bin gat wan filing we mi no save tokbaot nomo. Mi tekem ol lesen blong ol misinari. Mi bin save we evri samting ia oli tru. Mi bin kasem eksperiens blong naesfala dei ia we i bitim ol narafala dei blong laef blong mi taem we mi kam insaed long wota blong baptaes mo mi bin kasem konfemesen olsem wan memba blong Jos Ia blong Jisas Kraes blong Ol Lata-dei Sent long 27 Julae 2019.
Taem mi wokbaot i kam insaed long rum blong kasem konfemesen afta long baptaes blong mi, evri wan oli stap krae. Blong kasem baptaes mo kasem presen ia we i Tabu Spirit i wan bigfala presen we i kam long Papa long Heven. Afta long konfemesen blong mi, mi bin filim se heven i open mo we yumi evri wan i bin stap long ples ia tugeta. Afta we mi bin kasem petriakel blesing blong mi, mi kasem plante spesel promes we oli no save finis.
Buk blong Momon i tru. Taem yumi stap ridim mo prea abaot buk ia, yumi save kasem testemoni blong yumiwan abaot buk ia. wetem testemoni ia, bae yumi save se Josef Smit i bin wan profet mo we tru long hem, tru Jos Ia blong Jisas Kraes i bin kambak long wol.