“Kea mo Sore Afta 25 Yia I Pas,” Liahona, Maj 2024.
Ol Voes blong Ol Lata–dei Sent
Kea mo Sore Afta 25 Yia I Pas
Mi glad se God i yusum wan leta we oli bin fogetem finis blong mekem kea mo sore blong Hem i hapen.
Hem we i raet i glad blong givim pikja ia
Long taem we mi stap tijim eli moning seminari long Eureka, California, USA, mi askem ol studen blong mi blong traem tingting long olgetawan se afta 10 yia bae i olsem wanem. Afta mi askem olgeta blong raetem wan leta wetem testemoni blong olgeta abaot gospel mo wanem bakegen we oli wantem serem wetem olgetawan taem we oli olfala. Mi talem long olgeta se bae mi sendem ol leta ia i kambak long olgeta afta long 10 yia.
Taem i pas mo mi neva bin go raon blong putum ol leta blong olgeta. Wan dei, afta we 25 yia i pas, pikinini gel blong mi Heidi i faenem ol leta ia mo askem mi abaot olgeta. Afta we mi bin eksplenem wanem we mi bin mekem plan from, hem i yusum ol tul blong sosol midia blong lukaotem ol adres blong ol foma studen blong mi.
Pikja i kam long Alex Nabaum
Afta we hem i sendem ol leta, mitufala i kasem sam gudfala ansa we i kambak. Wan long ol foma seminari studen blong mi i raetem se:
“Mi nidim dadi blong yu blong save se naoia we hem i jes faenem ol leta ia i from wan risen. Pikinini gel blong mi we i gat 18 yia, hem i stap traehad wetem testemoni blong hem mo stap filim se ‘blong stap olsem wan Lata-dei Sent we i stret evri wan’ i no blong hem. Hem i no stap serem ol filing blong hem wetem mifala. Hem i bin had.”
Foma studen blong mi i bin harem nogud bigwan from sam samting we gel blong hem i bin raetem mo putum i no longtaem long wan blog long intanet, hem i ademap:
“Mi bin save se mi mas toktok long hem abaot samting ia. Olsem oltaem, taem mitufala i gat ol storian olsem, fes blong hem bae i soem se hem i intres mo kros, mo hem i no talem eni samting. Mi givim leta blong mi long hem mo talem long hem blong ridim.
“Mi luk hem i ripitim fas paragraf plante taem. Mi bin raetem se mi no save sapos mi bin gat wan testemoni, from se, blong stap wan Lata-dei Sent i nidim tumas samting mo ating i no blong mi.
“Gel blong mi i stat blong krae. Mi nidim hem blong save se i tru mi andastanem ol traehad blong hem. !Bae hem neva bilivim sapos i no bin leta ia! Sam long ol samting we i stap blokem hem oli bin folfoldaon mo i tru, mi filim se taem we leta ia i kam, i stret taem blong soem kea mo sore. !Sapos mi bin kasem 10 yia i pas, bae mi save sakem finis o lusum! !Plis talem tangkyu long papa blong yu we i bin mekem mifala i raetem ol leta mo blong putum long ples we hem i no save faenem blong ol yia ia we i pas! I no gat wan samting i mistek.”
Papa blong yumi long Heven i stap wajem evri sipsip blong Hem, mo long bigfala taem blong Hem, Hem i save soem kea mo sore blong Hem mo ol merikel tru long wanwan long yumi blong tekem olgeta we oli bin go aot long yad blong Hem.