“Mi Nomo Save Kontrolem Miwan Taem Mi Wajem TV Seris blong Sop Opra: Olsem Wanem Mi Letem God I Win” Liahona, Maj 2024.
Mi Nomo Save Kontrolem Miwan Taem Mi Wajem TV Seris blong Sop Opra: Olsem Wanem Mi Letem God I Win:
Taem mi stop blong wajem seris blong sop opera, mi bin filim paoa blong Tabu Spirit i kam bigwan long laef blong mi long ol bigfala wei.
Ol pikja i kam long Benedetta Vialli / Salzman International
Blong stap jusum Jisas Kraes i givim bigfala paoa, “mo, O yes, bae yumi nidim paoa blong Hem long ol dei we oli stap kam.”1 Wol blong yumi i gat tumas noes. Enemi i stap wantem blong gat bigfala paoa ova long plante long ol pikinini blong God. Ol samting we oli no tabu oli kam wanem we i tekem i spesel, mo ol temtesen i pulum tingting blong yumi mo tekem yumi i go longwe long ol samting we bae oli tekem yumi kam kolosap long Lod.
Blong winim hemia, yumi mas stap aktiv blong jusum Jisas Kraes long laef blong yumi mo lego ol samting we i save mekem Spirit i harem nogud. Moronae i givim kaonsel long yumi, “Stap waes long ol dei blong tes blong yufala; tekemaot long yufalawan, evri kaen doti;” (Momon 9:28) mo i invaetem yumi, “Kweam long Kraes, mo kam stret evriwan tru long hem, mo tanem baksaed blong yufala long evri fasin i no olsem blong god; … mo lavem God wetem ful paoa blong tingting, ful maen mo ful paoa blong yufala” (Moronae 10:32).
?Olsem wanem yumi save lego ol samting blong wol mo wetem tru tingting blong wantem kam long Kraes? Wanwan long yumi i stap long ol defdefren level long rod ia. Yumi evri wan i save lego wan samting we i stap holemtaet yumi blong yumi no stap filim paoa blong Tabu Spirit fulwan. Yumi nidim paoa blong Atonmen blong Sevya blong mekem hemia, mo i stat taem yumi stap yusum fridom blong mekem joes blong yumi blong jusum Hem.
Filing ia blong Wantem Stap Pat
Taem mi stap olsem wan senia long hae skul, mi bin stap long popula tim blong ol gel we oli stap singaot wetem glad blong sapot from ol skul tim blong wan spot. Evri dei long praktis, ol gel long tim blong mi blong stap singaot from glad ia, oli tokbaot wanem we i stap hapen long wan sop opera long deitaem long televisen. Mi neva bin wajem mo mi save se hem i wan so we i gat ol nogud fasin. Be, mi filim se mi no pat blong evri dei praktis taem we ol gel oli stap glad blong tokbaot seris ia. Spirit i talem kwaet long mi blong no wajem, be mi wantem tumas blong stap pat tu long ol storian blong olgeta, so mi stat blong wajem.
Hem i no wan samting we mi tekem long miwan se i nogud. Mi wokemaot long maen blong mi se bae hem i no save afektem mi. Mi save se bae mi no save mekem ol nogud samting we mi luk ol man we oli tekpat long ol seris ia oli stap mekem. Mi fas strong mo wajem seris ia evri dei. Taem mi go long Brigham Yang Yunivesiti, mi stretem taemtebol blong klas blong mekem se mi save wajem evri dei. Mi neva mestem wan pat.
Mi mared mo gat fasbon bebi blong mi. Mi mekem hem i slip evri dei long taem blong seris ia mekem se mi save wajem.
Taem ol yia i pas, Spirit i talem kwaet long mi plante taem se mi mas stop blong wajem seris ia. Be mi no akseptem. Mi kam blong save gud tumas olgeta we oli tekpat long seris ia wetem fasin blong olgeta mo save laef blong olgeta. Hem i wei blong mi blong save rilaks, mekem se mi gohed blong stap wajem. Mi akseptem se hem i no stap mekem mi harem nogud.
Invitesen Ia
Naentin yia afta long hae skul, mi stap gohed yet blong wajem seris ia evri dei. Long taem blong jeneral konfrens, Sista Sheri L. Dew, afta bae hem i Seken Kaonsela long Jeneral Presidensi blong Rilif Sosaeti, i stap tokbaot fasin blong wokbaot i go longwe aot long wol mo ol samting we oli no tabu. Afta hem i talem se, “Mi invaetem yumi wanwan blong poenemaot wan samting nomo we yumi save mekem blong kamaot long wol mo kam kolosap long Kraes.”2
Taem hem i givimaot invitesen ia, mi filim Spirit i fulumap mi we i bigwan tumas, mo mi harem ol toktok ia long maen blong mi “!Yu mas stop blong stap wajem seris ia naoia!” Toktok ia gat bigfala paoa tumas; hem i olsem wan slap long fes blong mi. Mi save stret long taem ia se mi nomo save stap ting nating long ol kwaet toktok blong Spirit bakegen. Mi filim strong long hat blong mi blong neva wajem seris ia bakegen. Mi luksave se i no gat wan long olgeta we i tekpat long seris ia we i stap mekem eni samting we i klin o givim repek. Mi stap invaetem toti i kam insaed long laef blong mi evri dei. Mi komitim mi long Lod, stret long taem ia mo long ples ia, se bae mi neva wajem bakegen.
!I no bin isi! Naentin yia blong evri dei fasin ia mo filing blong wantem tumas blong waj i had blong brekem. Mandei i kam, mo hem i taem blong seris i stat. Mi wokbaot from kontrola blong TV. Mi wantem tumas blong onem. Mi tingbaot komitmen blong mi long Lod se bae mi neva wajem bakegen. Mi wokbaot i go longwe.
Afta, mi tingting long fevret akta blong mi mo stap tingting se wanem bae i save hapen long hem mo wokbaot bakegen i go long kontrola. Mi bin save se mi nidim help blong God, mekem se mi godaon long ni blong mi mo prea blong kasem paoa blong save stop blong wajem. Mi tingbaot promes blong mi long Papa long Heven, mo mi wokbaot i go aot long rum. Mi jusum blong folem ol kwaet toktok blong Spirit we mi bin kasem tru long Tabu Spirit mo blong respektem komitmen blong mi.
Aksen ia i gohed blong ripit olsem blong evri dei long wik ia kasem nekis wik bakegen. Evri dei mi nildaon mo prea mo krae from paoa blong no wajem seris, mo evri dei mi jusum Jisas Kraes mo wokbaot i go longwe long wan televisen seris we i no klin. Mi kasem paoa blong winim we i kam tru long paoa blong Sevya we i givim tru long Atonmen blong Hem.
Afta samtaem i pas blong stap mekem hemia, wan merikel i hapen. Mi lusum fulwan filing ia blong wantem stap wajem seris ia, afta we mi bin stap wajem evri dei blong 19 yia. !I bin naes tumas! Mo tu, mi lusum intres blong wajem evri series blong askem kwestin we mi bin stap wajem, so mi stopem fulwan.
Tingting blong mi i kam klia gud, mo mi luksave se i nogud we hem i bin olsem. Mi ones blong wantem blong no tajem ol samting we i nogud (luk long 1 Tesalonaeka 5:22). Mi nomo stap sek mo wantem blong mekem bakegen.
Blesing Ia we I Naes Tumas
Be nambawan samting we i bin long laef blong mi i bin paoa blong Tabu Spirit we i kam bigwan long laef blong mi bitim eni samting we mi eksperiensem bifo. !Progres blong mi long saed blong spirit i spid i kam antap bigwan! Evri yia ia mi bin ting se mi stap glad long kampani blong Tabu Spirit, be mi bin stap gat eksperiens nomo long wan smol pat blong spirit we mi gat. Mi luksave se taem mi stap wajem ol seris ia long evri taem ia i bin afektem mi. Mi bin mestem plante yia tumas blong stap gat wan strong rilesensip wetem God. Taem mi yusum fridom blong mi blong mekem joes blong lego ol samting we oli no klin, ol samting blong wol, Spirit i fri blong kam long mi tru long ol bigfala samting, i bin wan bigfala jenis we mi no save bilivim we i bin hapen long laef blong mi blong mekem mi kam strong, kasem kamfot mo lidim mi.
Yumi kam blong holemtaet strong tumas long ol samting we oli no gat valiu—i tru, ol samting we oli klosem doa long ol blesing we God i wantem blong tekem i kam long laef blong yumi. ?From wanem yumi givimaot paoa blong Spirit blong karem hemia we i givim gudtaem o kam popula? Ating blong stap wajem wan televisen seris i no wan bigfala samting blong tokbaot o wan bigfala sin, be hemia i stopem mi blong no stap gat Tabu Spirit i kam fulwan long laef blong mi mo i mekem progres blong mi long saed blong spirit i slo.
Mi talem tangkyu tumas long Lod from Hem i no bin givap long mi be Hem i gat fasin blong save wet longtaem blong stap askem mi blong lego wan samting we i no tabu mekem se Hem i save fulumap laef blong mi wetem paoa blong Hem we i kapkapsaed.
Hem we i raet i stap long Yuta, YSA.