“Naminaw ba Kamo sa Komperensiya gamit ang Inyong mga Dalunggan—o ang Inyong Kasingkasing?,” Liahona, Okt. 2023.
Mga Young Adult
Naminaw ba Kamo sa Komperensiya gamit ang Inyong mga Dalunggan—o ang Inyong Kasingkasing?
Ang personal nga pagpadayag mahitungod gayod sa pagpaminaw sa Espiritu gamit ang inyong kasingkasing.
Alang kanako, ang mga pakigpulong sa kinatibuk-ang komperensiya nagtabang kanako nga mabati ang Balaang Espiritu. Ang pagpaminaw sa komperensiya mohatag kanato og kahigayonan nga mobati sa gugma sa Dios ug makakuha og espirituhanon nga inspirasyon.
Ug tungod kay ang mga mamumulong nagpamatuod sa kamatuoran, ang Espiritu gidapit ngadto sa mga kasingkasing ug mga hunahuna sa tanan nga nanambong (tan-awa sa Alma 31:5), nagtugot kanato nga mas makasabot og gamay sa Dios ug sa Iyang mga katuyoan (tan-awa sa Doktrina ug mga Pakigsaad 76:5–10).
Apan usahay adunay mga makabalda o ubang mga hagit nga makahimong lisod sa pagdawat og espirituhanon nga mga impresyon atol sa komperensiya. Tingali gibati ninyo nga nasagmuyo nga ang inyong pagtuo wala nalig-on o nga ang inyong mga pangutana wala matubag.
Nan unsa man ang inyong buhaton?
Makasugod kita pinaagi sa pagkonsiderar kon aduna bay bisan unsang butang nga naghimong lisod alang kanato nga matutokan. Mahimo natong segurohon nga wala lang kita naminaw gamit ang atong mga dalunggan apan nga kita namalandong sa mga pag-aghat ug mga pagbati nga moabot sa atong mga hunahuna ug sa atong mga kasingkasing. Aron maminaw gamit ang atong mga kasingkasing, mahimo kitang mag-ampo alang sa tabang nga makasabot kon sa unsang paagi ang mga mensahe mahimong personal nga magamit kanato (tan-awa sa Doktrina ug mga Pakigsaad 8).
Ang pagsabot sa personal nga pagpadayag ug sa unsang paagi kini may kalabotan sa mga mensahe gikan sa mga sulugoon sa Dios makatabang kanato nga mahibalo kon unsay gipasabot nga maminaw gamit ang atong mga hunahuna ug mga kasingkasing.
Plano sa Dios, Inyong Kalipay
Ang personal nga komunikasyon tali kaninyo ug sa Langitnong Amahan mao ang unsay gitawag nato nga personal nga pagpadayag. Ug kini personal. Sama sa gipahayag ni Elder Dale G. Renlund sa Korum sa Napulog Duha ka Apostoles: “Ang personal nga pagpadayag husto nga ilaha sa mga indibidwal. Kamo makadawat og pagpadayag, sama pananglit, mahitungod kon asa mopuyo, unsa nga dalan sa panarbaho ang sundon, o kinsa ang minyoan. Ang mga lider sa Simbahan mahimong motudlo og doktrina ug mopakigbahin og dinasig nga tambag, apan ang responsibilidad alang niini nga mga desisyon anaa kaninyo. Kana mao ang inyong pagpadayag nga madawat.”1
Ang Dios direktang makapamulong sa inyong hunahuna ug kasingkasing mahitungod sa personal nga mga butang, apan kamo kinahanglang andam nga maminaw Kaniya (tan-awa sa Santiago 1:5). Kamo adunay kabubut-on gihapon. Apan ang Iyang plano sa kalipay makapalipay lamang kaninyo kon kamo mopili nga mas magpaduol Kaniya.
Si Presidente Russell M. Nelson bag-ohay lang nangutana kanato, “Andam ba kamo nga tugotan ang Dios nga maoy mahimong labing importante nga impluwensiya sa inyong kinabuhi? Tugotan ba ninyo ang Iyang mga pulong, Iyang mga sugo, ug Iyang mga pakigsaad nga moimpluwensiya sa unsay inyong buhaton matag adlaw? Tugotan ba ninyo ang Iyang tingog nga maoy prayoridad kay sa bisan unsa pang uban?”2
Ang inyong kaandam sa pagpaminaw sa tingog sa Dios kasagaran maoy motino kon unsa kadaghan gayod ang inyong mapaminaw Kaniya. Bisan og gusto lamang kamo nga mahimong andam karon, “tugoti kini nga tinguha nga molihok diha kaninyo” (Alma 32:27) aron sa pag-usab sa inyong kasingkasing.
Ang mga Propeta Namulong sa Kamatuoran
Ang pipila ka tawo naghunahuna nga sila “personal” nga makapili kon unsa nga mga sugo ug mga pagtulon-an ang ilang sundon. Sayop silang nangangkon nga ang mga pagtulon-an sa mga propeta ug apostoles dili magamit sa tanan—nga kita makadesisyon alang sa atong kaugalingon kon unsa ang magamit kanato ug “nga ang kamatuoran managlahi––nga ang matag tawo kinahanglan nga motino alang sa iyang kaugalingon kon unsa ang tinuod.” Sama sa gipasidaan ni Presidente Nelson, “Ang samang pagtuo hunahuna lamang niadtong kinsa naghunahuna nga sila usab dili manubag ngadto sa Dios.”3
Ang Dios nagtawag og mga propeta ug apostoles aron mobarog isip mga saksi ni Jesukristo, aron mamulong sa kamatuoran, ug modumala sa mga kalihokan sa Iyang gingharian dinhi sa yuta. Ug sila midawat sa mga responsibilidad niadto nga mga calling. (Tan-awa sa Doktrina ug mga Pakigsaad 107:23.)
Ang kamatuoran mao ang pinulongan sa Espiritu, mao nga kon makadungog kita og mahangtoron nga mga kamatuoran nga maisogon ug yano nga gipamatuod, ang Espiritu Santo moabot aron sa pagdani kanato sa kahingpit ug katahom niadto nga mga kamatuoran. Ang Espiritu makatabang usab kanato nga makasabot kon sa unsang paagi ang kamatuoran sa mga pulong sa atong mga lider magamit kanato sa indibidwal nga paagi.
Si Elder Renlund miingon, “Ako modapit kaninyo nga magbaton og pagsalig sa pag-angkon og personal nga pagpadayag alang sa inyong kaugalingon, sa pagsabot kon unsa ang gipadayag sa Dios, pinasubay sa mga kasulatan ug sa mga sugo nga Iyang gihatag pinaagi sa Iyang gitudlo nga mga propeta ug alang sa inyong kaugalingong kabubut-on ug sa inyong mga responsibilidad.”4
Ang Ilang Labing Dako nga Tinguha
Usahay mahimong mobati kamo nga dili segurado mahitungod sa unsay gitudlo sa propeta ug apostoles. O mahimong nanglimbasog kamo sa pagsabot kon sa unsang paagi ang ilang mga pulong magamit kaninyo. Niini nga mga higayon, hinumdomi nga ang ilang calling mao ang pagtabang sa paggiya kaninyo, usa ka bililhon nga anak sa atong Langitnong Amahan, balik ngadto Kaniya.
Si Elder Neil L. Andersen sa Korum sa Napulog Duha ka Apostoles mipamatuod: “Kinahanglan nga dili kita maalarma kon ang mga pulong sa mga sulugoon sa Ginoo supak sa panghunahuna sa kalibotan, ug, usahay, supak sa atong kaugalingong hunahuna. … Ang ilang labing dakong tinguha mao ang pagpahimuot sa Ginoo ug sa pagtabang sa mga anak sa Dios nga makabalik ngadto sa Iyang presensya.”5
Ang pagtutok sa mahigugmaon nga tinguha sa mga propeta ug apostoles mousab kon sa unsang paagi ninyo dawaton ang ilang mga pulong. Ang pagkaamgo sa ilang gugma ug debosyon sa Langitnong Amahan, sa Manluluwas, ug sa inyong kaluwasan motabang kaninyo nga mahimong mas andam nga tugotan ang ilang mga pulong nga makaabot sa inyong kasingkasing.
Ang pagkahimong usa ka disipulo ni Jesukristo sa ulahing mga adlaw mahimong malisod. Mahimong malisod nga maminaw og tambag gikan sa pulpito nga dili nato kanunayng gusto o gibati nga andam nga maminaw, ilabi na kon ang mga tingog sa kalibotan kanunayng nagpasabot sa tambag sa mga propeta isip lain lamang nga lista sa mga lagda o mga restriksiyon.
Apan sa pagkatinuod, ang Ginoo naghatag kanato og mga propeta ug apostoles aron sa paggiya kanato nga magpakabuhi sa labing maayo ug labing malipayon nga kinabuhi kutob sa mahimo. Dili sila mopugos kanato sa pagsunod sa ilang tambag. Hinuon, mohatag sila og mga pagdapit, motabang kanato nga makasabot kon ngano nga ang Ginoo adunay taas nga mga sumbanan alang sa Iyang mga disipulo, ug motabang kanato nga mapalawman ang atong hugot nga pagtuo sa Dios.
Si Elder Dieter F. Uchtdorf sa Korum sa Napulog Duha ka Apostoles bag-ohay lang nga mitudlo: “Sayop ba nga adunay mga lagda? Sa tinuod dili. Kita nagkinahanglan niini matag adlaw. Apan sayop nga motutok lamang sa mga lagda imbis nga motutok sa Manluluwas. Kamo kinahanglan nga makahibalo sa mga ngano ug sa mga giunsa ug dayon mohunahuna sa mga sangpotanan sa inyong mga pagpili. …
“Importante nga ang temporal ug espiritwal nga mga pagpili kinahanglan nga dili lamang ibase sa personal nga kagustohan o unsay sayon o inila. Ang Ginoo wala mag-ingon, ‘Buhata bisan unsay inyong gusto.’
“Siya nag-ingon, ‘Ipatigbabaw ang Dios labaw sa tanan.’”6
Si Jesukristo mao ang atong kalig-on, ug ang Iyang mga propeta ug apostoles mogiya kanato balik ngadto Kaniya. Motabang sila kanato sa pagtinguha Kaniya gamit ang atong labing maayo nga mga abilidad aron kita makakuha sa tanang panalangin nga gitagana sa Dios alang kanato.
Subay sa Dalan sa Pakigsaad uban ang Pagkamasaligon
Uban sa hugot nga pagtuo diha kang Jesukristo ug sa usa ka andam nga kasingkasing, kamo makahibalo sa kamatuoran sa tanang butang (tan-awa sa Moroni 10:4–5). Samtang maminaw kamo sa mga propeta ug apostoles, makasabot kamo sa mga paghunghong sa Espiritu pinaagi sa personal nga pagpadayag.
Kamo adunay mga lider kinsa gipili sa Dios ug sarang sa pagtabang kaninyo. Sila makagiya kaninyo balik ngadto sa dalan sa pakigsaad kon gikinahanglan. Sila makatabang kaninyo nga magpabilin kon lisod ang pagpabilin karon mismo. Ug dili igsapayan ang inyong kaagi, sila makatabang kaninyo nga modangop ngadto kang Jesukristo ug mosubay sa dalan sa pakigsaad uban ang pagkamasaligon.
Si Elder Andersen mipamatuod: “Adunay kaban sa bahandi sa langitnong direksiyon nga naghulat sa inyong pagdiskobre sa mga mensahe sa kinatibuk-ang komperensiya. Ang pagsulay sa matag usa kanato mao kon sa unsang paagi nga kita motubag sa unsay atong nadungog, unsay atong nabasa, ug unsay atong nabati.”7
Kon maminaw kamo pag-ayo sa mga mensahe sa Dios ug mamahimong andam sa pagdawat og inspirasyon bahin niini, kamo makapalambo sa inyong pagpamatuod. Masayod kamo sa katinuod sa ebanghelyo ug motuo sa awtoridad sa propeta ug apostoles sa Ginoo. Tinud-anay kamong makakaplag ug makapuyo sa labing maayo nga kinabuhi—ang kinabuhi nga gusto sa Langitnong Amahan nga inyong ipakabuhi tungod kay Siya nahigugma kaninyo.