Ang mga Pagsulay ni Apostol Pablo

Unsa ang nakatabang ni Pablo nga makalahutay sa kalisdanan?

Si Pablo nga gikadinahan

Except for These Chains [Gawas lang Niining mga Kadina], © Pacific Press, licensed from GoodSalt.com

Unsa nga mga Pagsulay ang Gilahutay ni Pablo?

Si Pablo misulat, “Makatulo ako latigoha, makausa batoha, makatulo ako makasinatig pagkalunod ug makausa gianod-anod sa tubig sulod sa 24 ka oras” (2 Mga Taga-Corinto 11:25). Apan bisan pa man niining tanan, siya miingon “Magpasigarbo ako sa mga butang nga nagpakita sa akong kaluyahon” (bersikulo 30).

Si Pablo gitagad “sama sa usa ka kriminal” (2 Timoteo 2:9) ug gibilanggo kapin sa lima ka tuig tungod sa pagsangyaw sa ebanghelyo. Apan kini wala makapahunong kaniya gikan sa pagsulat og makapadasig nga mga sulat ngadto sa mga higala ug mga lider sa Simbahan. Siya gihagit sa usa ka “tunok sa unod nga gigamit ni Satanas sa paghasol [kanako]” (2 Mga Taga-Corinto 12:7). Ang Dios wala motangtang niini nga pagsulay apan mitabang ni Pablo sa pagkaplag og kalig-on diha sa iyang kahuyang (tan-awa sa mga bersikulo 8–10).

Si Pablo nagdiktar og usa ka sulat

Paul Dictating Letter [Pablo Nagdiktar og Sulat], ni Arthur Twidle, © Providence Collection, licensed from GoodSalt.com

Unsa ang Nakapadasig ni Pablo?

Bisan pa man sa mga pagdagmal ug sa dili makiangayon nga pagbilanggo, si Pablo misulat, “Nakat-onan ko ang pagkatagbaw sa bisan unsay ania kanako” (Mga Taga-Filipos 4:11). Siya milahutay tungod sa iyang tinuoray nga paglaom ug pagsalig diha ni Jesukristo.

Si Pablo misulat nga “ang tanan nga nagtinguha sa pagkinabuhi nga diosnon diha kang Kristo Jesus lutoson gayod” (2 Timoteo 3:12). Apan siya usab miangkon nga ang atong mga pagsulay “naghatag kanatog labihan kadako ug walay kataposang himaya” (2 Mga Taga-Corinto 4:17). Si Pablo nagtinguha og “usa ka purongpurong sa pagkamatarong” (2 Timoteo 4:8) ug “sa ganti sa pagkatinawag sa Dios” (Mga Taga-Filipos 3:14).

Sa Unsa nga Paagi nga Kita Makalahutay sama ni Pablo?

Samtang ang atong mga pagsulay mahimong wala maglakip og pagkalunod sa barko, pagpangdagmal, ug pagkabilanggo, kita makasunod sa paglahutay ni Pablo pinaagi sa pagdangop ngadto ni Kristo. Si Elder Neil L. Andersen sa Korum sa Napulog Duha ka Apostoles miingon, “Si Apostol Pablo mitambag nato nga makagamot, magmalig-on, ug dili matarog diha sa atong gugma alang sa Manluluwas ug sa atong determinasyon sa pagsunod Kaniya.”¹

Kalabot sa iyang apostolikanhon nga tawag, si Pablo misulat, “wala ko kini ikaulaw, kay nakaila ako sa akong gisaligan” (2 Timoteo 1:12). Bisan unsa pa ang atong mga pagsulay, makahinumdom kita kon kang kinsa kita motuo samtang kita “mas hingpit natong amumahan, depensahan, ug palig-onon ang mga gamot sa atong hugot nga pagtuo diha ni Jesukristo.”²

“Sunda ang mga pagbudlay niini nga Apostol gikan sa panahon sa iyang pagkakabig ngadto sa panahon sa iyang kamatayon, ug makabaton kamo ug angayan nga panig-ingnan sa kakugi ug pailob sa pagsangyaw sa Ebanghelyo ni Kristo. Gibiaybiay, gibunalan, ug gibato, sa higayon nga nakalingkawas siya sa mga kamot sa iyang mga tiggukod siya sa ingon ka matinguhaon mipahayag sa doktrina sa Manluluwas.”

Mga Pagtulun-an sa mga Presidente sa Simbahan: Joseph Smith (2007), 196.

Mubo nga mga sulat

1. Neil L. Andersen, “Magpaduol ngadto sa Manluluwas,” Liahona, Nob. 2022, 73.

2. Neil L. Andersen, “Magpaduol,” 73.