“Pagpangalagad nga adunay Kakugi,” Liahona, Okt. 2023.
Mga Baroganan sa Pagpangalagad
Pagpangalagad nga adunay Kakugi
Kita makahimo og dakong kalainan pinaagi sa pagpangalagad uban ang kakugi.
Si Tiquico dili ang pamilyar kaayo nga ngalan sa Bag-ong Tugon, apan siya usa ka ehemplo sa pagpangalagad ug pagserbisyo nga adunay kakugi. Bisan og ang iyang pagserbisyo sa pipila ka higayon nahitabo nga walay nakabantay, ang iyang pagkamatinud-anon mihimong posible alang ni Pablo sa pagbuhat sa iyang importante nga trabaho. Si Tiquico mihatod og mga sulat ngadto sa mga Santos sa taga-Efeso ug taga-Colosas ug mihupay ug midasig kanila (tan-awa sa Mga Taga-Efeso 6:21–22; Mga Taga-Colosas 4:7–8). Mibiyahe siya ngadto sa lainlaing dapit, sama sa Creta ug Efeso, aron sa pagtabang sa buhat, nga mihimong libre sa mga lider sama ni Tito ug Timoteo sa pag-abag ni Pablo (tan-awa sa 2 Timoteo 4:12). Gitawag ni Pablo si Tiquico nga usa ka “minahal nga igsoon ug buotang sulugoon sa buluhaton sa Ginoo” (Mga Taga-Efeso 6:21).
Ang kakugi naglakip og pagpadayon, ilabi na sa higayon nga nagsinati og oposisyon. Ang atong kakugi nagtabang sa Ginoo nga masayod nga Siya makasalig kanato tungod kay kita dili moundang, bisan kon magkalisod ang mga butang. Ingon og tungod sa kakugi ni Tiquico, si Pablo misalig kaniya sa pipila ka importante nga buluhaton. Ang Ginoo sa samang paagi mihatag kanato og pipila ka importante nga mga buluhaton. Mopadayon ba kita sa atong mga paningkamot sa pagpanalangin niadtong Iyang gihangyo kanato nga pangalagaran?
Pagpalambo og Kasingkasing sa Kakugi
Mahimong adunay daghang rason nga makasinati kita og oposisyon kon kita maningkamot sa pagpangalagad ngadto sa uban. Apan ang Ginoo misalig kanato nga mopadayon sa atong mga paningkamot nga mobuhat sa atong labing maayo, bisan kon kini dili sayon.
Aniay pipila ka hunahuna kon unsaon nato nga makapalambo og Kristohanon nga hiyas sa kakugi:
-
“Kon akong mabantayan ang akong kaugalingon [nga] napalayo gikan sa akong mga katungdanan sa [pagkapari] tungod sa laing mga butang nga gustong buhaton ug kon ang akong lawas nagtinguha sa pagpahulay, akong dasigon ang akong kaugalingon niini nga mga pulong: ‘Hinumdomi Siya.’ Ang Ginoo mao ang atong hingpit nga ehemplo sa kakugi.”1
-
Hinumdomi nga ang Ginoo mitawag og mga lider sa pagtabang sa paghimo sa Iyang buhat. Ang pagpangalagad nga adunay kakugi wala magpasabot nga mag-inusara kang mohimo sa buhat. Pagtinguha og suporta gikan sa Ginoo ug sa inyong lokal nga mga lider.
-
Pag-ampo alang sa inspirasyon kon unsaon nga makapalambo kamo og dugang nga kakugi. Ang Langitnong Amahan nakasabot nga ang mga hagit sa kinabuhi nagpasabot nga ang pagserbisyo dili kanunayng sayon, ug Siya nagbarog nga andam nga motabang ug modasig kanato.
-
Hinumdomi nga ang Ginoo ganahan og paningkamot ug nga ang pagkat-on nga mahimong mas makugihon dili mahimo dihadiha dayon. Uban sa pagbansay ug pailob, ang inyong kakugi molambo.
Pagpangalagad nga adunay Kakugi
-
Ang pagkahimong kugihan wala magpasabot nga magpadayon sa paagi nga mohimo sa mga tawo nga dili komportable. Tahora ang gusto sa mga tawo nga inyong gialagaran. Hinumdomi nga bisan kon ang pipila ka tawo ganahan nga pugson sa mga pakig-inter-aksiyon, halos tanan gusto og mas tinuod nga mga higala sa ilang mga kinabuhi.
-
Ang kakugi naglakip sa pagpakita og inisyatibo sa inyong pagpangalagad imbes nga kinahanglan sultihan kon unsa ang buhaton sa tanang panahon.
-
Ang kakugi naglakip og gagmay, sinsero nga mga buhat. Ang pagkahimong kugihan sa pagpangalagad wala magkinahanglan og dinagko nga buhat.
-
Usa sa labing maayo nga mga paagi sa pagpangalagad mao ang pag-ila-ila niadtong inyong gialagaran ug mamalandong kon unsaon ninyo sa pagtubag sa ilang mga panginahanglan. Pangutana, unsa kaha ang akong gusto nga tabang kon ako ang anaa sa susamang lugar? Ang paggamit niini nga proseso motabang kaninyo nga makasabot niadtong inyong pangalagaran ug mohimo sa inyong serbisyo nga mas mahunahunaon ug personal.