“Mga Milagro sa Pag-ayo: Pagpangalagad ngadto sa Usa,” Liahona, Okt. 2023.
Ang mga Milagro ni Jesus
Mga Milagro sa Pag-ayo: Pagpangalagad ngadto sa Usa
Unsa ang atong makat-onan gikan sa pag-ayo ni Jesus sa babaye nga walay undang ang pagdugo ug sa babaye nga dili makatindog sa iyang kaugalingon?
Who Touched Me? [Kinsay Mihikap Kanako?], ni Yongsung Kim, sa maayong kabubut-on sa Havenlight
Pipila sa mas makapahinam ug makapatingala nga mga panghitabo sa kinabuhi ni Jesus nga taga-Nazaret naglakip sa daghang milagro nga Iyang gihimo. Mibuhat siya og nagkadaiyang lahi-lahi nga mga milagro sa daghang lainlain nga mga kahimtang.
Kini nakapalig-on sa hugot nga pagtuo sa matuohon nga mga kasingkasing ug mipanalangin sa mga kinabuhi sa tinuod nga mga tawo. Tungod sa nindot kaayo nga mga resulta niini, kini nga mga milagro—nga gihulagway sa nagkadaiyang hubad sa biblia isip mga timailhan, mga katingalahan, mga gahom, ug gamhanan nga mga buhat—adunay potensiyal sa pagpakusog ug pagpadako sa espirituhanon nga epekto sa mga pagtulon-an ni Kristo. Kini midugang sa Iyang pangalagad og butang nga makapahingangha ug kasagaran dili malalis. Kini mihatag og kredibilidad sa Iyang mga paghago.
Apan ang tuyo sa mga milagro ni Jesus labaw pa gayod sa pagdani sa atensiyon ug pagpatingala sa mga tawo (bisan kini nakabuhat gayod niana). Si Kristo dili usa ka tigpasundayag, ni Siya naningkamot nga mahimong inila pinaagi sa Iyang mga milagro. Wala gayod kita nakabasa bahin Kaniya nga nagpadala daan og mga pahinumdom [advertisements], mireserba og dapit sa templo, o nagpakita og gahom sa mahambogon nga paagi. Sa sukwahi, ang Iyang mga milagro adunay mas mahimayaon gayod nga katuyoan. Gibuhat lamang Niya ang kabubut-on sa Amahan.
Ang Pag-ayo sa “usa ka Babaye nga Walay Undang ang Pagdugo”
Isip usa ka doktor, kasagaran nainteresado ko sa mga asoy sa mga pag-ayo sa Manluluwas. Usa niana nga milagro nahitabo isip kabahin sa nindot kaayo nga istorya sa babaye nga walay undang ang pagdugo (tan-awa sa Mateo 9:20–22; Marcos 5:25–34; Lucas 8:43–48). Ang iyang kinabuhi lisod kaayo ug magul-anon. Sulod sa 12 ka tuig nag-antos siya niini nga sakit ug sa daghang sangpotanan niini.
Bisan sa paggahin sa tanan niyang oras ug talento (ug kwarta!) sa pagpangita og tambal, ang mga doktor sa iyang panahon wala makaayo kaniya. Posible nga nag-antos siya og menorrhagia, usa ka kondisyon sa mga babaye nga nailhan sa dili normal nga kakusgon ug kadugayon sa binulan nga pagdugo. Kini adunay daghang posible nga mga hinungdan—lakip sa pagkadili balanse sa hormon, pagbagtok sa dugo sama sa von Willebrand nga sakit, ubos og mga platelet, dili normal nga anatomy sa tiyan, ug kanser—ug kasagarang giubanan sa grabe nga kasakit ug pamikog. Human sa 12 ka tuig nga kusog nga pagdugo, kining makaluluoy nga babaye lagmit usab nakasinati og kaluya, kakapoy, ug anemya.
Apan ang iyang pisikal nga kakulian katunga lamang sa problema! Sa balaod, ang pagdugo mokategoriya kaniya isip “mahugaw”—buot ipasabot gipugos siya sa pagpuyo nga layo sa uban samtang nasakit pa siya pag-ayo. Lagmit nagpasabot kini nga layo gikan sa bana o mga anak kon siya aduna. Siya dili makauban kanila o makaatiman kanila. Ang dugang nga mga restriksiyon mopugong kaniya sa pagsimba sa templo o pagbisita sa sinagoga. Agig dugang, si bisan kinsa nga iyang mahikap, o kinsa mihikap kaniya, mahimong ipahayag usab nga “mahugaw.”
Bisan pa niining legal ug sosyal nga mga babag, kini nga babaye nga may hugot nga pagtuo miduol sa Manluluwas, lagmit gikan sa luyo ug diha taliwala sa dakong pundok sa katawhan, uban ang sinsero nga paglaom nga bisan ang paghikap lang sa Iyang sinina makatabang kaniya sa pagkab-ot sa gitinguha sa iyang kasingkasing. Ang kasulatan nagpahibalo kanato nga sa paghikap sa sinina ni Jesus, mibati siya og dihadiha dayon nga kausaban sa iyang lawas, usa ka santing o bul-og sa gahom, nga nagsaksi ngadto kaniya nga siya gayod sa kataposan “maayo” na (tan-awa sa Marcos 5:28–29).
Tingali tungod sa ginadili nga kahimtang sa iyang kanhi kondisyon, misulay siya nga mobiya sa sekreto, apan ang nasayod sa tanan nga si Kristo nakahibalo sa iyang paghikap—ug sa iyang kasingkasing ug katuyoan. Namulong alang sa kaayohan niadtong naglibot Kaniya, nangutana Siya, “Kinsay mihikap kanako?” dayon midugang, “Adunay mihikap kanako kay gibati ko nga may migulang gahom [hiyas] gikan kanako” (Lucas 8:45, 46).
Kining buotan nga babaye, sa pagpasidungog kaniya, mipaila sa iyang kaugalingon ug mitug-an, nangamuyo alang sa iyang kahimtang ug mipakigbahin sa balita sa iyang pagkaayo. Ang “mahugaw” nga mohikap sa laing tawo makonsiderar nga dako nga paglapas sa balaod, apan sa unsay akong nahunahuna nga dakong gugma sa Iyang kasingkasing, si Jesus mihupay sa babaye, miseguro kaniya nga maayo ra ang tanan, nga ang iyang hugot nga pagtuo nakaayo kaniya, ug nga siya mahimong mobiya nga malinawon, gawasnon sa iyang kanhi sakit. Ang tanan nga diha sa palibot nahingangha.
Kini nga insidente nahitabo samtang si Jesus, ang Iyang mga disipulo, ug ang usa ka magmamando sa lokal nga sinagoga nga ginganlan og Jairo nagdali paingon ngadto sa iyang panimalay aron adtoon ang iyang masakiton kaayo nga anak nga babaye. Sila nagdali gayod ug kulang na sa oras—ang batang babaye, labaw sa tanan, “himatyon” (Marcos 5:23)—ug bisan pa man ang Manluluwas migahin og panahon sa pagpangalagad ngadto sa usa, ngadto sa usa ka kalag nga nanginahanglan. Pagkanindot nga leksiyon sa pagpangalagad! Ang kalangay, sa inyong mahinumdoman, miresulta sa ilang pagkalangan og abot ngadto sa panimalay ni Jairo—human nga mipanaw ang iyang bililhon nga anak nga babaye. Ang kalangay nakapahimo gayod sa nagsunod nga pagkaayo sa batang babaye nga mas talagsaon.
Walay nagpahibalo, ang Manluluwas nakabantay niining nag-antos nga babaye. Mihunong Siya sa unsay Iyang gibuhat, gipahulat usa ang tanang pundok sa katawhan, ug nangalagad ngadto sa usa.
The Woman with an Infirmity of Eighteen Years [Ang Babaye nga adunay Sakit sulod sa Napulog Walo ka Tuig], ni James Tissot, © Brooklyn Museum / gipalit pinaagi sa publiko nga subskripsiyon / Bridgeman Images
Pag-ayo sa usa ka Babaye Kinsa “Dili Makatuyhad sa Iyang Kaugalingon”
Laing talagsaon nga panghitabo sa pangalagad sa Manluluwas naglambigit sa ikaduha nga “anak ni Abraham” nga adunay dugay na kaayo nga sakit (tan-awa sa Lucas 13:11–16). Mapasalamaton kita sa pagrekord ni Lucas niini nga insidente, siya nga usa ka doktor ug disipulo ni Kristo.
Usa ka adlaw nga Igpapahulay, si Jesus nagtudlo og dako gayod nga kongregasyon diha sa usa ka sinagoga. Diha sa pundok sa katawhan mao ang usa ka babaye nga grabeng naapektohan sa usa ka makaluluoy nga kondisyon sulod sa 18 ka tuig nga maoy nakaingon nga nabako og maayo ang iyang lawas nga dili siya makahimo sa pagtuyhad sa iyang lawas. Pipila ka kondisyon ang mahimong hinungdan niana nga sakit. Pipila niini anaa na daan gikan sa pagkatawo ug morag dili kaayo lagmit niini nga kahimtang, tungod kay ang biktima usa ka hamtong nga babaye. Ang uban, depende kon hain ang pagkahiwi o limitasyon nahimutang, makapahimo niya nga usa ka biktima sa grabe nga arthritis, traumatic nga kadaot sa bukobuko, ankylosing spondylitis, Scheuermann’s nga sakit, o grabe na nga osteoporosis. Kini nga mga kondisyon tanan masakit ug makapaluya (sulayi ang pagyuko ngadto sa 90 ka degree sulod sa bisan unsang gidugayon; kapoy kaayo kini ug, sa kataposan, makapahingutas).
Walay nagpahibalo, ang Manluluwas nakabantay niining nag-antos nga babaye. Sama sa Iyang gibuhat human sa pag-ayo sa babaye nga walay undang ang pagdugo, mihunong Siya sa unsay Iyang gibuhat, gipahulat usa ang tanang pundok sa katawhan, ug nangalagad ngadto sa usa. Gipaduol siya ug gipandong ang Iyang mga kamot kaniya, Siya militok, “Babaye, naayo na ikaw sa imong sakit” (Lucas 13:12). Ang resulta sa Iyang mga pulong dihadiha dayon. Mibarog siya nga tul-id—ug, kita makapangagpas, walay nay sakit—alang sa unang higayon sulod sa dul-an sa duha ka dekada. Siya (ug lagmit sa daghang uban nga dinha) mihimaya sa Dios ug nagpasalamat.
Sa laing bahin, ang magmamando sa sinagoga nasilo niining “trabaho” nga gibuhat atol sa Igpapahulay. Alang sa kaayohan sa rabbi ug sa uban nga susama kaniya, si Jesus nagsugod sa pagtudlo og wali nga adunay dako nga kamahinungdanon mahitungod sa adlaw nga Igpapahulay; ang nag-una nga milagro naghatag og hingpit nga pasiuna.
Nganong mga Milagro?
Pinaagi niini ug sa ubang mga higayon, akong naobserbahan nga ang mga milagro ni Kristo:
-
Kanunay nga usa ka paagi sa pagpanalangin.
-
Mihatag og pruweba sa Iyang gugma ug pagmahal alang sa Iyang mga igsoon. Kini pagmatuod sa kaimportante sa usa ngadto sa Manluluwas. Sa dihang nangalagad Siya sa katawhan, panagsa ra Siya nga daghan og gibuhat [multitask]; hinuon, Siya mihatag kanila sa Iyang hingpit ug walay pagkabahin nga pagtagad.
-
Mihatag og leksiyon nga ang bili sa mga kalag mahinungdanon. Siya nakaila gayod sa matag binuhat, sa ilang mga kahimtang, ug sa ilang mga panginahanglan.
-
Nagpakita sa Iyang gahom ug kahanas sa mismong mga elemento sa paagi nga wala pa masabti. Siya misunod sa kinatibuk-an nga mga balaod, ug ang tanang butang anaa ubos sa Iyang pagdumala.
-
Kasagaran nahitabo sa dili pa ang mahinungdanon nga mga panahon sa pagtudlo, nag-andam sa mga tawo alang sa Iyang pagpatin-aw sa sagrado nga mga kamatuoran sa ebanghelyo. Kini midani og pagtagad ngadto sa unsay hapit nang mahitabo.
-
Nagsilbi nga usa ka saksi ngadto niadtong personal nga naapektohan, ingon man ngadto sa mga nag-obserbar, nga si Jesus mao ang gisaad nga Mesiyas sa panagna ug nga Siya anaa diha alang sa buluhaton sa Iyang Amahan.
-
Nagpakita nga ang pisikal ug espirituhanon nga pag-ayo moabot pinaagi sa gahom nga tuyong gamiton ni Kristo, dili pinaagi sa mahikanhon nga mga butang o mga anting-anting, ug nga kini nga mga milagro (sama sa kahimtang sa babaye nga walay undang ang pagdugo) usahay mahimong mapahinabo pinaagi sa hugot nga pagtuo sa nangayo.1
Bisan pa sa katinuod nga ang mga milagro dili kanunayng ebidensiya gayod sa binuhatan sa langit (sama pananglit, tan-awa sa Exodo 7:11; Mateo 7:22–23; Marcos 3:22; Gipadayag 16:13–14), ang Iyang mga milagro kanunayng mga buhat sa pagkamatarong ug kapuangod. Kini kanunayng mopanalangin. Ug kini naglakip sa labing talagsaon nga milagro sa tanan, usa ka milagro nga kinatibuk-an ug walay kataposan ang kamahinungdanon, nga natuman didto sa Getsemani, sa Golgota, ug diha sa lubnganan. Kini nga milagro nagseguro nga usa ka adlaw, ang matag pisikal ug espiritwal nga sakit mahimong maayo ug mabuntog.
Ang iyang mga milagro naglakip og balaanon ug mahimayaon nga katuyoan—ug dako og bili ngadto sa putli og kasingkasing ug sa matuohon, sa dugay nang panahon kaniadto ug sa karon! Kini nagpamatuod nga Siya mao, sa pagkatinuod, ang Kristo. Ug padayon sa pagtinguha sa mga milagro sa inyong kinabuhi! Si Presidente Russell M. Nelson mitambag kanato sa pagpadayon sa pagtinguha ug paglaom sa mga milagro samtang siya nanagna nga ang labing dako nga mga pagpakita sa gahom sa Manluluwas moabot pa sa katuigan sa unahan.2