Maa o Sauniuniga, Fuafuaga, ma le Tumau Ai,” Liahona, 2022.
Maa o Sauniuniga, Fuafuaga ma le Tumau Ai
Ao e fuafuaina lou lumanai, fausia lou faavae i luga o le maa e sili ona taua—o le Faaola o Iesu Keriso.
Sauniuniga
Atonu ua e silafia le tala ia Tavita ma Koliata. O Koliata o se toa tinotelē lea na fai ma sui o Filisitia. O Tavita o se leoleo mamoe talavou na tu atu mo Isaraelu. Na iloa e Tavita sa i ai le Atua i lana itu. Sa le’i fefe o ia e tau ma Koliata, aua sa tetee Koliata i autau a le Atua soifua.
Ina ia saunia mo le taua o le a oo mai, sa filifili e Tavita ni maa lamolemole se lima mai se alia ma tuu i totonu o lana taga leoleo mamoe. Ona alu lea o ia e feiloai ma Koliata i le taua. Sa le o se taua umi. Sa mafai ona fasiotia e Tavita ia Koliata i le na o le tasi le maa. (Tagai i le 1 Samuelu 17:40–50.)
Afai na iloa e Tavita sa i ai le Atua i lana itu ma e na o le tasi lava le maa na te manaomia, aisea na ia faaaluina ai le taimi e filifili ai ni maa se lima? E tusa ai ma le tala faatusipaia, sa lagona e Tavita le to’a. Sa ia ta’u atu ia Koliata, “O loo ia Ieova le taua, na te tuuina mai outou i o matou lima” (1 Samuelu 17:47). Pe na faamaumau ea e Tavita lona taimi e vaavaai ai ni maa se lima? Pe na le i lava ea lona faatuatua?
O se lesona na ou aoaoina mai i lenei tala e faapea e tatau ona tatou saunia lelei mo lo tatou lumanai. Atonu e le mafai ona tatou suia mea uma e oo mai, ae e mafai ona tatou filifili pe faapefea ona tatou saunia mo mea o le a oo mai. A o e faaauupegaina oe lava mo lau galuega le mautinoa i le lumanai, o ou luitau e le’i mafaufauina, ma lou olaga i le lumanai e le’i fuafuaina, atonu e te faaaogaina na o le tasi le maa, pe e te manaomia ni maa se lima. Faalagolago i le Alii ma saunia lelei mo mea o le a fetaiai ma oe i lou lumanai.
Fuafuaina
I le tusi a Eteru, tatou te aoao ai e uiga i le malaga a le uso o Iareto ma lona aiga ma uo a o latou agai atu i le nuu o le folafolaga. Ina ua latou taunuu atu i le matafaga, sa latou nonofo ai i faleie mo le fa tausaga.
“I le faaiuga o tausaga e fa, sa toe afio mai le Alii i le uso o Iareto, ma afio i totonu o se ao ma fetalai mai ia te ia. Ma sa fetalai le Alii i le uso o Iareto mo le va o le tolu itula, ma aoai o ia ona sa ia le manatua e valaau atu i le suafa o le Alii” (Eteru 2:14).
Sa salamo le uso o Iareto i lea mea leaga na ia faia, ma sa faamagaloina o ia e le Atua ma fautuaina o ia ia aua ne’i toe agasala. Na folafola atu foi e le Atua o le a Ia aveina atu ia tagata i “se laueleele o le a silisili ona lelei o isi laueleele uma” mo o outou tofi (Eteru 2:15).
Ona faatonuina lea e le Alii le uso o Iareto e fausia ni vaa. Ina ua ma’ea [ona fausia] e le uso o Iareto [vaa], sa ia fesili atu i le Alii mo se fesoasoani. Sa ia fia iloa pe o le a faapefea ona manava ona tagata i totonu o vaa (tagai i le Eteru 2:19).
Sa mutimutialofa le Alii, ma tali mai, “Faauta, ia e faia se pu i luga o le fogavaa, ma lalo foi; ma a oo ina outou manaomia se ea ia outou tatala le pu ma maua ai le ea. Ma afai e faapea e sau le vai i o outou luga, faauta, ia outou tapuni le pu, ina ia outou le fano i le lolo” (Eteru 2:20).
E le’i faigata tele lena mea.
Ona fesili atu lea o le uso o Iareto, “Faauta, le Alii e, pe e te tuu ea i matou ia matou sopoia lenei vai tele i le pogisa?” (Eteru 2:22).
O le taimi la lea sa fesoasoani le Alii i le uso o Iareto ina ia faalagolago o ia ia te ia lava i le mauaina o se vaifofo. “O le a se mea tou te mananao ia ou faia ina ia outou maua se malamalama i totonu o o outou vaa? Aua faauta, e le mafai ona outou faia ni faamalama, ona o le a taia nutililii; pe tou te ave foi afi faatasi ma outou, ona tou te le o i le malamalama o le afi” (Eteru 2:23; tagai foi i fuaiupu e 24–25).
O le malamalama ai i le tulaga, sa saili ai e le uso o Iareto se vaifofo lea o le a sili ona aoga i le tulaga o le a feagai ma ona tagata ao sopoia le “moana tele” (Eteru 2:25).
Sa filifili le uso o Iareto e “gaosi mai se papa ni maa laiti e sefulu ma le ono; ma sa papae ma manino ia maa, e pei lava o le tioata manino; ma sa ia ave ia maa i ona lima i luga i le tumutumu o le mauga, ma toe tagi atu i le Alii” (Eteru 3:1).
Ua Vaai le Uso o Iareto i le Tamatamai Aao o le Alii, saunia e Arnold Friberg
Sa ia aioi atu i le Alii ia pai mai Lona tamatamai aao i maa ma saunia i latou ina ia “susulu atu i le pogisa.” Sa faia e le Atua e pei ona talosagaina e le uso o Iareto, ma sa tuu e le uso o Iareto maa e sefuluono i totonu o vaa e valu, e taitasi i le itu, ma sa “latou tuuina atu le malamalama i vaa.” (Tagai i le Eteru 3:4–6; 6:2.)
Faatusatusa lenei aafiaga i le fuafuaina mo lou lumanai. O aso taitasi o loo e aoaoina ma faatulagaina le alafua mo lou lumanai. Pe o lona uiga o sailiga o le aotauina, filifiliga faalegaluega, po o fuafuaga faaleaiga, e mafai e le Alii ona tuuina atu ia te oe le taitaiga. O le faaipoipoina mo le faavavau ma le amataina o se aiga o se vaega o le ala e tau atu i le laueleele folafolaina o le faaeaga. O loo silasila ma le naunautai le Alii i le ala o loo e uia e te oo atu ai.
E pei lava ona fesoasoani le Alii ia sa Iareto e ala i le pai atu i maa, e mafai foi ona Ia tuuina atu ia te oe le malamalama e fesoasoani ia te oe e vaai ai i taimi o filifiliga, pogisa, ma le masalosalo. O le mauaina o le taitaiga a le Alii e ala i le Agaga e pei lava o le pai mai o le tamatamai aao o le Atua ma le mauaina o le mana ma le malamalama faaleagaga e taitai atu ai lou aiga i le nuu o le folafolaga.
Tutumau
O le maa taua mulimuli ou te fia ta’ua o loo tusia i le Mataupu Faavae ma Feagaiga 50:44: “O le mea lea, ua Ou i ai i lo outou lotolotoi, ma o Aʼu o le leoleo mamoe lelei, ma le maa o Isaraelu. O ia o lē e ati aʼe i luga o lenei papa o le a lē paʼū lava.”
Sa aoao atu e Iesu Keriso ona soo e uiga i se tagata poto ma se tagata valea, o loo tusia i le Mataio e 7. Sa mananao tamaloloa taitasi e saunia se fale saogalemu ma lelei mo lona aiga, ma sa la fetaiai uma ma le luitau e tasi: “Ua to mai le timu, ua alu a’e le tafe.”1
Peitai, o le eseesega, o le tagata poto na fauina lona fale i luga o le papa ma sa tumau le fale, ae o le tagata valea na fauina lona fale i luga o le oneone ma sa tafiesea lona fale. I le iuga ma le faavavau, e taua lo tatou faavae. Ou te faamoemoe ma tatalo o le a tatou maua uma ma tumau ai i le faavae mautu a o tatou fausia o tatou olaga mo le lumanai.
Ua faamanatu mai ia i tatou i le Helamana 5:12: “Ma o lenei, ou atalii e, ia manatua, ia manatua o luga lava o le papa o lo tatou Togiola, o le o Keriso lea, le Alo o le Atua, e ao ina oulua atinae ai lo oulua faavae; ina ia pe a auina mai e le tiapolo ana matagi malolosi, ioe, ana ufanafana i le asiosio, ioe, pe a pesi mai ia te oulua ana uatoa uma ma lana afa malosi, o le a leai sona mana i luga o oulua e toso ifo ai oulua i lalo i le to o le pagatia ma le malaia e le gata, ona o le papa lea ua oulua atinae ai i luga, o le faavae mautinoa lea, o se faavae lea afai e atiae ai tagata e le mafai lava ona pauu i latou.”
O se folafolaga lena mai le Atua! Afai tatou te atiaʼe lo tatou faavae i luga o Iesu Keriso, e le mafai ona tatou pauu!
A o tatou faaauau ona fuafuaina lo tatou lumanai, mafaufau i maa nei e 22: lima maa o sauniuniga, e pei ona faamaonia mai e Tavita; sefuluono maa mo fuafuaga, e pei ona faaalia mai e le uso o Iareto; ma le maa sili ona taua—o lo tatou maa faavae, lo tatou papa—o le Faaola, o Iesu Keriso.
O o tatou olaga atoa e ao ona faatumuina i le talalelei a Iesu Keriso. O le talalelei a Iesu Keriso e le na o se itutino o o tatou olaga; ae, o o tatou olaga o se itutino o le talalelei a Iesu Keriso. Mafaufau i ai. O lo tatou olaga faitino o se itutino o le ata atoa o le faaolataga ma le faaeaga.
O le Atua o lo tatou Tama Faalelagi. E alofa o Ia ia i tatou uma. Na Te silafia o tatou gafatia e sili mamao atu nai lo lo tatou iloaina o i tatou lava. “E le na o auiliiliga o o tatou olaga Na Te silafia. E silafia e le Atua ia auiliiliga o auiliiliga o auiliiliga o o tatou olaga.”2
Ou te molimau atu o le a toe afio mai Iesu Keriso, ae o le taimi lenei o le a Ia afio mai ma le mamalu tele ma le tautupu. Talosia o le a tatou saunia e talia o Ia.
Sei oo atu i lena taimi, faamolemole “ia e faatuatua i le Alii ma lou loto atoa; ae aua le faalagolago i lou lava atamai. Ia e manatua o ia i ou ala uma, ona faatonuina ai lea e ia lava ou ala” (Faataoto 3:5–6).
Mai se saunoaga i le faigalotu, “22 Stones,” na tuuina atu i le Iunivesite o Polika Iaga–Idaho, i le aso 27 Aperila, 2021.