2022
E Mafai Ona Tatou Fesoasoani i Isi ia Latou Maua le Filemu i Taimi Faigata
Aokuso 2022

“E Mafai Ona Tatou Fesoasoani i Isi ia Latou Maua le Filemu i Taimi Faigata,” Liahona, Aok. 2022.

Mataupu Faavae o le Auaunaga

E Mafai Ona Tatou Fesoasoani i Isi ia Latou Maua le Filemu i Taimi Faigata

Sa aoaiina e le Alii uo a Iopu, o e sa faamasino atu nai lo le auauna atu ia te ia.

Ata
tamaitai o loo maua se faamanuiaga faaleperisitua i le fale

I taimi faapenei, o le mauaina o le filemu i totonu e mafai ona avea ma luitau. O le toatele o i tatou ua i ai aafiaga o le tauivi e tausia se agaga o le filemu. E mafai ona tatou fesoasoani e lagolago ma faamanuia olaga o le tasi ma le isi i le agaalofa ma le malamalama.

Na faamoemoe Maria (ua suia le igoa) o le a fiafia ma manuia lana faaipoipoga. Sa ia tuua lona olaga tuai i tua ina ia faatofuina atoa lona taimi i lona olaga ma lona toalua. Ae ina ua mavae se taimi, na ia (lona toalua) faia ni filifiliga o le olaga na faaleagaina ai le la mafutaga. Sa ia lagonaina le popolevale, le saunia, ma le matua le mautonu a o ia tauivi e fausia se isi olaga mo ia lava ma lana fanau e toafa. Sa ia iloa na manaomia ona ia faamuamua le Atua i lona olaga ma faataga o Ia e faamalolo ia te ia, ae sa le faigofie.

O le uso ma le tuagane o auaunaga a Maria, o le au Watson, sa aapa atu ma le alofa ia te ia e ofo atu le fesoasoani ma le lagolago. I le taimi muamua, sa finau atu ma le loto maaa Maria na te le manaomia se fesoasoani. Ae o le au Watson ma isi tagata o lana uarota sa faaauau pea ona ofo atu lo latou alofa ma le faauo i auala faigofie, masani: nonofo faatasi ma le aiga o Maria i faatasiga, fesoasoani i galuega i le fanua, ma saili ni auala faigofie ae patino e faailoa atu ai ia Maria o loo latou mafaufau ia te ia ma naunau e ofo atu le fesoasoani. Sa faapitoa lona talisapaia o faamanuiaga faaleperisitua na tuuina e Brother Watson mo Maria ma lana fanau, e aumaia ai le filemu i o latou loto.

Na iloa e Maria o le au Watson na tofia e auauna atu ia te ia, ae na te lei lagonaina lava o le auaunaga ma le faauoga na faia ona o le tofiga. Sa ia lagonaina lo laua faamaoni ma le alofa ona sa la faia o ia e pei o se tuafafine pele. Sa avea i laua ma ona aiga.

Ia Faamuamua le Atua

Ata
tagata o loo fegalegaleai

Ata na pueina e Jeremy Hall

O le tusi a Iopu i le Feagaiga Tuai o loo faamatalaina ai le tala lauiloa i se tagata na oo i tofotofoga ogaoga ma faigata. Sa fesili atu lona toalua ia te ia pe aisea na ia le fiu ai (tagai Iopu 2:9). O ana uo, o e na muai o mai e auauna ia te ia (tagai Iopu 2:11–13), na iu ina faamasinoina o ia ma taumafai e faatalitonu o ia o ona tofotofoga o se faasalaga mo le agasala (tagai Iopu 22). Ae sa tumau pea lona naunau e faamuamua le Atua i lona olaga (tagai Iopu 13:15). E ala i lona faamaoni, sa mafai ai ona ia maua faamanuiaga e sili atu nai lo le taimi muamua, e aofia ai le faamanuiaga o le iloaina o le Atua i se auala e sili atu ona atoatoa (tagai Iopu 42:1–5). I le avea ai ma uso ma tuafafine o auaunaga, o lo tatou alolofa ma le lagolagosua e mafai ona fesoasoani i isi e liliu atu i le Alii i o latou luitau ma faamaloloina ai (Mataupu Faavae ma Feagaiga 112:13).

I le avea ai ma uso ma tuafafine o auaunaga, o lo tatou alolofa ma le lagolagosua e mafai ona fesoasoani i isi e liliu atu i le Alii i o latou luitau ma faamaloloina ai (Mataupu Faavae ma Feagaiga 112:13).

Mataupu Faavae e Mafaufau i Ai

A o e saili e fesoasoani ia i latou o loo e auauna atu i ai ia maua le filemu, mafaufau i mea nei:

  • Sa aapa atu ma le alofa le tuagane ma le uso o auaunaga a Maria ma aloese mai le faia o se faamasinoga (tagai Iopu 42:7; Moronae 7:45–48).

  • O le auaunaga e masani lava ona sili atu ona ausia e ala i faatinoga laiti ma faatauvaa (tagai Alema 37:6).

  • Afai tatou te tuu i tatou lava i le tulaga o a tatou uo ma tatalo ia iloa po o le a le mea e sili ona fesoasoani, e mafai e le Atua ona faatonutonu a tatou amioga (tagai Mataio 7:7–11).

  • O faamanuiaga faaleperisitua e le gata e mafai ona maua ai le faamalologa faaletino ae e ofoina atu ai foi le filemu ma le mafanafana i taimi o le atuatuvale po o faigata.

  • E pei o Iopu, afai tatou te tumau faamaoni i o tatou tofotofoga ma faamuamua le Atua i o tatou olaga, e mafai ona tatou masani ma le Atua ma maua le filemu (tagai Iopu 22:21).

O Le a se Mea e Mafai ona Tatou Faia?

Afai e feagai se tasi e te auauna atu i ai ma tofotofoga ma luitau, taumafai e ofo atu le alofa faamaoni ma le lagolago e aunoa ma le faamasinoina ma le amioletonu e pei ona faia e uo a Iopu.