“O Mea na Ou Aoao mai le Pueina o Vitio o le Tusi a Mamona e uiga i le Alofa o le Atua,” Liahona, Aok. 2022.
Autalavou Matutua
O Mea na Ou Aoao mai le Pueina o Vitio o le Tusi a Mamona e uiga i le Alofa o le Atua
Mo le taimi muamua lava, na ou lagona moni ai le lagi i luga o le fogaeleele.
O le auauna atu i se misiona i Initia o se aafiaga faapitoa mo au, o se vaega ona o lo’u tina o se Initia. E ui o la’u misiona na manaomia ai le tele o fetuunaiga, o le fetuunaiga i le aganuu e le o se tasi o na mea—ma sa ou iloa o Initia o le nofoaga lea sa tatau ona ou auauna atu ai.
Ae e pei lava ona ou iloa e uiga i le aganuu, sa maoae le vaaia pea o le faatuatua ma tauiviga a tagata o le Ekalesia i Initia. O la latou aganuu e malosi lona faavaeina i tu masani tuugutu, ma o i latou o ni tagata sili ona lelei i fesootaiga ma aoaoga e ala i le vaai, o lea na avea ai vitio o le Tusi a Mamona ma faavae o a latou suesuega o tusitusiga paia. Sa mafai ona latou lagonaina le moni o tala a o latou matamata i ai.
O le mea sa ou vaaia i la’u misiona o se faasologa o vavega laiti, patino lea na molimau mai e silafia ma alofa le Tama Faalelagi ia i tatou taitoatasi. O vitio o le Tusi a Mamona sa musuia—o se auala mo le savali a le Tama Faalelagi e oo atu ai i Lana fanau o e le mafai ona mauaina i se isi lava auala.
O lea ina ua imeli mai lou tuafafine ia te au a o ou i ai pea i lau misiona ma fesili mai pe ou te manao e talosaga e avea ma se tagata faaopoopo i vitio mulimuli ane, sa ou iloa o le a avea ma se avanoa sili e aoao atili ai e uiga i le galuega faatino lea na fesoasoani ia i latou sa ou aoaoina ia maua se molimau o le Tusi a Mamona.
Vaaiga e uiga i le Faaola
Sa ou vaai faalemafaufau i le asiasiga e le mafaitaulia a Keriso i sa Nifae, o lea e le o se mea e ofo ai le pueina o lenei vaega ofoofogia o le 3 Nifae o le taimi sili lea ona ou fiafia i ai i le vaaiga. Sa faaalia e le tagata autu ia Keriso e pei lava ona faamatalaina e tusitusiga paia o ia: aapa atu i tagata “taitoatasi seia oo ina latou o atu uma” (3 Nifae 11:15). Na Ia siitia i latou; na Ia soloiesea o latou loimata; sa Ia aapa atu e opo mai tamaiti laiti—sa Ia faia soo se mea e manaomia e tagata taitoatasi i lena taimi.
O le auai i lena vaaiga na fesoasoani ia te au e maua ai se talisapaia sili atu o le alofa o Keriso mo sa Nifae. E ui ina sa ou galue e na o se tagata lagolago, sa ou taumafai e faaata sa’o le mea semanu e lagona e se tasi i lena taimi pe a i ai i le afioaga o le Faaola. O tagata tatou te faitau i ai i le Tusi a Mamona o ni tagata moni o loo i ai ni tauiviga moni. Sa ou taumafai e vaai faalemafaufau i mea na latou oo i ai, po o a ni faigata atonu na latou mafatia ai, ma pe na faapefea e nei vavega ona faaali atu ia i latou e alofa moni lava le Atua i Ana fanau uma.
Lagonaina o le Alofa o le Atua
O le savali ai i seevae o se sa Nifae na faamalosia ai la’u molimau ma le malamalama i tala o le Tusi a Mamona. Ae atonu e tutusa lava le taua i la’u molimau o le aoao mai i isi tagata fai ata tifaga. I le avea ai ma se tagata mai talaaga eseese uma, sa matou iloa ai sa fetaia’i o matou ala i ni auala faavavega ma e ala i le mamanu faalelagi—ua faaali mai ai ia te a’u le auala e silafia moni ai ma alofa mai ai le Atua ia i matou.
Sa ou lagonaina Lona alofa mo sa Nifae a o ou aoao atili e uiga ia i latou ma a latou tala. Sa ou lagonaina Lona alofa mo Lana fanau i Initia, o e sa Ia silafia e manaomia se auala e aoao atili ai e uiga i le Tusi a Mamona. Ma sa ou lagonaina Lona alofa mo tagata uma o le ata a o matou o mai faatasi ma faia le mea sili matou te mafaia e faasoa atu ai a matou molimau ma aumaia nei upumoni i tagata.
O le Agaga mamana ma le alofa na faatumulia ai le seti na aumaia ai ia te au se vaaiga moni i foliga o Siona (tagai 4 Nifae 1:17). Sa pei moni lava o le lagi i luga o le fogaeleele ia te au.
O lo’u taimi i le seti na aoaoina ai au e mafai ona tatou auauna atu i le ala lava e tasi na faia ai e Keriso—i le tasi. Sa faamalamalama mai e Peresitene Russell M. Nelson: “O se faailoga o le Ekalesia moni a le Alii o le a avea pea ma se taumafaiga faatulagaina ma faatonutonuina e auauna atu i fanau taitoatasi a le Atua ma o latou aiga.”1
A o tatou faia le mea sa’o, i le iloaina o i tatou o fanau a le Atua ma le iloaina e tatau i tagata uma ona lagonaina Lona alofa, o le a tatou le tuulafoaiina tagata ona o o latou foliga pe ona o le ese o i latou mai ia i tatou. E mafai ona tatou faasoa atu ia i latou mea ua tatou iloa ma avea ma meafaigaluega i aao o le Alii, faasoa atu Lona alofa i tagata uma.