“Sa I Ai Sa’u Filifiliga e Fai,” Liahona, Aok. 2022.
Na‘o Tusiga Faatekinolosi: Atatosi o le Faatuatua
Sa I Ai Sa’u Filifiliga e Fai
Pe tatau ea ona ou faasee i le Aso Sa pe faataunuu o’u tiutetauave o se tane, tamā, ma se tagata o le Ekalesia?
Ata na pueina e Manea Fabisch
O le faase’e laupapa sa avea ma o’u faananauga sili talu ona ou mauaina. O la’u taleni, o la’u auala e malolo ai. Mai le amataga, sa ou manao lava i taimi uma ia maualuga ona ou lelei ai.
Ina ia oo atu i le tulaga aupito maualuga, sa ou faataitai ma le lelavā, ma faase’e i le aso atoa i so o se taimi e mafai ai. Sa ou taulai atu i la’u sini ia avea ma tagata e faasee i tulivae sili ona lelei i Tahiti. Sa ou manumalo faalua pe faatolu ai i le ipu i lena vaega i le tauvaga faasee o le Tahiti Taapuna Master faapea ai foi ma isi tauvaga.
Ina ua ou amata, sa aumaia e tauvaga se fiafiaga ia te a’u, ma sa ou manao e faaali atu i tagata uma lo’u lelei. E lei umi, ae amata ona ou mauaina ni ofo mai tagata e lagolagoina a’u i le lotoifale ma atunuu mamao.
O tauvaga faaiu e faia i taimi uma i aso Sa, ma e masani ona i ai ni a’u finauga ma lo’u toalua e uiga i le tauva i le aso o le Alii. Na sa’o lava o ia. Sa tele naua ina ave lo’u olaga e le faase’e, ae sa ou le manao e motusia a’u tagata e lagolagoina a’u. O e lagolagoina a’u na faatagaina a’u ia maua ni masini faapolofesa pito sili ona lelei, mea faigaluega faasee faapolofesa, lea e taugata. Sa tatau ona ou faia se filifiliga.
E faaosofia a’u e lo’u toalua ma la’u fanau ia avea ma se faataitaiga o le faatuatua. Latou te fesoasoani ia te a’u e filimaoti le mea ou te manao e avea ai. Ma e moni lava, o lo’u faatuatua patino, o le tuputupu ae na ou maua mai i o’u matua ma taitai, o faataitaiga a isi o e na faia ni osigataulaga e faamamalu ai le Sapati, ma uunaiga na ou maua mai le Agaga na fesoasoani foi ia te a’u e faia la’u faaiuga. Sa ou filifili e tuuina atu le faamuamua i o’u tiutetauave o se tane, tamā, ma se sui O Le Ekalesia a Iesu Keriso o le Au Paia o Aso e Gata Ai.
Ata na pueina e Tetuanui Teriitemoehaa
O le tauvaga i le 2006 o le Taapuna Master, sa tuuto atu i le tuagane laitiiti o lo’u tina o Nelva Lee. Sa maliu o ia i se nofoaga faase’e sa masani ona ou alu i ai a o ou laitiiti. E ta’ua o Afu, e latalata i Paea, i le motu o Tahiti. I le na o le 10 minute a o lei malemo le tuagane o lo’u tina, sa ia faamalosiau mai ia ou alofa atu i isi ma ia avea ma se tagata faasee lelei i se nofoaga e latalata i Taapuna, lea sa ia matuai fiafia lava i ai. Sa ou taumafai e faamamalu ana upu mulimuli ia te a’u.
Ina ua ou filifili e tuuto atoa atu a’u lava i le Alii i le Aso Sa, sa ou faamalamalama atu i a’u tagata lagolago le mafuaaga ua ou le toe faase’e ai i faaiuga o tauvaga i le Aso Sa. Sa ou ta’u atu ia i latou o lo’u olaga faaleagaga ma le aiga e manaomia ai le faamuamua.
Sa latou lagolagoina a’u i la’u filifiliga. O le taui, ona o le faaaloalo mo le Aso Sa, na latou fai mai ai ia te a’u e fai ni ata ma ni vitio i isi aso o le vaiaso. E iloa foi ma faaaloalogia e a’u uo ia o’u talitonuga faalelotu ma e masani ona fai mai ia te a’u ou te tatalo mo i latou.
Sa ou agavaa mo faaiuga o tauvaga o le Matai Taapuna i tausaga taitasi talu ona ou avea ma polofesa, ae sa ou le toe tauva i le Aso Sa ina ua uma ona ou manumalo i le ipu i le 2006. O loo ou tauva pea, ae o le taimi nei, pe a latou valaauina lo’u igoa mo le faaiuga o tauvaga i le Aso Sa, ua iloa e tagata uma o le a ou le i ai iina.
Ata na pueina e Manea Fabisch
Sa ou manatuaina upu a Peresitene Russell M. Nelson: “Sa ou aoaoina ai mai tusitusiga paia o la’u amio ma o’u uiga i le Sapati o le a avea ma se faailoga i le va o a’u ma lo’u Tama Faalelagi [tagai Esoto 31:13; Esekielu 20:12, 20]. Faatasi ai ma lena malamalamaaga, sa ou le toe manaomia ni lisi o mea e faia ma mea e lē faia. Pe a manaomia ona ou faia se filifiliga pe o se gaoioiga na talafeagai pe leai foi mo le Sapati, e na o lo’u fesili lava ia te a’u, ‘O le a le faailoga ou te manao e avatu i le Atua?’ O lena fesili na matuai faamanino mai ai ia te a’u filifiliga e uiga i le aso Sapati.”1
I le faaiuga o le 2020, sa gau ai lo’u vae a o ou faase’e. A o ou sailiili malosi pea, sa valaauina a’u e avea ma epikopo o le Uarota a Papeari. Sa ta’u mai e le peresitene o le siteki ia te a’u o la’u faataitaiga o se alii talavou tuuto o lē o loo taumafai e faamuamua le Alii o le a musuia ai tagata talavou e savavali i le ala o feagaiga.
Ou te iloa ua fiafia lo’u Tama Faalelagi i la’u faaiuga. O le mea e sili ai, e leai se mea o le a faatusalia i le fiafia o lo’u aiga ma le paleni ua matou ausia faatasi.