Na’o Tusiga Faatekinolosi: Autalavou Matutua
O Mea na Ou Aoaoina mai le Nofoa Pito i Tua o le Sauniga Faamanatuga
O se aafiaga i le sauniga faamanatuga na aoaoina ai a’u i le ala e auauna atu ai Keriso—i le tasi.
I se tasi Aso Sa sa ou alu ai e faalogologo i le lauga a se uo ua toe foi mai i se misiona. Ina ua ou taunuu atu, sa ou iloaina ou te lei iloaina le toatele o tagata i le potopotoga, o lea sa ou nofo ai na o a’u i le pito i tua o le falesa.
E lei umi ae tufa mai le faamanatuga. Sa na o le toatolu i matou i le nofoa umi i le pito i tua o le falesa, o a’u i le tasi itu ma se ulugalii matutua atu i le isi itu. Sa ou saofai lemu iina, ma ina ua oo mai se tasi o tiakono i le matou atulaina ma le vai, sa ou soso atu i le ulugalii ina ia le savali mai le tiakono i le ala atoa i autafa o le nofoa e aumai le vai ia te a’u.
Ae ona sa ou me’i ese, sa le mautonu ai le au tiakono pe na ou mauaina le faamanatuga. Ina ua uma ona toe tuuina atu e tiakono a latou fata i ositaulaga, sa i ai se femusuaiga ia i latou. Sa ou matauina a o savali atu se tasi o ositaulaga i le epikopo ma fai atu ia te ia se fesili, faatasi ai ma le luelue atu o le ulu o le epikopo e ioe. O le mea na sosoo ai, o se tiakono, faatasi ai ma se fata falaoa, sa savali mai ia te a’u, ma fesili mai, “Sa e maua le falaoa, a ea?”
Sa vave ona lue atu lo’u ulu, ma sa toe foi atu le tiakono i luma o le falesa. I le taimi muamua, sa ou maasiasi ona sa ou faatupuina se faalavelave. Ae na ou mafaufau lea i aafiaga faaleagaga o le tulaga: o e umia le perisitua, sui o Iesu Keriso, sa popole ona ou te lei mauaina faatusa o le tino ma le toto o Keriso ma o ese atu mai lo latou ala ina ia mafai ai ona ou auai atoatoa i le sauniga.
Avea ma se Soo Moni
O faatinoga a i latou e umia le perisitua i le taimi o lena sauniga faamanatuga na faamanatu mai ai ia te a’u le mea o le a faia e Keriso i se tulaga talitutusa faapena—o le a Ia alu ese mai Lona ala e auauna atu ai i le tasi. Na aoao mai e Elder Joseph B. Wirthlin (1917–2008) o le Korama a Aposetolo e Toasefululua e faapea “o soo moni o Iesu Keriso sa popole i taimi uma mo le toatasi.”1
Ina ia faapei o le Faaola, e tatau ona tatou i ai pea i le sailiga mo i latou o e lagonaina le leiloloa po o le faagaloina ma fesoasoani ia i latou e toe foi atu i le ivasefulu ma le iva. Mo i latou o loo tauivi, o nisi taimi o le avea ma se faataitaiga faaKeriso e mafai ona tatala ai o latou loto ma tafiesea ai le fatu o le faatuatua o loo tanumia i totonu. Sa faapea mai Peresitene Thomas S. Monson (1927–2018), “A tatou mulimuli i le faataitaiga a le Faaola, o lo tatou avanoa lea e avea ai ma se malamalama i olaga o isi.”2
O le avea e faapei o le Faaola e mafai ona aumaia ai le tele o avanoa e fesoasoani ai i isi ia latalata atili atu ia te Ia. E masani ona ou ofo i le toatele o i latou o siomia a’u e i ai ni fesili e faatatau i le talalelei toefuataiina a Iesu Keriso ma talanoa mai ia te a’u ona o la’u faataitaiga. Ou te fiafia e fesoasoani ia i latou ia malamalama atili po o ai i tatou, mea tatou te talitonu i ai, ma le ala o loo i ai Keriso i le totonugalemu o mea uma tatou te faia.
Tauave i O Tatou luga Lona Suafa
O lenei aafiaga i le faamanatuga na fesoasoani foi ia te a’u e malamalama atili ai i le paia o le sauniga ma le ala e mafai ai ona tatou faafouina a tatou feagaiga ma le Tama Faalelagi ma avea ai ma soo sili atu o Keriso.
Fai mai tatalo o le faamanatuga, “Ua latou loto e ave i o latou luga le suafa o lou Alo, ma manatua pea o ia, ma tausi i ana poloaiga ua ia tuuina mai ia te i latou” (Moronae 4:3). Ma o le a se auala sili atu e tauave ai i o tatou luga le suafa o Keriso, ia manatua o Ia, ma tausi Ana poloaiga nai lo le mulimuli i Lana faataitaiga i le auauna atu i le tasi? O le saili ma tatalo mo avanoa e saili ai i latou ua leiloloa o se auala lea e mafai ai ona tatou tausia a tatou feagaiga ma faailoa atu lo tatou talisapaia o le Faaola.
Sa aoao mai le Faaola, “Ma afai e faapea lua te galulue i o oulua aso uma i le alagaina o le salamo i lenei nuu, ma aumai, nao se agaga e toatasi ia te aʼu, e matua tele lava lo oulua olioli faatasi ma ia i le malo o loʼu Tamā!” (Mataupu Faavae ma Feagaiga 18:15). Pe o lena tagata e toatasi o se tagata o le aiga po o se uo o loo tauivi ma lo latou faatuatua po o se tagata asiasi mai tatou te faamautinoaina ua tuuina atu i ai le faamanatuga, e tatau lava ona pupula o tatou mata i taimi uma mo le tasi.
Ou te iloa o loo soifua Iesu Keriso ma o loo sailia i tatou, auā ia te Ia, o i tatou o le tasi. Ma o le taui, e mafai ona tatou vaavaai atu mo i latou o siomia i tatou ma taitai atu foi i latou i Lona malamalama.