Na’o Tusiga Faatekinolosi: Autalavou Matutua
O le Auala na Fesoasoani Ai le Aoao mai Ia i Latou o Isi Faatuatuaga ia te A’u ia Sili Atu le Ola Ai i Lo’u Lava [Faatuatuaga]
O le aoao e uiga i isi tapuaiga e le gata ina pupula ai o’u mata ae sa fesoasoani foi e faateleina ai lo’u lava faatuatua ma musuia ai a’u i se tuuto loloto atu i la’u tapuaiga.
O se aso vevela ma le susu o Iuni i Brooklyn, Niu Ioka, ISA. Sa ou matamata faataamilo i se nuu o tagata Iutaia Hasidic faatasi ai ma nisi o tamaiti aoga o le Iunivesite o Polika Iaga i tulaga tau fesootaiga. E ui lava i le tau, o le tamaloa na tuuina mai le matamataga faataamilo sa ufitia mai lona ulu e oo i tamaivae i lavalava paauli—mai lona pulou uliuli e oo atu i lona suti paauli ma ona seevae lelei. A o matou savavali solo i le pitonuu, sa matou pasia isi tagata o le nuu, sa tutusa uma o latou laei. Ona matou malaga atu lea i le faleoloa o lauulu faapipii, lea na matou iloa ai o fafine Iutaia Hasidic e latou te faia ni lauulu faapipii ma ni ofu uumi.
Sa na ona ou vaai faalemafaufau i le vevela ma le le toamalie o le a i ai mea uma, aemaise lava i le taimi o se taumafanafana vevela o Niu Ioka. Ae peitai o o latou olaga lea—i aso taitasi uma. Sa latou laei faapenei o se vaega o la latou tapuaiga e faaali atu ai lo latou tuuto i le Atua.
I se isi itu, sa mafai ona ou malamalama i la latou tautinoga. Sa i ai i totonu o i matou nisi ua maua faaeega paia i le malumalu ma sa ofuina ofusa o le malumalu i totonu o o latou lavalava. Sa matou osia uma ni feagaiga ma le Atua e ala i le papatisoga ma faia e le aunoa mea na faaalia ai lo matou tuuto atu i le Atua ma i o matou talitonuga. Ae sa manaia le vaaia o le tuuto na faaalia i se auala e ese mai nai lo le mea sa ou masani ai.
Ma na ou mafaufau moni ai lava i le tele o mea e mafai ona ou aoaoina mai faiga faalelotu a isi tagata—ma le auala e mafai ai ona fesoasoani lena mea ia te a’u ia sili atu ona faamoemoeina i le auala ou te tapuai ai ma faaali atu lo’u tuuto i le Atua.
Mauaina o Musumusuga mai Sauniuniga
Sa matou ulufale atu i le fale o le matou taiala o maimoaga ma vaaia ai le umukuka kosher a lona aiga, o loo i ai ni ogaumu se lua, lua mataafi, ma ni tanoa fufulu ipu e lua. O lenei mea ina ia tuu eseese ai aano o manufasi ma meaai tau susu a o kuka, talu ai e le faatagaina vaega e lua o meaai e fepa’ia’i.
I se tasi po o le Aso Faraile, sa matou faatasi ai ma se aiga Iutaia mo le taumafataga o le afiafi a Shabbat, sa faia e faailoa ai le amataga o la latou Sapati, o le Aso Toonai lea. Sa ou matauina a o latou faia ni tatalo masani faa-Iutaia ona auai lea i se taumafataga o meaai eseese, e aofia ai le uaina, lea sa matou teenaina. O nisi o i latou sa auai sa matagofie ia i latou le iloa, i le avea ai ma tagata o le Ekalesia, sa i ai a tatou lava tulaga faatagaina o le soifua maloloina e mulimuli ai ma e le inu ava malosi, kofe, po o le lauti.
Ina ua mavae lo matou aafiaga i lena taumafataga o le afiafi faaShabbat, sa ou mafaufau i nisi o mea na faaalia ai le faapaiaga ma le tuuto o a matou uo Iutaia i la latou tapuaiga. Sa ou mafaufau o le matua osigataulaga lava le lafoai o a’u po o Aso Faraile. Ae sa musuia foi a’u e ala i a latou sauniuniga mo le Sapati. Ae faapefea pe afai ou te faaaluina se taimi tele i Aso Toonai e sauniuni ai mo le Sapati? E mafai faapefea ona ou tuuina atu nisi mafaufauga ma taumafaiga i la’u tausiga o le aso Sapati?
Faataitaiga o le Tuuto ma le Faapaiaga
Sa tele isi o’u aafiaga i lo’u taimi i Niu Ioka lea na musuia ai a’u e le tuutoina ma le faamaoni o tagata o isi faatuatuaga. O a latou faataitaiga na ou toe manatunatu ai i lo’u lava tuuto i la’u lava tapuaiga.
Sa ou talanoa i se alii Sikh o lē, e ui ina sa afaina fua i le inosiaina faasolitulafono i le mavae ai o le 9/11 ona o ona foliga vaaia, ae sa tumau faamaoni i ona talitonuga. Sa ou asiasi atu i se faletapuai ma molimauina ni tagata tapuai Mosalemi o faaaluina se taimi mai le ogatotonu o o latou aso e o mai ai e auai i tatalo. Sa ou savali atu i se falesa mataina ma malamalama atili i le auala e mafai ai e tagata uma, e aofia ai ni au faufale ma tufuga faufale, ona faapaiaina o latou taimi ma taleni i le Atua.
Ma sa amata ona ou fesili ifo ia te a’u lava, O le a le malosi o le a ou puipuia ai lo’u lava faatuatua? Na faafia ona ou faaaluina se taimi mai lo’u aso e tapuai ai ma faailoa atu le faafetai i le Tama Faalelagi? O a taleni e mafai ona ou faapaiaina mo le faamanuiaina o isi?
E masani ona ou tomanatu i lena aso vevela ma le susū i Niu Ioka. Sa matuai musuia lava a’u i le tuuto atu o la matou taitai malaga o maimoaga faaIutaia e ola i lana tapuaiga e le gata i le Sapati ae o aso taitasi uma. O lena aafiaga, ma isi, ua mafai ai ona ou mafaufau pe mafai faapefea ona ou faaali lelei atu i le Atua lo’u tuuto ia te Ia ma Lana talalelei e ala i a’u faatinoga i aso uma.
E ala i le matauina o tagata o isi faatuatuaga, ua ou aoao ai i le ala e atili ai ona lototatalo, le auala e faamamalu atili ai feagaiga na ou osia ma le Atua, le auala e puipuia atili ai lo’u faatuatua ma le lototoa, ma le auala e faaaloalo ai ia i latou o e ese talitonuga mai ia te au. E tele atu mea tatou te tutusa ai nai lo mea tatou te ono mafaufau i ai.