Inspirasyon ug Dali, Sunod Kanako
Samtang nag-andam og leksyon alang sa batan-ong mga babaye, mihukom ko nga mosulay og bag-ong butang.
Paghulagway pinaagi ni David Green
Akong gipakli ang mga pahina sa mga leksyon sa Young Women nga gusto nakong ihatag sa mosunod Dominggo. Ang Kinatibuk-ang Awtoridad mikutlo niini lakip ang mga importante ug mapuslanon, apan kini karaan na.
Sama pananglit, si Presidente Spencer W. Kimball (1895–1985) ang Presidente sa Simbahan dihang gibunyagan ko. Akong gihatagan og bili ang iyang mga pulong, nga mipuno sa manwal, apan nabalaka ko nga ang batan-ong mga babaye dili mobati sa mga pulong sa mga lider nga wala nila mailhi.
Nag-ampo ko alang sa giya ug mibati sa pag-aghat nga mosulay og butang nga bag-o. Akong giupdate ang pipila ka mga istorya ug milakip og kinutlo gikan sa pinakabag-o nga kinatibuk-ang komperensya, nagkutlo ni Presidente Thomas S. Monson (1927–2018). Ang mga resulta hilabihan. Nakabaton kami og espesyal nga leksyon nga dunay daghang partisipasyon. Sukad niadto, migamit ko sa manwal sa leksyon isip usa ka giya sa pag-andam sa akong leksyon.
Ang ingon nga pagpangandam nagkinahanglan og ekstra nga buluhaton. Kinahanglan kong magtuon pa og dugang, kinahanglan ko nga mas makaila sa batan-ong mga babaye, ug kinahanglan ko nga maghunahuna sa mga kasinatian nga ilang naangkon. Dayon motan-aw ko sa mga ehemplo ug mga pulong sa buhi nga mga lider sa Simbahan nga mahimo nakong gamiton sa pagsaysay sa ilang mga kinabuhi. Nalipay ko nga mobuhat og dugang pa alang sa mga batan-ong babaye tungod sa akong gugma alang kanila.
Ang akong mga lider sa katapusan nakabantay sa unsay akong gibuhat. Nahadlok ko nga basin ilaha kong badlungon tungod sa pagkasupakan, apan sila midasig nako sa pagpadayon.
Pipila ka semana sa wala pa motapos ang 2012, ang mga lider sa kabatan-onan sa among stake gihangyo sa pagtambong og miting alang sa pagbansay diin ang mga lider sa stake mipaila sa bag-ong kurikulum alang sa kabatan-onan nga gitawag og Dali, Sunod Kanako.
Hapit dili ko makatuo sa akong nadungog. Mipasabut ang mga lider sa stake nga kami kinahanglan motudlo sama sa pagtudlo sa Ginoo, mangita og inspirasyon alang sa among leksyon gikan sa buhi nga mga propeta ug mga apostoles, ug mas makaila sa among mga kabatan-onan. Aduna na koy usa ka pagpamatuod niadto nga mga butang.
Ang uban nangutana kon unsaon sa pag-andam og mga leksyon, apan alang kanako, ang bag-ong pamaagi tin-aw kaayo. Mibati ko nga kana nga Dali, Sunod Kanako usa ka tubag gikan sa Ginoo nga ako wala magmasinupakon. Gibati nako nga Siya miandam kanako sa pagtudlo niining bag-ong kurikulum. Nasayud ko nga kon kita mapainubsanon ug kugihan ug maminaw sa Espiritu Santo, mahiuyon kita sa tanang kausaban nga gipahibalo pinaagi sa atong mga propeta ug mga apostoles.