Sa Unsang Paagi ang Pagkadili Makaanak Milig-on sa Akong Pagpamatuod sa Pamahayag sa Pamilya
Ang pagbaton og mga anak dili gayud usa ka dako nga prayoridad alang kanako, apan sa dihang kalit lamang nakong giatubang ang posibilidad nga dili makabaton og mga anak, ang akong kasingkasing hingpit nga nausab.
Mipasakop ako sa Simbahan sa edad nga 16 ug sa pagka-17, batok sa tanang mga kalisud, mibiya sa Inglatera alang sa Amerika aron sa pag-eskapo sa kinabuhi nga kabus. Ako hingpit nga nag-inusara ug nahadlok, apan determinado ako. Ako dihay usa ka plano: aron mahimo nga adunahan ug bantugan. Pipila ka tuig ang milabay, ako nakakita og gidokumento nga salida mahitungod sa mga balay sa ilo sa Romania nga nakatandog sa akong batan-on, tig-a nga kasingkasing. Ako dili bag-o sa mga kalisud sa pagkabata, busa naghimo ako og tumong sa pagtigum og igong kwarta nga ikagasto og balay sa mga ilo ug sa tinuoray makahimo og kalainan sa kalibutan.
Ako walay kalibutan niana nga panahon kon unsa ka lahi mahimo ang akong kinabuhi. Nagminyo ako sa edad nga 25, ug sa wala madugay ang akong bana nagpasakop sa Simbahan. Nianang higayuna ako nakahimo nga nagmalampuson, apan sa gihapon nangita ako og tinuod nga “kalampusan” (o sa labing minos unsay akong gituohan nga kalampusan niana nga panahon: dungog ug bahandi). Nangandoy ako nga makahimo og dakong kalainan. Makapahibulong kaayo, dili ako gusto nga momabdos, apan ako adunay bug-at nga pagbati nga kinahanglang dili kita mobuhat og bisan unsa aron pagpugong nga momabdos. Kini misangput nga ang akong gihunahuna husto tungod kay human sa mga usa ka tuig, walay nahitabo.
Giatubang ang Pagkadili Makaanak
Nagdako, gusto ko kanunay og mga bata, bisan tuod og ang akong mga plano wala maglakip sa pagbaton og labaw sa usa o duha nga akong kaugalingon sa dugay pa nga panahon. Wala ako maghunahuna nga ako hilabihan ka masagmuyo kon ako dili gayud makabaton og mga anak, apan sa dihang sa kalit giatubang kanang tinuod gayud nga posibilidad, nahugno ako.
Sulod sa duha ka mga tuig, nahimo akong masuk-anon, maligutguton, ug nawad-an og paglaum. Sa wala damha, “Ang Pamilya: Usa Ka Pamahayag ngadto sa Kalibutan” migawas sa mga panahon nga ako naminyo, ug kana nga mensahe nagtubo ang pag-apekto kanako sa negatibo nga paagi tungod kay gibati nako nga ako dili makatuman sa responsibilidad sa pagbaton og mga anak. Sa dihang ang akong bana ug ako mikonsulta og mga doktor, sila dili makakita og bisan unsa nga hinungdan nga dili makaanak. Kini ingon og dili makiangayon. Nahibulong ako ngano ang Dios nakahimo niini ngari kanako. Wala kaayo nako mahibaloi, nagkausab ang akong kasingkasing. Kanunay akong sobra kaayo ka nakatutok sa kalampusan, apan karon, sa unang higayon sa akong kinabuhi, ang akong kasingkasing gusto og usa ka bata labaw pa kay sa bisan unsa.
Samtang nagdagan ang panahon, gibati nako nga kanunay gikalimtan, walay paglaum, nag-inusara … gibiyaan sa Dios. Nagpakaaron-ingnon ako nga malipayon, apan walay usa nga nakasabut unsa gayud ang gisinati sa akong bana ug kanako. Usa ka adlaw, nakigsulti ako ngadto sa apohan nga babaye sa akong bana, kinsa maalamon ug espiritwal kaayo. Samtang ako mipakigbahin sa akong mga pagbati ngadto kaniya, siya miingon, “Kahibalo ka, adunay daghang mga paagi nga mahimong usa ka inahan.” Gibati nako nga ang iyang mga pulong mituhop sa kinahiladman sa akong kasingkasing. Dili ako angay. Ako nasayud nga kini tubag gikan sa Langitnong Amahan. Ako nagtuo lamang diha sa pagbaton og mga anak pinaagi sa akong kaugalingon nga lawas. Usa ka gamay nga paglaum mitungha samtang among gihunahuna ang ubang mga kapilian. Nahimo kaming sinagop nga mga ginikanan.
Nag-ila sa Gahum sa Ginoo diha sa Akong Kinabuhi
Sa wala madugay ang among unang anak nga sinagop, si Benjamin, miabut ngari kanamo. Ang akong pagbati kaniya naghingapin, apan gibati ko ang dili tataw nga mga pag-aghat nga siya dili mauban kanamo sa hangtud. Napuno ako sa kaguol sa hunahuna kaniya nga mobiya kanamo. Ug ako gusto gyud kaayo og bata nga akong maamumahan. Ang Church Family Services nagtabang og mga magtiayon sa pagsagop nianang higayuna, busa miadto ako sa akong bishop nga makakuha og impormasyon. Sa pagkasunod semana nakadawat ako og tawag gikan sa usa ka social worker kinsa nangita og dapit nga moamuma/mosagop og usa ka bata. Kini musika sa akong mga dunggan. Bisan sa posibilidad nga ang bata adunay mga isyu sa pagpatubo, kami mibati sa gahum sa Ginoo nga naggiya kanamo ug kami dihay hugot nga pagtuo sa pagpadayon. Dili ako mamakak—nahadlok ako. Apan matarung ang gibati, ug ang bata nga si Daniel gidala sa among panimalay nianang gabhiona gayud.
Sulod sa pipila ka mga adlaw nasakit siya og grabe, naospital, ug gihatagan og 50 porsyento nga kalagmitang mabuhi. Milingkod ako kilid sa iyang kuna sulod sa 11 ka mga adlaw gibanos-banos ang pag-ampo ug paghilak nga mamaayo siya. Wala gayud ako bisan kausa mibiya sa ospital. Sa dihang ang tinuod nga mga ginikanan ni Daniel mianha sa pagduaw kaniya (ang pagsagop wala pa matapos), anaa ako, hitsura sa usa ka hingpit nga kapakyasan! Apan sila ingon og walay labut ug wala magpakita og bisan unsa nga pagbati sa dihang nakita nila siya.
Kini usa ka dakong “kalit” nga pag-alinggat alang kanako. Ako nakaamgo dayon nga ako gayud ang inahan ni Daniel! Kini dili igsapayan nga ako wala manganak kaniya—gituyo siya nga maako. Daghan kaayo ako og nakat-unan mahitungod sa pagka-inahan niadtong 11 ka mga adlaw. Akong buhaton ang bisan unsa nga butang alang kaniya.
Ang kinabuhi ni Daniel naluwas. Si Benjamin mibalik ngadto sa iyang tinuod nga pamilya. Apan ang Ginoo mipabilin diha sa among kiliran. Sukad niana, kami misagop pa og unom ka mga bata ug sa milagroso nga paagi nakabaton og duha nga among kaugalingon. Makasinggit ako gikan sa ibabaw sa mga atop mahitungod sa mga milagro nga akong nasaksihan sa akong kinabuhi. Ako adunay ingon nga pagpamatuod sa mga saad sa Langitnong Amahan ngari kanato nga kita makaangkon sa mga panalangin nga atong gitinguha, gani sa paagi nga kita sa una wala magdahum o kon kita nagdahum niini (tan-awa sa 2 Nephi 10:17; Alma 37: 17).
Kitang Tanan Adunay usa ka Dapit diha sa Iyang Plano
Ang pagkaanaay siyam ka mga anak malisud usahay. Kini walay hunong nga paglaba ug pangutaw, kini lainlaing mga personalidad, ug ang matag bata adunay lahi nga mga isyu. Apan ako nasayud nga tanan sila mga pinadala sa langit. Sa pagkatinuod, kini sama og ang akong pangandoy nga maghimo og kalainan ug manag-iya og akong kaugalingon nga balay sa mga ilo natinuod gayud!
Ang akong pagsulay nga dili makaanak migiya kanako ngadto sa akong labing dako nga mga panalangin. Akong gibati nga kinahanglan gayud ako sa tinuoray magpaubos aron ako makatugyan ngadto sa kabubut-on sa Dios kay sa akong kaugalingon nga kabubut-on. Akong gisinati kanang “dakong kausaban sa kasingkasing” (tan-awa sa Alma 5:13). Ug pinaagi niini nga matang sa pagtugyan, Siya naggiya kanako. Siya nagpanalangin kanako og mga damgo, mga panan-awon, ug mga milagro nga naggiya kanako ngadto sa matag bata. Kanunay Siya adunay plano alang kanako! Bisan sa dihang mibati ako nga nakalimtan, anaa Siya.
Ang pagkadili makaanak mahimong labing makaguol ug mingaw. Ako naghunahuna niadtong mga adlaw nga kini malisud nga moadto sa simbahan nga walay mga anak—sa dihang ang pamahayag sa pamilya naghupot og hapdos nga samad. Wala ako makakita kaniadto unsay akong nakita karon. Ang mahigugmaong mga pulong diha sa pamahayag sa kanunay nagsilbi kanako. Bisan pa sa atong mga kahimtang, matag usa kanato adunay usa ka dapit diha sa mahangturong plano sa Langitnong Amahan.