O Le Upu Mulimuli
O a Mea o le a E Maua i le Tusi a Mamona?
Saunia e Elder Gary E. Stevenson
O Le Korama a Aposetolo e Toasefululua
Mai se lauga o le konafesi aoao o Oketopa 2016.
Ao outou maua le taimi ma se nofoaga filemu e faitau ai le Tusi a Mamona, ua ou vaaia ua outou mauaina ni tali, lagonaina le taitaiga, ma le mauaina o lau lava ia molimau o le Tusi a Mamona ma se molimau ia Iesu Keriso.
Ao e faitauina, o le a e saili i fuaitau o lenei tusi taua ma fetaiai ai ma lou Faaola pele, le Alii o Iesu Keriso, e toetoe lava o itulau uma. O le faaaogaina o nisi ituaiga o suafa mo Lona suafa pe tusa o se averesi o le faatasi i fuaiupu uma e 1.7.1 E oo foi lava i le Keriso Lava Ia na molimau mai i lona moni a’ia’i i nei aso e gata ai, e faapea, “E pei ona soifua lo outou Alii ma lo outou Atua, ua moni ia” (Mataupu Faavae ma Feagaiga 17:6).
Ou te faafetai lava i le valaaulia ma le folafolaga ua ofo mai e le Alii e ala mai i le perofeta o Moronae ia te outou taitoatasi—ma i tagata uma e faitauina le Tusi a Mamona: “Ma pe a outou maua nei mea, ou te apoapoai atu ia te outou ia outou ole atu i le Atua, le Tamā Faavavau, i le suafa o Iesu Keriso, pe ua le moni ea nei mea; ma afai tou ole atu ma le loto faamaoni, ma le manatu moni i ai, ma le faatuatua ia Keriso, o le a ia faaali mai le moni o ia mea ia te outou, i le mana o le Agaga Paia.” (Moronae 10:4; tagai foi fuaiupu 3, 5).
O upumoni o le a e maua i le Tusi a Mamona o le a siitia ma uunaia oe. O le a faamalosia ai lou faatuatua, faatumulia ai lou agaga i le malamalama, ma saunia ai oe mo se lumanai e te le o mauaina atoa le tomai e malamalama i ai.
I totonu o itulau o le tusi, o le a e iloaina ai le alofa lemafuatia ma le alofatunoa le mafaamatalaina o le Atua. A o e tauivi e mulimuli i aoaoga e te mauaina iina, o le a faalauteleina lou olioli, o le a faateleina lou malamalama, ma o tali o loo e sailia i le tele o luitau o le olaga faaletino o le a tatala atu ia te oe. A o e vaai atu i le tusi, e te vaai atu i le Alii.