O Se Folafolaga i se Tamaitiiti
Lluvia Paredes Cabrera
Yucatán, Mekisiko
Ata na tusia e Pascal Campion
I ni nai tausaga talu ai, sa ou matuai lotovaivai ai lava. Na pau le mea na ou maua ai sina uunaiga itiiti o lau uo sili ma lana fanau. Matou te o mo ni savalivaliga i faaiuga o vaiaso, lea na ou olioli ai. I le aluga o taimi sa amata ona faaitiitia lo matou o i savalivaliga. Sa amata ona ou misia lau uo ma lona aiga. Na ou iloaina mulimuli ane faapea o a matou savalivaliga na amata ona faaitiitia ona o lau uo ma lona aiga ua toe amataina se masani sa latou taofia i le tele o tausaga talu ai—auai i le lotu.
I se tasi aso na latou valaaulia ai au i le aiga o le aoauli. O le toe vaai ia i latou na ou lagona ai le fiafia tele. Na ou tau atu ia i latou le tele o lou misia o i latou. Na fautua mai le tama teine e ono-tausaga a lau uo e mafai ona matou foia lena faafitauli e ala i le o faatasi i le lotu. O lea, e aunoa ma le toe mafaufau, na ia valaaulia ai au e sau.
Auoi, leai! E faapefea ona ou faia lenei aiga ia malamalama o le alu i le lotu na sao mo i latou ae matuai le manaia lava mo au? Ua tele tausaga ou te le o toe alu i le lotu, ae e faapefea ona ou fai atu leai i se tamaitiiti? Na ou fai atu o le a ou alu, ae o le mea moni lava ou te lei mafaufau lava e tausia lena folafolaga.
I lena Aso Sa, sa ou alu ai e inuti i le taeao ma lou tama. Na faaauau ona tatagi lau telefoni feaveai, na faamanatu mai ai ia te au sa ou folafola atu i se teineitiiti laitiiti o le a ou alu i le lotu faatasi ma ia. Sa ou le amanaiaina lau telefoni feaveai seia oo ina fesili mai lou tama ia te au pe aisea ou te le taliina ai. Sa ou tau atu sa valaaulia au e alu i se sauniga lotu ae ou te lei manao e alu. Na ia ataata ma fai mai, “Lluvia, aua lava e te faia se folafolaga i se tamaitiiti pe afai e te le naunau e faataunuu.” Na ou filifili e tausia lau folafolaga.
Ina ua ou taunuu atu i le lotu, na ou lagonaina se mea e ese, se mea e le mafai ona ou faamatalaina. Ou te le mafai lava ona faamatalaina pe na faapefea ona tupu, ae o le aso Sa na sosoo ai, na ou toe i ai foi iina, ma le isi aso ma le isi aso, seia oo lava ina ou malamalama i le mea na ou lagonaina: o le Agaga Paia.
Na amata ona faia e tagata o le Ekalesia au e pei o loo ou i ai i le aiga. E aunoa ma se masalosalo, sa ou fia iloa e uiga i le Ekalesia. Sa amata ona matou feiloai ma faifeautalai, ma sa amata foi ona ou maua se molimau. Na amata ona faifai soo asiasiga a faifeautalai, ma na faatupuina lou malamalama i le talalelei seia oo ina ou lagonaina se manao malosi ia papatisoina. Na papatisoina au i se taimi vave lava mulimuli ane, ma o lenei ua ou olioli i faamanuiaga o le talalelei. Ona o lenei mea, ou te matuai faafetai lava na ou tausia lau folafolaga i se teineitiiti e ono-tausaga le matua.