Ua Na’o Tusiga Faatekinolosi: Talavou Matutua
Mauaina o le Olioli e ala ia Keriso e Ui ina Foi Vave Mai i le Fale mai La‘u Misiona
Ina ua ou toe foi vave mai i le fale mai la’u misiona, sa ou manatu o le a ou le toe maua lava le olioli. Peitai na ou mauaina. E mafai foi ona e mauaina.
E alala le tusitala i Iuta, ISA.
O le alu i se misiona e faigata. Ae peitai, o le toe foi mai i le fale mai se misiona e faigata foi, aemaise pe a e vave foi mai i le fale nai lo le taimi na fuafuaina. E te popole e uiga i tala o le a fai mai e isi po o a latou amio i le siomia ai o oe. Pe o le a latou faamasinosino? Faanoanoa? Faigata? E te popole o le a e lagona e pei sa le lava lou lelei pe lava le malosi. E te mafaufau pe i ai se mea o sese ia te oe pe sa sese lau filifiliga i le alu i le taimi muamua. Ou te popole i nei mea uma.
Ina ua ou filifili e auauna atu i se misiona, sa ou matuai fiafia. Sa ou iloa o le mea lea na finagalo le Alii ou te faia. O nai masina na sosoo ai sa avea o ni [masina] sili ona fiafia i lo’u olaga, ma ina ua uma ona maua se aafiaga maoae i le nofoaga autu mo le aoaoina o faifeautalai, sa ou mafaufau o le vaega atoa o la’u misiona i Atenitina o le a lelei foi. E lei tupu.
Sa ou tauivi ma le popole, fefe, ma le leai o se faamoemoe i la’u misiona—o mea ou te lei oo i ai muamua, pe i sina vaega sa ou oo i ai i lena taimi. Sa taumafai la’u peresitene o le misiona i mea uma e fesoasoani ai ia te a’u. I le iuga lava, sa ou filifili ou te alu i le fale. Sa faigofie lena filifiliga i lena taimi, ae i le toe foi mai i le fale, sa amata ona faamalumalu mai na fesili i o’u luga.
Sa ou iloaina i le aluga o taimi, e aumaia e le Faaola le faamalologa ma le vaaiga pe a e sailia uma ma le faamaoni. Ou te matua talitonu o loo i ai se lesona e aoaoina i aafiaga uma o le olaga, pe e lelei pe leaga. Ma i le taimi o le Alii, na Ia aoao mai ia te a’u ni lesona taua lea ou te faapelepele i ai i le taimi nei.
O le alu i se misiona sa avea ma se mea sa’o mo a’u. Ae po o le a lava le mafuaaga, sa lei faamoemoe ona nofo mo le 18 masina. E i ai se isi fuafuaga a le Atua mo a’u. Ou te le o iloa atoa lava le mea o agai i ai lo’u olaga, ae ua lelei lena mea ia te a’u. O le mea ua ou iloa o loo ou faia le mea ua finagalo o Ia mo a’u ou te faia i le taimi nei. I le aluga o lo’u fa masina i Atenitina, na faalolotoina la’u molimau ma lo’u liua. Sa ou feiloai i ni tagata maoae, ma masalo na ou pa’i atu i olaga ia na finagalo o Ia ou te pa’i i ai. Ou te le o toe salamo i lo’u aafiaga pe moomoo maimau pe ana faapea na ese. O le mea tonu lava lea na ou manaomia ma ua paia ia te a’u.
Sa ou faitau lata mai nei i se saunoaga a Elder Neal A. Maxwell (1926–2004) o le Korama a Aposetolo e Toasefululua lea na fesoasoani ia ou malamalama i lo’u aafiaga. Sa Ia saunoa mai:
“O le olaga o se tagata . . . e le mafai ona tumu i le faatuatua ma aunoa ma faafitauli. . . .
“O lea, e faapefea ona tatou ola i le soifuaga e pei ua tatou faapea atu, ‘Le Alii e, tuu mai ia te au le poto masani, ae le o le faanoanoa, le o le tiga, le o le aoaoiga, le o le mafatia, le o le faigata, le o le faalata, aemaise lava ia le tuulafoaiina. Ave ese atu mai ia te au, le Alii e, mea uma na E maua ai le tulaga ua E mauaina! A e tau ina ou alu atu ma mau faatasi ma Oe, ma maua Lou fiafia atoa!’” (Ne’i Faavaivai o Outou Loto ma Le Lavatia,” Liahona, Iulai 1991, 90).
E lei avea le Faaola ma tagata e i ai o Ia e ui i tofotofoga na feagai ma Ia. Na avea o Ia ma tagata o i ai o Ia ona o na tofotofoga. Na latou fesoasoani e mamanu Lona uiga atoatoa, ma na latou avatu ia te Ia le gafatia e lagona ai le olioli ua Ia lagonaina i le taimi nei. Ou te lagona le faamanuiaina i le mauaina o se aafiaga na mamanuina ai le amio. E le o se mea na ou talosagaina, e mautinoa lava e le o se mea na ou manao i ai, peitai e silafia e le Atua lo’u gafatia, ma e finagalo o Ia ia ou faasoaina atu Lona fiafia. O lena olioli o se mea e le mafai ona ou malamalama i ai e aunoa ma le iloaina foi o le faavauvau, faanoanoa, tiga, ma le tetee. O le vave foi mai i le fale o se tasi o mea sili ona faigata ua ou tofo i ai, ae o le vaaiga ma le fesoasoani a le Faaola, ua foliga mai i le taimi nei e pei o se tamai tau lea na totogi mo mea na ou mauaina mai ai.
Ia faatuatua la. Faalagolago atu i lou Faaola. Ma ia tumu i le faamoemoe! E le ogatusa lava le olaga ma le auala na e fuafua ai. O le a le saoloto mai le tiga po o le atuatuvale. Ae o le olioli o loo faatalitali mai ia te oe pe a mavae vanu uma o le ata. O le olioli o le mea lena Na te faamoemoe mai mo oe i taimi uma.