Suesue, Faitau, Iloilo, Tatalo. Toe Fai.
E alala le tusitala i Cautín Province, Chile.
A aunoa ma se sikolasipi, e le mafai ona ou gafatia le kolisi.
Ata na tusia e Adam Howling
I Chile, ina ia alu i kolisi, e tatau ona e faia se suega ulufale i se iunivesite. Na ou manao e aoga faaenisinia i se iunivesite lea na mamao mai le mea ou te nofo ai. O le a taugata tele, o lau sini la o le mauaina o ni togi e sili ona maualuluga e mafaia i le suega ulufale ina ia ou maua ai se sikolasipi mo togi o le suega e sili ona maualuluga.
Na ou iloaina po o fea ma o le a le mea ou te fia aoaoina, ma na ou iloaina le mea e tatau ona ou faia ia tupu ai lena mea. Na amata ona ou sauni mo le suega. Na ou suesue, faitau, ma iloilo meaaoga, ae i suega faatino, ou te lei mauaina lava togi na ou manaomia. Na ou liliu atu i lou Tama Faalelagi i le tatalo ma ole atu ia te Ia mo le poto sili atu ma ia faateleina lou malamalama ina ia mafai ona ou ausia lau sini. Sa ou tatalo mo lenei mea mo se tausaga atoa lava. Na ou alu i vasega sauniuni faapitoa i lau aoga, ma na ou lesitala i vasega i se inisitituti lea na agai atu i le saunia mo le suega.
Sa ou faaauau le suesueina o tusitusiga paia i aso taitasi, ma sa ou le misia se aso o le seminare. Na ou faataunuuina ou tofiga uma i le Perisitua Arona ma e le faia lava ni meaaoga i aso Sa, e tusa lava pe o le a le faigata o le tulaga. Na ou iloaina o le aso Sa o le aso o le Alii, ma na ou manao e faaaloalo i ai e pei ona aoaoina ai au e ou matua. Na ou iloaina e le mafai ona ou misia e au lava ia faamanuiaga a le Tama Faalelagi mo au, aemaise lava pe a sili ona ou manaomia. E ui lava i nei mea uma, ou te lei mauaina togi na ou manaomia i au suega faatino.
Na matou tatalo ma anapopogi ma lou aiga, ma na tuuina mai e lou tama ia te au se faamanuiaga. Faatasi ai ma nei sauniuniga faaleagaga ma isi sauniuniga, na ou faia ai le suega. E le gata ina iu ina ou maua togi na ou manaomia, ae na sili atu i lau sini, ma maua ai pasene na sili ona maualuga e mafaia i le vaega o le matematika. Na ou mauaina sikolasipi ma faamanuiaga na ou manaomia, ma na mafai ona ou aoga i le iunivesite na ou filifilia.
Mai lava i le taimi ao ou laitiiti, na ou aoaoina faapea afai ou te faia mea uma ou te mafaia ma faamuamua ou tiute faaleagaga, ona faamanuia mai lea o au e le Tama Faalelagi. Atonu e le tupu mai mea uma e pei ona tatou mananao ai, ae o le a tausia i tatou e le Atua. Ou te iloa ua na o Lana fesoasoani lava e mafai ai mea uma.