Tatalo ma Filip
E alala le tusitala i Kalefonia, ISA.
O le a le uiga o le “fai le faafetai”?
“Tatalo e le aunoa” (Mataupu Faavae ma Feagaiga 19:38).
O le taimi muamua lea o Josef i le fale o Filip. Sa la maua se taimi sili i le fausia o se vaalele pepa malo. Na mafai foi ona la valivaliina ni aloiafi ofoofogia i ona luga. Ina ua valaau mai le tina o Filip ia i laua mo le aiga o le afiafi, na mulimuli atu Josef ia Filip i totonu o le umukuka.
“O le a ou faia le faafetai,” na fai atu ai le tama o Filip.
O le a le uiga o lena mea? Na mafaufau ai Josef. Na ia vaavaai atu ia Filip ma lona aiga ao latou pai atu i o latou muaulu, sosoo ma le ogatotonu o o latou fatafata, sosoo ma le itu agavale, ma le itu taumatau. E lei vaai muamua lava Josef i se tasi o faia lea mea.
Na tuu atu le lima o Filip ia te ia. Na autilo solo Josef ma iloa ai le isi vaega o le aiga o Filip o loo uu lima ma punonou o latou ulu. Pe o latou saunia e tatalo? Pe o le uiga ea lena o le “fai le faafetai”? na mafaufau ai Josef.
E lei manao Josef e faatiga i lagona o Filip, o lea na ia uu ai le lima o Filip. Na uu e le tama o Filip le isi lima o Josef ona amata lea ona tatalo.
“Faamanuia i matou, Le Alii e …”
Ae latou te lei nonofo i lalo, na pai atu lima o Filip ma lona aiga i o latou muaulu ma fatafata e pei ona latou faia muamua.
Ina ua taunuu Josef i le fale, na fesili atu Tina e uiga i lona aso.
“Na e maua se aso fiafia”? O le fesili lea a Tina.
“Ioe,” na tali lemu atu ai Josef. Sa ia maua se taimi fiafia. Na manaia le vaalele, ma na seki a hamupeka [hamburgers]. Ae e i ai se mea na ia popole ai.
Na tilotilo faalatalata atu Tina ia te ia. “E te le o Seki mai. E i ai se mea o faaletonu?”
“Ia …”
Sa anoanoai fesili a Josef! Sa ia mafaufau pea i lena tatalo. Aisea na ese ai mai le ala e tatalo ai o ia ma lona aiga?
“Tina,” na ia fesili atu ai, “na faapefea ona e tatalo ae e te lei auai i le Ekalesia?” Na tau atu e Josef ia te ia e uiga i le tatalo a le aiga o Filip.
“E foliga mai o i latou o ni Katoliko, e pei ona sa ou i ai muamua,” o le tala lea a Tina. “Sa latou faia le faailoga o le satauro i o latou lima. O e vaai i le ala e foliga mai ai o se satauro? O se faamanatu o Iesu na maliu mo i tatou.”
Na ataata Josef. “E talitonu foi la Filip ia Iesu?”
“E sao lena,” na fai mai ai Tina. “E te manatua le mea na tau atu e le tama o Filip i le tatalo?”
Sa tatau ona mafaufau Filip i lena mea. “Na ia faafeai i le Atua mo meaalofa ua Ia tuuina mai ia i tatou … ma na ia talanoa e uiga ia Keriso!”
“Vaai la?” Sa fai atu ai Tina ma se ataata. “E le matuai eseese lava i tatou. Ua ou fiafia na mafai ona e tatalo faatasi ma le aiga o Filip.”
I ni nai aso mulimuli ane sa sau ai Filip e taaalo. Na la taaalo i fafo ina ua valaau mai Tama ia i laua e o mai mo le aiga o le afiafi. Na gogolo le manava o Josef ao la tamomoe atu i le umukuka.
“Ua ou mole a!” na fai atu ai Josef.
“E faapena foi au,” le tala a Filip.
Na tofu le tagata ma le nofoaga faataamilo i le laulau. Na nofo Filip e sosoo ma Josef. Na fai e Filip le faailoga o le satauro ma tuu atu lona lima ia Josef.
“O le ala lea matou te tatalo ai i lo matou fale,” na fai atu ai Josef. “Matou te piilima, moeiini o matou mata, punonou o matou ulu, ma tatalo.”
“E faapena?”
“E faapena.”
“Faigofie,” na fai atu ai Filip.
Na moeiini mata o Josef ma ataata. Na fiafia o ia na mafai ona ia tatalo ma lana uo.
E i ai au uo i le aoga e Katoliko ma Musalemi, ma o i matou uma lava o ni uo lelei ona o le ala lena e finagalo Iesu ia i tatou ia faia ai le tasi ma le isi.
Elizabeth A., 8 tausaga, West Midlands, Egelani