Batan-ong mga Hamtong [Young Adults]
Naghulat diha sa mga Stoplight sa Kinabuhi
Ang tagsulat nagpuyo sa Texas, USA.
Ang sagunson nga pagkakuha sa gisabak mora og nagsunod nga mga stoplight sa akong kinabuhi, apan samtang midangup ako sa Ginoo, akong nakaplagan nga ang matag pagkawala giubanan og kalinaw, panglantaw, ug paglambo.
Ang akong mga tudlo hugot nga mikupot sa manubila samtang mabalak-on ko nga mitutok sa pulang suga sa trapiko. Sa dihang sa katapusan nausab na kini ngadto sa berde, paspas akong mipadayon apan mihunong na usab sa lain nga daw walay katapusang stoplight. Mga 10 minutos pa una ko maabut sa leksyon uban sa mga sister missionary nga sugdan na unta 5 minutos na ang milabay. Kon mas maalamon pa ko nga inahan, nakatag-an unta ko sa15 minutos nga saput sa akong hapit na tres anyos nga anak nga babaye sa dihang migawas kami sa pultahan, apan wala. Oo, ang kalibutan magpadayon gihapon kon maulahi ko, apan tungod kay naningkamot ko nga mobuhat og maayo, dili ba ako angayan sa labing minos pipila ka mga suga sa trapiko nga mopabor kanako? Samtang wala koy pasensya nga naghulat sa laing stoplight, mabati nako ang akong kasagmuyo nga nagpadulong na sa kasuko. “Naningkamot ko nga mobuhat og maayo; naningkamot sa akong labing maayo! Asa man ang tabang nga akong gikinahanglan?”
Baynte ka bulan ang milabay, nakaplagan nako ang akong kaugalingon nga nangutana og susama nga pangutana sa susama nga sitwasyon, gani lang sa usa ka dapit nga malinawon ug mahilum nga wala sa akong sitwasyon sa stoplight.
Sa Sagradong Kakahoyan, sa Palmyra, New York, ang mga dahon bag-o lang nanubo sa tabunon nga mga sanga nga naglibut kanako. Ang bag-ong naberde nga katanuman nga nagkatag sa yuta daw mitayhop og kinabuhi sa kahanginan. Ang kasikas lamang nga namugna sa hinay nga huyuhoy, ang among stroller, ug ang akong mga tunob ang akong nadunggan—walay mga sakyanan, walay mga dalan, walay kusog nga pag-istoryahanay. Apan bisan pa sa kahilum, ang akong hunahuna napuno sa mga pangutana ug kawalay kasigurohan. Ang akong bana, si Lance, ug ako nagpaabut og 72 ka lisud nga mga oras aron manawag ang akong doktor uban sa resulta sa dinaliang ultrasound ug pag-eksamin sa dugo. Desperado ko alang sa mga tubag ug kahupayan.
Pagdawat og Kahupayan
“Ang Ginoo miduaw kanila uban sa iyang Espiritu, ug miingon ngadto kanila: Magmahupayon. Ug sila nahupay” (Alma 17:10).
Nakaplagan nako ang akong kaugalingon nga nakatutok sa mga bulak nga nakalahutay sa tingtugnaw diha sa gawas sa Palmyra New York Temple. Ang akong hunahuna hingpit nga mihulma sa mga pangutana nga naghasol niini: “Kon mawala kanako kining akong gimabdos, ngano man? Unsay sunod?” Sama sa hinay nga huyuhoy sa tingpamulak sa akong palibut, gipamulong sa Ginoo sa akong hunahuna ang kahupayan nga akong gipangandoy. Wala na ko magkinahanglan sa doktor nga mopahibalo kanako; nasayud ko nga mawad-an ako niining akong gimabdos, apan kalit nakong nasabtan nga kining gamay nga kalag anaa sa perpekto, mahigugmaong mga kamot sa Langitnong Amahan. Diha-diha dayon, ang kawalay paglaum nga mipuno kanako gipulihan og makahupay nga kalinaw nga mitabang nako sa misunod nga mga semana ug mga bulan.
Naghulat sa Berdeng Suga
“Mapasalamaton ko sa daghang paagi nga giduaw ko sa Ginoo uban sa Maghuhupay dihang nagkinahanglan ko og kahupayan. Apan ang Amahan sa Langit wala lang maghunahuna sa atong kahupayan apan mas labaw pang naghunahuna sa atong paglambo.”1 —Presidente Henry B. Eyring
Pipila ka adlaw human sa pagbisita sa Palmyra, nasinati nako ang makapahugno nga pagkakuha sa gisabak. Bisan og ang pagbati sa kalinaw mipadayon sa pagtabang kanako, naluya ako sa pisikal ug emosyonal tungod sa pagkawala sa gisabak ug dili andam sa mga paghulat nga misunod. Una nakong gihulat ang mga resulta sa laboratoryo, nga nagpakita og talagsaon nga partial moral pregnancy [komplikasyon sa pagsabak]. Dayon naghulat ko sa mga pag-eksamin sa dugo matag semana, matag duha ka semana, ug sa katapusan matag bulan aron sa pagsiguro nga walay mga timailhan sa posible nga pagsangpot ngadto sa kanser. Bisan sa taas nga mga bulan sa paghulat, dali namong nakita ni Lance ang impluwensya sa Ginoo nga naghupay ug nagpaniguro kanamo niana nga panahon. Ang partial moral pregnancy walay malungtarong mga epekto, ug human lamang sa unom ka bulan ang akong doktor miingon nga mahimo na usab kaming mosulay nga makaanak. Nahibalik ako sa dalan sa pag-uswag diha sa akong kinabuhi; ang kahayag sa katapusan nausab gikan sa pula ngadto sa berde.
Apan wala lang kaabut og tulo ka bulan ug paglabay sa pipila ka mga pag-eksamin sa dugo, nakuhaan na usab ako sa akong gisabak—niining panahuna usa lang ka semana sa dili pa ang Pasko. Milabay ang laing tulo ka bulan ug misaka ang akong paglaum human sa laing positibo nga pregnancy test [pagsusi kon mabdos ba o dili]—apan lain na usab nga stoplight.
Pagsulay sa Pagtuo
“Bisan kon kita adunay lig-on nga pagtuo, daghang mga kalisdanan ang dili tangtangon. … Kon ang tanang oposisyon gipugngan, kon ang tanang balatian gikuha, niana ang unang mga katuyoan sa plano sa Amahan mapakyas.”2 —Elder David A. Bednar
Namabdos ako pag-usab, ug ang sunod nga petsa nga gipangagpas nga manganak ko duol sa mosunod nga Pasko. Maayo ang akong gibati niini nga pagmabdos. Among nakita ang pinitik sa kasingkasing pinaagi sa nag-una nga ultrasound ug nasayud nga ang mga sakop sa pamilya nag-ampo alang kanamo. Samtang naglingkod kami sa usa ka sesyon sa pagtuga [endowment] sa templo usa ka adlaw, aduna akoy nagsunod nga mga hunahuna: “Kon mawad-an ako niining akong gimabdos, magpabilin bang lig-on ang akong pagtuo? Siyempre magpabilin kini. Apan siyempre dili na ko makuhaan pag-usab sa gisabak tungod kay niining panahuna andam akong modawat sa kabubut-on sa Ginoo bisan unsa pa ang mahitabo.”
Bisan pa sa akong positibo nga kinaiya, paglabay sa pipila ka semana akong nakita ang mga timailhan, ug misugod sa sakit nga proseso nga akong gibati nga pamilyar na kaayo. Wala magpabiling lig-on ang akong pagtuo sama sa akong gidahum. Ang mga tubag nga nakatabang kanako sa milabay nga mga pagkakuha sa gisabak daw dili na karon igo. Mibati ko og depresyon. Mibati ko nga masulub-on, haw-ang, ug gani medyo nabudhian. Ang akong bana ug ako dili lamang ang mga tawo nga naghulat sa Ginoo; ang among anak nga babaye kanunayng misulti kanamo kon unsa ka gusto niya nga adunay manghud nga lalaki o babaye. Ang among mga kasingkasing nasakitan usab para kaniya. Samtang akong gitugyan ang akong huyang nga mga pagbati ngadto sa Ginoo diha sa mainiton nga pag-ampo, nakadawat na usab ako og klaro nga saksi nga ang Langitnong Amahan nahibalo gayud sa akong kasakit ug mga kahimtang ug nga Siya nahigugma kanako. Bisan tuod ang akong mga kahimtang nagpabilin nga mao ra gihapon, kining tam-is ug yano nga kasinatian milagrusong mipagaan sa palas-anon nga akong gibati ug mihatag kanako sa abilidad nga makasagubang ug gani mobati og kalipay samtang mipadayon ko sa akong inadlaw-adlaw nga pagpakabuhi. Bisan unsa pa ang umaabut, ma-OK ra ko.
Sa dihang ang genetic testing mibalik paglabay sa pipila ka bulan nga walay mga tubag, naglibog na usab kami mahitungod sa katuyoan niini nga mga kapakyasan sa among kinabuhi. Naningkamot ko nga ihiklin ang akong kaugalingong mga tinguha ug ipahiangay ang akong kabubut-on sa kabubut-on sa Ginoo, apan sa lisud nga mga higayon ang kasingkasing makatuaw, “Unsay angay nakong makat-unan gikan niini? Naningkamot ko nga mobuhat og maayo! Asa man ang tabang nga akong gikinahanglan?”
Pag-usab sa Akong Reaksyon
“Ang kalisud anaa kanunay! Kitang tanan adunay mga hagit. Ang kalainan mao ang atong reaksyon sa kalisud.”3 —Elder Stanley G. Ellis
Walo ka bulan human sa akong ikaupat nga pagkakuha sa gisabak ug pipila lang ka semana human sa akong makaluya nga biyahe aron makighimamat sa mga sister missionary, malinawon akong nagpaabut sa stoplight sa akong pagpauli sa dihang miabut ang akong mga tubag. Samtang nagtan-aw ko sa mga sakyanan nga naghunong tupad kanako ug sa mga sakyanan nga nag-una kanako, nakaangkon ko og mahangturong panglantaw sa akong kinabuhi. Kalit nakong naamguhan nga ang labing importante sa akong panaw mao nga magpabilin ko sa dalan nga modala kanako balik ngadto sa akong langitnong panimalay. Unsa ka daghan ang mga “stoplight” nga akong hulaton walay epekto sa akong destinasyon. Giunsa nako kini sa pag-atubang mao ang adunay epekto.
Gisugdan nako sa pagmahal ang matag stoplight sa akong kinabuhi, sa pinasumbingay ug literal nga paagi. Imbis sa nausik nga panahon, ang matag usa nahimong oportunidad sa pag-angkon og pailub ug pagkakuha og panglantaw nga moabut lamang pinaagi sa paghulat. Sama nga ang matag pulang suga sa trapiko giparisan og berde nga suga sa laing direksyon, akong nakita nga ang matag stoplight sa akong kinabuhi miabli og oportunidad alang sa paglambo, dili lang gyud sa paagi nga giplanuhan nakong molambo nianang higayuna. Imbis nga maglunang diha sa mga kasagmuyo, misugod ko sa paglipay diha sa oportunidad sa pag-uswag nga gihatag sa matag wala damha nga mga panghitabo.
Pagtutok nganha sa Manluluwas
“Usa ka kritikal nga pangutana nga pamalandongan mao ang ‘Asa man nato ibutang ang atong pagtuo?’ Ang ato bang pagtuo nakatutok lang nga gustong mahupay ang kasakit ug pag-antus, o lig-on kining nakasentro sa Dios Amahan ug sa Iyang balaang plano ug ni Jesus ang Kristo ug sa Iyang Pag-ula?”4 —Elder Donald L. Hallstrom
Duha ka dugay nga mga tuig human sa unang higayon nga nakuhaan ko sa gisabak, nanganak ko og usa ka matahum, himsog nga batang lalaki. Sa panahon paingon nianang malipayon nga adlaw sa among pamilya, nakaamgo ko nga si Jesukristo wala mag-antus alang kanako aron tangtangon ang tanang pag-antus sa akong kinabuhi. Hinoon, Siya nag-antus aron ako malig-on ug motubo gumikan sa mga hagit nga akong giatubang. Bisan tuod ang subo nga mga panahon nga mamatyan ug ang tag-as nga mga bulan sa paghulat sakit gihapong hinumduman, nahimo kining importanting handumanan sa akong kinabuhi. Niadtong sagradong mga higayon, akong nasabtan nga personal nga nahibaloan sa Manluluwas ang indibidwal nako nga mga pag-antus. Gitabangan ko Niya sa paagi nga mahimo lamang sa tawo nga nahibalo sa akong personal nga mga kasubo. Samtang ang oposisyon sa atong kinabuhi kasagaran daw makapakgang sa atong mga plano sa pag-uswag, ang Ginoo migamit niana nga oposisyon aron sa pagduso kanato ngadto sa mas taas nga tumong—sa pagkasayud ug pagpabilin diha sa Iyang gugma.