Ang Simbahan Ania Dinhi
Taxco, Mexico
Kaniadto usa ka lungsod sa minahan, ang Taxco de Alarcon, Guerrero, Mexico, naila karon isip usa sa mga pueblos magicos (madyik nga mga lungsod) sa nasud, nabantug sa pagmugna og mga pilak nga alahas, mga arkitektura panahon sa pagkolonya sa Katsila, ug sa katahum sa nagpalibut nga kabanikahan. Ang siyudad nahimutang sa bungturon nga yuta ug adunay bakilid, dili hapsay nga kadalanan. Ang nag-unang timailhan niini mao ang ika-18 nga siglo nga Santa Prisca nga simbahan.
Ang Taxco mao usab ang nahimutangan sa Taxco Branch sa Ang Simbahan ni Jesukristo sa mga Santos sa Ulahing mga Adlaw, nga magtigum matag Dominggo sa usa ka gambalay [building] sa avenida de los Plateros [dalan sa mga Maninilsil og Plata]. Ang branch, kabahin sa Iguala Mexico Stake, maoy usa sa 1,987 ka mga kongregasyon sa mga Santos sa Ulahing mga Adlaw sa Mexico, diin ang Simbahan adunay sobra sa 1.4 ka milyon ka mga miyembro, 34 ka mga misyon, ug 13 ka mga templo. Ang Mexico nahimutangan usab sa Mexico City Missionary Training Center, ang ikaduha nga labing dako nga MTC sa Simbahan. Ang center mahimong masudlan og sobra sa 1,000 ka mga misyonaryo sa tagsa ka higayon.
-
Ang nag-unang lima ka mga miyembro sa Mexico gibunyagan niadtong 1876.
-
Ang Mexico mao ang unang nasud sa gawas sa Estados Unidos nga nakabaton og 100 ka mga stake.
-
Ang Mexico City Mexico Temple, ang una sa Mexico, gipahinungod niadtong 1983. Ang labing bag-o nga gipahinungod mao ang Tijuana Mexico Temple, gipahinungod niadtong 2015. Ang Puebla Mexico Temple gipahibalo niadtong Oktubre 2018.
-
Sa dihang si Presidente Howard W. Hunter (1907–95) mibisita sa Mexico niadtong 1994, gimugna niya ang Mexico City Contreras Stake, ang ika-2,000 nga stake sa Simbahan.