Mga Pangutana ug mga Tubag
“Unsaon nako pagpugong ang akong mga electronic [gadget] nga makalinga kanako sa simbahan ug sa seminary?”
Dili Makita, Dili Mahunahuna
Bag-o lang ko nga nakabantay sa kahilig nakong mogamit og mga electronic panahon sa mga kalihokan sa simbahan ug sa kabatan-onan. Nahimo na kining kinaiya. Matag higayon nga makita nako ang akong telepono, ako dayon kining kuhaon ug susihon kon duna ba akoy bag-o nga mga pahibalo o mga mensahe sa text. Ang solusyon? Tagoan ang akong telepono aron dili nako makita. Maanaa man kini sa bag, ilawom sa lingkuranan, o gani ngadto sa usa ka higala—kon dili nako makita ang akong telepono, dili ako matintal sa paggamit niini.
Taryn M., edad 15, Florida, USA
Andama ang Imong Device aron Maminosan ang Pagkalinga
Andama ang imong mga device sa samang paagi nga imong andamon ang imong hunahuna ug lawas alang sa Igpapahulay. Ipahilum ang mga pahibalo sa cell phone panahon sa klase. Mahimo nimong ibutang ang Gospel Library app nga malahi sa ubang mga app aron nga kon kinahanglan ka nga mogamit sa mga kasulatan o sa notebook, dili ka malinga niadto nga mga app.
Delguimar S., edad 21, São Paulo, Brazil
Pag-ampo alang sa Panabang
Magtinguha ko sa espiritu pinaagi sa pag-ampo. Makatabang kini kanako nga dili mogamit sa akong mga electronic device sa adlawng Igpapahulay ug panahon sa seminary. Matag higayon nga mag-ampo ko sa Langitnong Amahan ug mobasa sa Basahon ni Mormon, makadawat ko og paagi nga dili mogamit sa akong mga device.
Desire M., edad 18, Comoé District, Ivory Coast
Ayaw Kalimot sa Pisikal nga mga Kopya!
Ang paggamit sa mga electronic alang sa pagtuon sa ebanghelyo maayo ra, apan usahay manghinobra na kini. Aron mapugngan ang imong kaugalingon nga dili malinga, sulayi ang paggamit og pisikal nga mga kopya sa mga kasulatan. Ang Ginoo mogiya kanimo. Mas daghan kaayo ka og makat-unan ug imong mabati ang Espiritu.
Aiyana A., edad 13, Laguna, Philippines
Hipusa Kini
Sa simbahan, akong palungon ang tunog sa telepono ug ibutang kini sa akong bulsa gawas kon gamiton ko kini alang sa mga kasulatan. Panahon sa sakrament, dili gayud ako mogamit niini. Dili nako kini gunitan aron makalikay sa tintasyon nga mogamit niini.
William W., edad 17, Virginia, USA