Mga Leksyon gikan sa Bag-ong Tugon
Marta ug Maria
Bisan unsa pa ang paagi nga atong gipili sa pagserbisyo, importante nga modawat ug mosunod ni Kristo sa tibuok natong kasingkasing ug hunahuna.
Sa panahon nga daghan sa Jerusalem ang mipahayag og kalibug sa pagkatawo sa Manluluwas, si Jesus mitudlo, “Kon tuyuon ni bisan kinsa ang pagbuhat sa kabubut-on sa Dios nan, iyang mahibaloan [ang doktrina]” (Juan 7:17). Kon gusto kita nga mohimo og sobra pa sa yano lang nga pagkat-on sa doktrina ug magkat-on kinsa si Jesukristo ug mahimong Iyang disipulo, kinahanglan natong lihukon ang atong pagtuo. Ang istorya ni Marta ug Maria nagpakita nga adunay sobra sa usa ka paagi sa pagserbisyo sa Manluluwas diha sa atong kaugalingong kinabuhi.
Wala madugay human niini nga wali, si Jesus ug pipila sa Iyang mga disipulo miadto sa panimalay ni Marta sa Betania aron sa pagtudlo sa ebanghelyo. Giangkon ni Marta ang nag-unang responsibilidad sa paglihok isip mabinationg tig-abi-abi, tingali mihatag og pagkaon ug kapasilongan alang sa iyang mga bisita, samtang ang iyang igsoong babaye, si Maria milingkod sa tiilan ni Jesus ug naminaw Kaniya nga namulong. (Tan-awa sa Lucas 10:38–42.) Ang managlahing pamaagi sa managsuon sa pagserbisyo sa Agalon nagtudlo kanato sa pagrespeto ug pagtahud niadtong mipakita og pagkadisipulo sa lain-laing mga paagi. Ang mga pagtulun-an ni Jesus niini nga istorya mipakita usab sa Iyang panglantaw nga ang kababayen-an gawasnon sa pagpili kon unsaon sa pagserbisyo ug unsaon sa pagpakita sa pagkadisipulo, sama nga ang mga lalaki makahimo sa pagpili.
Pagserbisyo pinaagi sa Paghatag
Sa dayon nang pagpaila ni Lucas kang Marta ug Maria, girekord niya ang sambingay sa maayong Samarianhon. Niini nga istorya, ang Manluluwas mitudlo kanato sa pagpakita og kalooy ngadto sa uban, sama sa pagpakaon, pagpasilong, ug pag-amuma ni bisan kinsa nga nanginahanglan (tan-awa sa Lucas 10:30–37). Ang mga paningkamot ni Marta sa “hilabihang pag-amuma” (Lucas 10:40) nagpakita sa iyang pagdawat ug pagsabut niini nga baruganan samtang iyang gilihok ang iyang pagtuo.
Naghulagway sa Iyang pagtulun-an nga siya nga maoy labing mahinungdanon mangalagad sa uban (tan-awa sa Mateo 20:26–28; Lucas 22:26–27), gigahin ni Jesus ang Iyang kinabuhi diha sa pagserbisyo. Mitubag si Marta uban sa iyang tinguha nga moserbisyo Kaniya. Ang istorya ni Marta ug Maria nagpakita og duha ka babaye nga naghulagway sa tinuod nga pagtuo ug pagkadisipulo pinaagi sa pagserbisyo ug pagkat-on. Sama nga si Marta mipakita sa iyang gugma alang kang Kristo pinaagi sa pagserbisyo, makahatag kita og serbisyo ngadto sa naglibut kanato nga nakasentro sa atong gugma alang sa atong Manluluwas ug sa atong kaandam sa pagkat-on ug pagsunod sa Iyang ebanghelyo.
Samtang magserbisyo kita, kinahanglan natong hinumduman nga adunay laing mga paagi sa pagserbisyo ug nga kinahanglang dili kita mohukom niadtong miapil niini. Sa dihang si Marta “nagkalibuglibog” (Lucas 10:40), ang iyang reaksyon misangpot sa panagbingkil ug mihulga sa pakigdait sa pagbisita sa Manluluwas.
Bisan tuod maabi-abihon ug responsable, si Marta nahasol sa daghang mga problema ug nahagu sa iyang pagkapuliki. Mireklamo siya kang Jesus, “Ginoo, wala ba ikaw magkabana nga gipasagdan man lamang niining akong igsoon nga mag-inusara ako sa pag-amuma? busa ingna siya aron motabang kanako” (Lucas 10:40). Ang iyang pagprotesta nagpasabut sa iyang panan-aw nga siya lamang ang nagserbisyo. Wala siya makasabut sa managlahi nga paagi sa pagserbisyo nga gihimo sa uban nianang panahuna, lakip ni Maria ug sa Manluluwas Mismo. Gipakita ni Marta ang baruganan sa paghatag apan uban sa kinaiya nga dili angay sa Espiritu. Sa atong kinabuhi karon, mapakita usab nato ang atong gugma alang sa uban pinaagi sa atong mga lihok ug atong kinaiya.
Serbisyo pinaagi sa Pagdawat
Uban sa tingog sa pasidaan, giila ni Jesus ang mga paningkamot ni Marta sa pagserbisyo ug sa misangpot kaniya nga kasagmuyo: “Marta, Marta, nalibug ug nagkapuliki ikaw sa daghang mga butang” (Lucas 10:41). Ang mga pulong sa Manluluwas dili tuyo nga ipakaminos ang gipili ni Marta nga paagi sa pagpakita sa pagkamaabi-abihon apan aron sa pag-ila sa katungod ni Maria sa pagserbisyo pinaagi sa pagpaminaw ug pagkat-on. Ang mga gibuhat ni Maria nagpakita kanato kon unsa ang gikinahanglan alang sa tanan nga nagtinguha sa pagsunod Kaniya nga wala mag-agad sa ilang gipili nga paagi sa pagserbisyo.
Gitugutan ni Maria ang Manluluwas sa pagserbisyo kaniya pinaagi sa pagdawat sa Iyang pulong. Ang iyang ehemplo nagpakita nga makapakita kita og gugma sa Manluluwas pinaagi sa paglingkod diha sa Iyang tiilan aron makat-on ug molambo diha sa Espiritu.
Usa ka Butang nga Kinahanglanon
Ang tubag sa problema ni Marta mao ang pag-ila nga “usa ra gayud ka butang ang kinahanglanon” (Lucas 10:42). Ang tulukibong gahum sa pagkayano gipatataw, apan ang kayano mahimong lahi og ipasabut sa matag usa kanato. Ang sumbanan sa “kinahanglanon” makaplagan dili diha sa atong mga nabuhat apan diha sa atong mga motibo. Bisan unsa pa ang paagi nga atong gipili sa pagserbisyo, ang importante mao ang pagdawat ug pagsunod ni Kristo sa tibuok natong kasingkasing ug hunahuna.
Mahimo nga ang pagserbisyo sa “paagi ni Marta” tingali mao ang labing maayo alang sa pipila ka mga higayon, samtang ang ubang mga higayon mahimong magsugyot og “tubag ni Maria”—o gani usa nga wala mahaum nianang duha ka mga kategoriya. Atong magamit ang mga ehemplo ni Marta ug Maria sa atong kinabuhi ug mangayo sa giya sa Espiritu aron makaserbisyo sa labing maayong paagi.
Atong tan-awon ang atong mga kinaiya samtang nagserbisyo sa atong gipili nga paagi, maghinumdom nga ang atong kombiksyon nga mosunod Kaniya mao ang labing importante. Hinaut nga makaplagan nato kanunay ang atong kaugalingon diha sa tiilan sa Manluluwas.