Pagtudlo sa mga Tin-edyer ug Mas Gagmay nga mga Bata

Kon ang Usa o Duha ka mga Ginikanan Dili Mosimba

Ni Karmel Newell

Ang tagsulat nagpuyo sa Utah, USA.

boy walking into church alone

Si Presidente Russell M. Nelson nagdako sa mahigugmaong panimalay uban sa mga ginikanan nga iyang gipangga pag-ayo. Apan sa dihang bata pa siya misimba siya nga wala ang iyang inahan o amahan, ug naghandom siya nga masilyo sa iyang pamilya sa templo.¹ Apan walay bata nga kinahanglang maglakaw sa dalan sa pakigsaad nga mag-inusara. Ang gugma ug pag-atiman sa mga sakop sa pamilya ug ward makatabang og suporta sa mga bata nga tingali walay suporta sa ebanghelyo diha sa panimalay. Sa katapusan, ang maayo nga mga pagtulun-an sa ebanghelyo ug maayong mga kasinatian sa panimalay ug sa simbahan makatabang sa matag bata nga mobati sa gugma sa Langitnong Amahan.

Alang sa mga Ginikanan Kinsa Motambong sa Simbahan nga Walay Kuyog nga Kapikas

1. Ipaambit ang mga panalangin sa ebanghelyo. Tabangi ang inyong mga anak nga makakita nga ang pagsunod sa ebanghelyo makahatag og kalinaw—ug makapagaan sa mga palas-anon. Ipasabut nganong mipili kamo sa pag-apil sa Simbahan, nga dili mosulti og ngil-ad sa ginikanan nga mipili nga dili motambong. Ipaambit ang inyong mga pagbati kon sa unsang paagi ang pagtuman sa inyong pakigsaad sa bunyag naghatag kaninyo og kahupayan ug giya.

2. Pag-ugmad og positibo nga kinaiya. Tabangi ang mga bata nga makakita sa kaayo diha sa ilang pamilya. Makatabang usab kamo kanila nga makakita sa kaayo diha sa ilang mga magtutudlo, mga lider, ug mga miyembro sa ward sa Simbahan. Hisguti kon unsay nakat-unan sa inyong mga anak diha sa simbahan. Ayaw tutuki ang mga kahuyang o dili sensitibo nga mga sulti sa uban. Hinoon, pamulong sa positibong paagi ug pagpakita og kaandam sa pagkat-on gikan sa uban.

3. Padayon og trabaho bisan pa sa negatibong mga emosyon. Tabangi ang mga bata sa pagsabut sa negatibong mga emosyon, sama sa kahadlok, kamingaw, kasagmuyo, ug kasuko. Dayon makatabang kamo kanila sa pag-atubang sa ilang mga emosyon pinaagi sa pagdrowing, pagdula, o pakigsulti. Kon gikinahanglan, mahimo usab kamong magtinguha og propesyonal nga tabang. Ang pag-ayo sa samaran nga mga kasingkasing makatabang sa tanan nga mahimong mas mahinangpon sa espirituhanong mga pagbati ug makabaton og mas maayo nga mga kasinatian sa simbahan.

4. Pangayo og tabang kon gikinahanglan. Kon nagkinahanglan kamo og tabang, ayaw paghulat nga dunay motanyag og tabang. Usahay ang mga lider sa Simbahan ug mga miyembro sa ward dili makamatikod sa panginahanglan, o tingali magpanuko sila sa pagtabang kon wala dapita. Kon ang usa ka bata nagkinahanglan og panalangin, ikonsiderar sa mainampoong paagi kon si kinsa ang makatabang, ug dayon hangyoa. Ikonsiderar usab kon si kinsa ang mahimo ninyong tabangan.

Alang sa Tanang Hingkud

1. Timan-i ug higugmaa ang mga bata nga motambong sa simbahan nga wala ang usa o duha ka ginikanan. Ilha ang ilang mga ngalan ug abi-abiha sila uban sa kainit ug kamabination. Pugngi ang paghukom kabahin sa ilang mga kahimtang, ug ayaw pangutana mahitungod sa mga ginikanan nga wala motambong. Samtang ang mga bata mobati og sinserong gugma gikan sa kaubang mga miyembro sa Simbahan, mas dako og kalagmitan nga morelaks sila, makat-on, ug mobati sa Espiritu.

2. Mahimong sensitibo sa espesyal nga mga panginahanglan. Kon ang mga bata motambong sa simbahan nga wala ang usa o duha ka mga ginikanan, hunahunaa kon sa unsang paagi ang piho nga mga pagtulun-an o mga kalihokan mahimong makaapekto kanila. Sa usa ka leksyon mahitungod sa mga panalangin sa pagkapari, itudlo nga ang tanan mahimong makaangkon niini nga mga panalangin. Kon ang usa ka kalihokan maglakip sa mga ginikanan, ilakip ang tanan nga mga ginikanan. Pagmatngon sa mga bata nga tingali adunay sensitibo nga mga pagbati sa espesyal nga mga adlaw sama sa Adlaw sa mga Amahan [Father’s Day] o Adlaw sa mga Inahan [Mother’s Day].

3. Tabangi sila sa paghigugma ug paglig-on sa ilang pamilya. Tudloi ang mga bata nga ang pamilya gi-orden sa Dios.² Awhaga sila nga ikalipay ang kaayo diha sa ilang mga pamilya. Ang buhat sa family history makatabang sa mga bata nga makaamgo nga ang ilang pamilya misugod sa wala pa sila matawo. Ug ang paghimo sa buhat sa family history makapanalangin kanila “sa dugang nga kasuod ug hingpit nga kalipay sa [ilang] pamilya.”³

4. Tudloi sila sa tinuod nga doktrina. Ang kabubut-on maoy usa ka mahinungdanong doktrina diha sa plano sa kaluwasan, ug ang mga anak dili responsable sa mga pagpili ug mga sala sa ilang mga ginikanan (tan-awa sa Moises 6:54). Ang mga problema sa mga ginikanan dili sayop sa ilang mga anak o responsibilidad sa ilang mga anak nga tarungon. Ang pagkasayud niini makatabang sa mga bata nga dili kaayo mabalaka sa mga butang nga dili sila makausab ug magpasalamat sa daghang inadlaw nga mga panalangin sa pamilya.

Si Presidente Henry B. Eyring, Ikaduhang Magtatambag sa Unang Kapangulohan, mitudlo: “Gusto gayud sa atong Langitnong Amahan nga pundukon ug panalanginan ang tanan sa Iyang pamilya. Ang Iyang plano naghatag sa tanan Niyang mga anak sa oportunidad nga modawat o mosalikway sa Iyang pagdapit. Ug ang mga pamilya maoy sentro niini nga plano.”⁴

Mubo nga mga sulat

1. Tan-awa ang Russell M. Nelson,“Pagpadayag alang sa Simbahan, Pagpadayag alang sa Atong mga Kinabuhi,” Liahona, Mayo 2018, 93–96.

2. Tan-awa sa “Ang Pamilya: Usa ka Pamahayag ngadto sa Kalibutan,” Liahona, Mayo 2017, 145.

3. Quentin L. Cook, “Ang Hingpit nga Kalipay sa Buhat sa Family History,” Liahona, Peb. 2016, 27.

4. Henry B. Eyring, “Pagpundok sa Pamilya sa Dios,” Liahona, Mayo 2017, 20–21.

Para sa mga Bata

Anaa sa Higala:

• Ang kasinatian sa pagkabata ni Presidente Nelson: “Mapasalamaton alang sa mga Ginikanan” (Hunyo 2019, pahina H2)

• “Usa ka Bag-ong Kapitulo” (Hunyo 2019, pahina H4)

• “Ang Unang Future Father’s Day ni Steven” (Liahona, Hunyo 2015, pahina 72)

Para sa mga Kabatan-onan

Anaa sa Liahona:

• “Ang Kinabuhi usa ka Marathon” (Abr. 2019, pahina 54)