Balaanong Gitudlo nga Pagkadisipulo
Ni Bishop Dean M. Davies
Unang Magtatambag sa Presiding Bishopric
Gikan sa usa ka pagkigpulong sa debosyonal, “God Will Use You, God Will Bless You [Ang Dios Mogamit Kaninyo, Ang Dios Mopanalangin Kaninyo],” nga gihatag sa Brigham Young University niadtong Nobyembre 3, 2015.
Kon magtinguha kamo nga mahimong tinuod nga mga disipulo sa atong pinalanggang Manluluwas, ang Ginoong Dios sa langit mogiya sa inyong mga dalan.
Mga paghulagway pinaagi ni Kelley Morris
Gusto nakong hisgutan ang duha ka pangutana nga ako mismo gusto og mga tubag sa dihang batan-on pa ko.
Una, kon inyong ipahinungod ang inyong kinabuhi sa pag-alagad sa Dios, mogiya ba Siya sa inyong mga lakang ug mogamit kaninyo alang sa Iyang matarung nga mga katuyoan? Ikaduha, kon mopili kamo sa pagsunod sa Manluluwas ug molakaw diha sa dalan sa pagkadisipulo, ang Ginoo mobantay ba kaninyo, mogiya kaninyo, mopanalangin kaninyo, ug mopuno kaninyo sa diwa sa hingpit nga kalipay ug katumanan samtang mogamit Siya kaninyo alang sa Iyang mga katuyoan?
Minahal kong mga kaigsoonan, kon tinguha ninyong moserbisyo sa Manluluwas ug maningkamot nga molakaw uban sa pagtuo ug kalooy diha sa dalan nga Iyang gisugo, nasayud ko nga ang Ginoo mogamit kaninyo sa mga paagi nga dili ninyo mahanduraw.
“Apan dili ako espesyal,” moingon mo. “Kasarangan ra ko sa tanang paagi. Dili gayud ako utokan, maayong manulti, maayo og sininaan, o gani maayo og linihokan. Unsaon man paggamit sa Dios kanako?”
Sukad sa sinugdanan sa panahon, ang atong Langitnong Amahan nakigsulti niadtong mga kasarangan ug migamit kanila alang sa Iyang mga katuyoan. Si Apostol Pablo misulat kaninyo karon, sama sa iyang gibuhat ngadto sa karaan nga mga taga-Corinto:
“Gipili sa Dios ang ginapakaboang sa kalibutan aron sa pagpakaulaw sa mga manggialamon; ug gipili sa Dios ang ginapakahuyang sa kalibutan aron sa pagpakaulaw sa mga kusgan;
“Ug gipili sa Dios ang timawa ug tinamay sa kalibutan, bisan ang mga butang nga wala magalungtad aron sa pagwagtang sa mga butang nga nagalungtad:
“Aron nga sa ingon niana walay tawo nga makapasigarbo diha sa [Iyang] atubangan” (1 Mga Taga-Corinto 1:27–29).
Sa dihang miabut na ang panahon nga ipahiuli sa atong Manluluwas ang Iyang Simbahan dinhi sa yuta, ngano kaha nga mipili man Siya og mapainubsanong batang lalaki nga gamay ra og pormal nga iniskwelahan?
Ngano kaha nga gisultihan man sa Dios si Gideon, usa ka mag-uuma, nga mopadayon sa pagpapauli sa mga sundalo hangtud nga aduna na lamang siyay 300 ka mga tawo nga moatubang sa dili maihap nga mga kaaway? (tan-awa sa mga Mga Maghuhukom 7:1–25).
Ngano kaha nga mipili man ang atong Manluluwas og usa ka mangingisda aron mahimo Niyang labaw nga Apostol ug maoy mangulo sa Simbahan human Siya mobiya? (tan-awa sa Mateo 16:18).
Una, tungod kay “ang Ginoo nagatan-aw dili ingon sa makita sa tawo; kay ang tawo nagatan-aw sa panagway sa gawas, apan ang Ginoo nagatan-aw sa kasingkasing” (1 Samuel 16:7).
Ikaduha, tungod kay ang Dios makahimo sa pagkuha sa labing ubos nga yutang kulonon [clay] ug mohimo niini og obra maestra. Sa pagkatinuod, “Kon ang Dios dapig kanato, kinsa pa man ang batok kanato?” (Mga Taga-Roma 8:31).
Ikatulo, ang Dios mipili sa mahuyang aron walay manghambog ug moingon, “Nahimo ko kini sa akong kaugalingong abilidad.”
Sa dihang si Pedro, usa ka ubos nga mangingisda, midala sa gamayng grupo sa mga tumutuo ug dayon migiya kanila ngadto sa usa ka gamhanang Simbahan, ang mga tawo mipataas sa ilang mga tingog ug mipasalamat sa Dios.
Kon ang liboan ka mga sundalo mapildi sa pundok sa 300, ang mga tawo mohatag og pagdayeg sa Dios.
Kon ang batang lalaki nga nagpuyo sa hilit nga lugar mobiya sa daro ug mohubad sa labing makadasig ug makapausab sa kinabuhi nga teksto sukad sa Biblia, ang mga tawo mohimaya dili sa salabutan sa tawo apan sa gahum sa Dios.
Ang Langitnong Amahan wala magkinahanglan nga kamo gamhanan, maalamon, o maayo mamulong. Gusto Niya nga inyong ipaduol ang inyong kasingkasing Kaniya ug motinguha sa pagtahud Kaniya pinaagi sa pagserbisyo Kaniya ug motagad uban sa kalooy niadtong naglibut kaninyo.
Mga Pagpangalagad sa Espiritu Santo
Ang ikaduhang butang nga gusto nakong klaruhon kaninyo mao nga kon mosunod kamo sa Dios sa katinuod ug kusog, mopanalangin Siya kaninyo sa mga paagi nga dili ninyo masabtan.
Niadtong 2006, si Presidente Gordon B. Hinckley (1910–2008) ug ang Unang Kapangulohan mitino nga kinahanglang dunay templo nga ikonsiderar alang sa San Salvador, El Salvador. Mibisita mi og pipila ka mga yuta, lakip ang usa ka tibuok bloke sa siyudad nga nahimutang sa mas karaan nga sentrong bahin sa siyudad. Samtang nagbalhin-balhin kami og tan-aw sa mga yuta, mora og walay mohaum.
Sa katapusan, nakalabay kami og naglambo nga dapit sa kasadpan nga bahin sa siyudad. Duna akoy gibati niana nga dapit ug milibut sa pipila ka mga bloke. Usa ka yuta nga gilibutan og paril nakapainteres kaayo. Gikontak nako ang mga tag-iya ug nasayran nga dili ibaligya ang maong yuta, mao nga mipauli ko.
Apan ang propeta miingon nga usa ka templo ang pagatukuron sa San Salvador, mao nga mibalik ko aron motan-aw sa ubang mga luna. Sa makausa pa nadani ako sa yuta nga giparilan, ug mikontak na usab ako. Gisubli nila nga dili ibaligya ang yuta.
Mipauli ko pag-usab apan dili mawagtang ang pagbati nga mao kini ang dapit nga tukuran sa templo. Akong gikontak ang pamilya ug mihangyo bisan makigkita lang sila kanako. Miuyon sila nga makigkita. Sa makausa pa, mibiyahe ako ngadto sa San Salvador, inubanan ni Robert Fox, usa ka higala ug empleyado sa real estate division sa Simbahan. Nianang buntaga miluhod kami sa akong lawak aron mag-ampo sa dili pa sugdan ang adlaw ug nangayo og tabang sa Ginoo.
Samtang mi-drayb kami agi sa ganghaan padulong sa balay, mora kami og misulod og sagrado nga tanaman. Adunay mga kahoy ug mga bulak, ug ang kaguliyang sa gawas kutob ra sa ganghaan. Si Mr. Miguel Dueñas, iyang igsoong lalaki, ug duha sa mga anak ni Miguel naghulat kanamo. Giabi-abi nila kami ug giubanan kami pasulod sa panimalay sa ilang katigulangan [ancestral home]—nga dako ug halapad.
Gisultihan namo sila nga mianha kami tungod kay gisugo sa presidente sa atong Simbahan ug nga gusto niya nga mopanalangin sa nasud ug sa mga miyembro sa Simbahan pinaagi sa pagtukod og templo didto. Mipakita ko og mga litrato sa laing mga templo. Miingon ko nga gibati namo nga ang ilang yuta, ang panimalay sa ilang katigulangan, mao ang tukma nga dapit.
Dili ikatingala nga midumili na usab sila, apan kinahanglan namong mosulay. Ug busa sa hapit usa ka oras gisulayan namo ang tanang paagi sa pagdani kanila, sama sa direkta nga pagpalit, pagbinayloay og yuta, ug matag laing opsyon nga among mahunahunaan. Apan lig-on sila sa ilang determinasyon ug mibalibad sa matag tanyag.
Gibuhat na namo ang tanan nga among mahimo. Gipangandaman namo. Gibuhat namo ang labing maayo nga among nahibaloan. Apan dili gayud kini paigo.
Ang akong kasingkasing napuno sa dinalian nga pag-ampo: “Amahan, palihug tabangi mi nga masayud unsay isulti o buhaton.”
Sa katapusan naklaro nga kawang ra ang among pagbiyahe. Makita nga walay makapausab sa ilang mga hunahuna. Apan samtang misugod na kami nga mangandam sa pagbiya, adunay nahitabo. Ang Espiritu sa Ginoo misulod sa kwarto. Mabati gayud kini. Ang tanan diha sa lawak mibati niini. Usa kini sa labing kusganong espirituhanon nga mga kasinatian nga akong nabati sukad.
Si Miguel Dueñas, kinsa dili miyembro sa Simbahan, misugod sa paghilak. Si Mr. Dueñas milingi ngadto sa iyang igsoon ug miingon, “Kon dili nato mabaligya ang panimalay sa atong katigulangan, dili ba nato mabaligya ang kinamaayohan sa atong yuta tabok sa dalan?”
Miuyon ang iyang igsoon. Gihisgutan dayon namo ang laing yuta. Nanag-iya sila og pipila ka gatos ka ektarya tabok sa dakong dalan gikan sa panimalay sa ilang katigulangan, diin ang sentro sa kayutaan mibugdo og gamay mao nga ang tanang sakyanan nga moagi sa dalan makakita sa templo.
Kadto nga yuta ang ilang gitanyag alang sa templo sa Ginoo. Tinud-anay kadto nga milagro. Gikan nianang higayuna, ang mga panalangin sa Ginoo miuban sa proseso. Pagka-Agosto 21, 2011, si Presidente Henry B. Eyring, kaniadto maoy Unang Magtatambag sa Unang Kapangulohan, mipahinungod sa templo sa pagserbisyo sa Ginoo.
Mopamatuod ko nga usa ka matahum nga templo ang nagpanindot sa kabungturan sa San Salvador dili isip resulta sa bisan unsa nga gisulti o nabuhat ni Brother Fox o nako. Nagbarug kini didto karon tungod sa gamhanang pagpangalagad sa Espiritu Santo sa atong Makagagahum nga Dios.
Atong Maloloy-ong Amahan
Kon ang Ginoo igong nagpakabana aron ipadala ang Iyang Espiritu ug mag-andam og luna alang sa templo, dili ba kaha Niya ipadala ang Iyang Espiritu ug andamon ang inyong kasingkasing ug giyahan ang inyong mga lakang?
Hilabihan kamo ka bililhon kay sa usa ka luna sa yuta. Hinigugma kamo nga anak sa inyong Mahangturong Amahan. Mga anak kamo sa Dios sa uniberso!
Wala ba kamo magdahum nga naghunahuna Siya kaninyo? Wala ba kamo magdahum nga mogamit Siya kaninyo ug mopanalangin kaninyo sa mga paagi nga mas mahimayaon kay sa posible ninyong mahunahunaan?
Ang mga kasulatan nagsulti kanato nga kon kita “[mosalig] sa Ginoo sa bug-os [natong] kasingkasing, ug [dili mo]salig sa [atong] kaugalingong salabutan,” kon sa tanan natong mga paagi atong “[ilhon] siya, … siya magamando sa [atong] mga alagianan” (Mga Proverbio 3:5–6).
Si Haring Benjamin hingpit nga mi-summarize sa mensahe nga gusto nakong ibilin kaninyo. Miingon siya: “Ako nagtinguha nga kamo kinahanglan maghunahuna sa bulahan ug sa malipayon nga kahimtang niadto nga naghupot sa mga sugo sa Dios. Kay tan-awa, sila bulahan sa tanan nga mga butang, sa temporal ug sa espirituhanon; ug kon sila magpabilin nga matinud-anon hangtud sa katapusan sila pagadawaton ngadto sa langit, nga pinaagi niana sila mahimo nga mopuyo uban sa Dios diha sa usa ka kahimtang nga walay katapusan ang kalipay” (Mosiah 2:41).
Akong iisa ang akong tingog sa pagdayeg ug pagsaksi niini nga kamatuoran. Mopamatuod ko nga akong nakita ang gisaad nga mga panalangin sa Dios nga pabalik-balik nga natuman sa akong kaugalingong kinabuhi ug sa mga kinabuhi sa daghan pang uban.
Mosaad ko nga kon inyong ipaduol ang inyong mga kasingkasing sa inyong Amahan sa Langit, kon maningkamot kamo matag adlaw sa paghigugma ug pagsunod ni Jesukristo sa mas hingpit nga paagi, kon kamo sa kalooy ug pagkamabination makig-ambit sa mga palas-anon ug mopataas sa mga kamot niadtong nanlimbasug sa inyong palibut, kon magtinguha kamo nga mahimong tinuod nga mga disipulo sa atong pinalanggang Manluluwas, ang Ginoong Dios sa langit mogiya sa inyong mga dalan. Mogamit Siya kaninyo alang sa Iyang halangdon nga mga katuyoan. Mopanalangin Siya kaninyo sa mga paagi nga dili ninyo mahanduraw.