Mga Tawo sa Galilea
Samtang dinhi sa yuta ang Manluluwas, mitudlo ug nangalagad Siya sa daghang tawo. Kini ang pipila sa mga tawo nga gipangalagaran ni Jesukristo sa Galilea. Unsa kaha ang masulti niining mga tawhana kon makahimo pa sila sa pagsulti sa ilang kaugalingong mga istorya nga makita diha sa mga kasulatan? Ania ang pipila ka ideya.
Bata: Nagbarug ko duol ni Jesukristo ug sa Iyang mga Apostoles. Ang mga Apostoles naglalis mahitungod sa usa ka butang, ug si Jesukristo nangutana kanila bahin niini. Nahilum og maayo ang mga Apostoles, ug walay usa nga mitubag tungod kay naglalis sila kon kinsa kanila ang labing dako sa gingharian sa langit. Ang Manluluwas dayon nangamay kanako. Mibarug ko sa ilang taliwala, ug Iya akong gikugos. Gisultihan Niya sila nga si bisan kinsa nga magpaubos sama sa gamayng bata mao ang labing dako sa gingharian sa langit. (Tan-awa sa Marcos 9:33–37; Mateo 18:1–5.)
Batan-ong lalaki: Nakadungog na ko mahitungod ni Jesukristo ug sa mga milagro nga Iyang gihimo alang sa mga masakiton. Busa sa dihang miadto Siya sa Tiberiades, mikuyog ko sa pundok sa katawhan nga misunod Kaniya. Daghan kaayo kami, mga 5,000 ka tawo. Aduna akoy lima ka pan nga sebada ug duha ka isda. Gikuha kini ni Jesukristo ug gipanalanginan kini. Sa milagrusong paagi, ang tanan napakaon gikan sa pagkaon nga akong dala. Apan wala kini matapos didto. Sa dihang nabusog na ang tanan, ang mga disipulo mipundok sa mga salin. Mipuno kini og 12 ka bukag. (Tan-awa sa Juan 6:5–14.)
Tawo: Usa ako ka paralitiko, mao nga dili ako makalihok. Ug dugang pa niana, ako adunay dili mapugngan nga mga pagpangurog. Lain kaayo kadto. Nakadungog ang akong mga higala nga si Jesukristo nagtudlo sa usa ka balay. Nasayud sila nga makatabang Siya kanako, mao nga gisulayan ko nila sa pagdala ngadto Kaniya. Nagpunsisok sa balay, mao nga nakahukom sila nga itunton ako paubos agi sa atop. Gibuslotan nila kini ug dayon gitunton ako ngadto sa atubangan ni Jesukristo. Sa dihang nakakita Siya nako, gisultihan ko Niya nga ang akong mga sala napasaylo na. Gisultihan ko Niya sa pagbangon ug sa pagdala sa akong higdaanan ug sa paglakaw. Ako kining gibuhat—ug nahingangha ang tanan! (Tan-awa sa Marcos 2:1–12.)
Opisyal: Didto ko sa Cana nianang higayuna. Ug ang akong anak, kinsa didto sa Capernaum, hapit na mamatay. Nakadungog ko nga si Jesus anaa sa maong dapit, mao nga miadto ako Kaniya. Pag-abut nako, ako Siyang gihangyo sa pag-adto sa Capernaum aron sa pag-ayo sa akong anak. Misulti Siya kanako sa pagpauli sa balay tungod kay buhi ang akong anak. Mituo ko Niya. Sa akong pag-abut sa balay, gisugat ko sa akong mga sulugoon. Misulti sila kanako nga buhi ang akong anak. Ako silang gipangutana kon kanus-a siya misugod nga maarang-arang. Misulti sila kanako nga kagahapon sa ikapito nga oras. Mao kadto ang sama nga oras nga gisultihan ko ni Kristo nga buhi ang akong anak! (Tan-awa sa Juan 4:46–53.)
Maria Magdalena: Si Jesukristo mipagawas og pito ka yawa gikan kanako. Misunod ko Kaniya samtang mibiyahe Siya ngadto sa daghang mga balangay sa pagsangyaw sa ebanghelyo. (Tan-awa sa Lucas 8:1–3.) Sa dihang si Kristo gilansang sa krus, didto ako duol sa krus (tan-awa sa Juan 19:25). Mibisita ko sa lubnganan diin gipahimutang ang Iyang lawas. Ako ang unang tawo nga nakakita Kaniya human sa Iyang Pagkabanhaw. Sa sinugdanan nagtuo ko nga usa Siya ka hardinero, apan sa dihang gitawag Niya ang akong ngalan, nasayud ko nga ang ako kadtong Manluluwas. (Tan-awa sa Juan 20:11–16.)
Salome: Ako ang asawa ni Zebedeo ug inahan ni Santiago ug Juan, ang duha sa mga Apostoles ni Jesukristo. Misunod ko ug miserbisyo Kaniya samtang didto Siya sa Galilea. Didto ako sa Golgota sa dihang gilansang Siya sa krus. (Tan-awa sa Marcos 15:37–41.) Midala ko og mga pahumot ngadto sa Iyang lubnganan aron sa pagdihog sa Iyang lawas, apan sa akong pag-abut, wala Siya didto. Hinoon, nakakita ko og tawo nga nagsul-ob og taas ug puti nga sinina. Sa sinugdanan, nahadlok ko, apan misulti siya nga dili ko angay mahadlok. Miingon siya nga si Jesukristo nabanhaw ug nga kinahanglan nakong sultihan ang mga Apostoles. (Tan-awa sa Marcos 16:1–8.)
Ugangan nga babaye ni Simon Pedro: Nasakit ko og grabeng hilanat. Sa dihang nakadungog si Jesukristo niini, miadto Siya kanako. Gikuptan Niya ang akong kamot ug gipatindog ko. Diha-diha nawala ang akong hilanat. Maayo kaayo ang akong gibati nga nangalagad pa gani ko niadtong anaa sa akong palibut. (Tan-awa sa Marcos 1:29–31.)
Biyuda sa Nain: Ang akong anak nga lalaki bag-o lang nga namatay. Nawad-an na ko sa akong bana. Hilabihan ang akong pagbangutan. Bisan og dihay daghang mga tawo uban kanako, dili ko makapugong sa paghilak. Samtang giyayungan namo ang lawas sa akong anak pagawas sa ganghaan sa lungsod, usa ka tawo ang miduol kanako. Si Jesukristo kadto. Nalooy Siya kanako ug gisultihan ko nga dili mohilak. Dayon miadto Siya sa akong anak. Ang mga tawo nga nagdala kaniya mihunong. Gisultihan ni Jesukristo ang akong anak sa pagbangon. Ug mibangon siya! Milingkod siya ug misugod sa pagsulti ug miduol siya kanako. Nabuhi siya! Kaming tanan mihimaya sa Dios ug nasayud nga adunay bantugan nga propeta taliwala kanamo. (Tan-awa sa Lucas 7:11–17.)
Maria: Nakadungog ko mahitungod sa Mesiyas nga moabut. Wala lang gayud ako magdahum nga mahimong kabahin niini. Minyoonon ako ngadto ni Joseph sa dihang ang usa ka anghel misulti kanako nga ipanganak nako ang usa ka bata nga mao ang Anak sa Dios ug sa pagngalan Kaniya og Jesus. (Tan-awa sa Lucas 1:26–38.) Ug ang Mesiyas miabut gayud. Gipanganak nako Siya diha sa usa ka kwadra. Ang mga magbalantay sa karnero ug mga Mago mibisita Kaniya ug mihatag Kaniya og mga gasa. (Tan-awa sa Mateo 2:1–12; Lucas 2:1–20.) Si Jose ug ako mipadako Kaniya, apan kanunay Siyang nakapahingangha kanamo. Usa ka higayon nawala Siya sulod sa tulo ka adlaw. Sa katapusan nakit-an namo Siya sa templo. Ang maalamong mga tawo naminaw Kaniya ug nangutana Kaniya. (Tan-awa sa Lucas 2:40–52.)
Felipe: Usa ako sa mga Apostoles ni Kristo. Mipadala Siya kanamo aron sa pagsangyaw sa Iyang ebanghelyo. Misulti Siya kanamo nga tutokan ang nawala nga mga karnero sa Israel. Mihatag usab Siya kanamo og gahum sa pag-ayo sa mga masakiton, paglimpyo sa mga sanlahon, pagbuhi sa mga patay, ug pagpapahawa sa mga yawa. Misulti Siya kanamo nga dili magdala og kwarta o sinina, apan mipasidaan Siya kanamo nga kami pagalutuson. Apan misalig kami Kaniya tungod kay nasayud kami nga kon kami makalahutay hangtud sa katapusan kami maluwas. (Tan-awa sa Mateo 10:1–10, 17–18, 22–23.)
Tadeo Judas: Usa ako ka Apostol ni Kristo. Usa ka adlaw, sa dihang nagtudlo Siya kanamo—kanunay Niya kining buhaton—misulti Siya kanamo nga dili na Siya magdugay dinhi sa yuta. Misulti Siya kanamo nga kon mosunod kami sa Iyang mga sugo ug mohigugma Kaniya, moabut Siya ug mopakita sa Iyang kaugalingon ngari kanamo. Miingon Siya nga ipadala Niya ang Espiritu Santo aron sa pagtabang kanamo sa paghinumdom sa unsay Iyang gitudlo kanamo. (Tan-awa sa Juan 14:19–27.) ◼