Ko e Lea Fakaʻosí
Fanongo ki he Leʻo ʻo e ʻEikí ʻi he Konifelenisi Lahí
Fai ʻe ʻEletā Neil L. Andersen
ʻO e Kōlomu ʻo e Kau ʻAposetolo ʻe Toko Hongofulu Mā Uá
Mei ha lea ʻi he konifelenisi lahi ʻo ʻOkatopa 2017.
ʻEletā Niila L. ʻEnitaseni
ʻOku ou fakamoʻoni atu ko Sīsū ʻa e Kalaisí, ʻokú Ne tataki ʻa e ngāue toputapu ko ʻení, pea ko e konifelenisi lahí ko e taha ia ʻo e ngaahi taimi mahuʻinga ʻaupito kuó Ne ʻomi ai e fakahinohino ki Hono Siasí pea mo kitautolu fakataautaha.
ʻI heʻetau teuteu ke fakataha mai he tataki ʻa Palesiteni Lāsolo M. Nalesoní, ʻoku tau vēkeveke ke tau fanongoa “e finangalo ʻo e ʻEikí, … ko e fakakaukau ʻa e ʻEikí, … ko e leʻo ʻo e ʻEikí, pea mo e mālohi ʻo e ʻOtuá ki he fakamoʻuí” (Tokāteline mo e Ngaahi Fuakava 68:4). ʻOku tau falala ki he talaʻofa ʻa e ʻEikí: “Neongo pe ko e fai ia ʻi hoku leʻo pē ʻoʻokú pe ʻi he leʻo ʻo ʻeku kau tamaioʻeikí, ʻoku tatau ai pē” (Tokāteline mo e Ngaahi Fuakava 1:38).
ʻOku mahuʻinga ki heʻetau tupulaki fakalaumālié mo e kātakí ke tau falala mo tui ki he ngaahi lea ʻa e Kau Palesitenisī ʻUluakí mo e Kōlomu ʻo e Toko Hongofulu Mā Uá, ʻi he taimi ʻo e moveuveu mo puputuʻu ʻo hotau māmani fakaeonopōní.
ʻOku tau omi ki he konifelenisi lahí hili ha lotu mo ha teuteu. ʻOku ʻi ai ha ngaahi meʻa lahi ʻoku tau hohaʻa ki ai pea ʻi ai haʻatau ngaahi fehuʻi vivili. ʻOku tau loto kotoa ke fakafoʻou ʻetau tui ki hotau Fakamoʻui ko Sīsū Kalaisí, mo fakamālohia ʻetau malava ke matuʻuaki e ʻahiʻahí pea fakaʻehiʻehi mei hano tohoakiʻi ʻetau tokangá. ʻOku tau haʻú ke akonekina kitautolu mei ʻolunga.
ʻOku ou palōmesi atu ʻi hoʻo teuteuʻi ho laumālié, pea haʻu fakatuʻamelié, te ke fanongo ki he leʻo ʻo e ʻEikí, pea ʻe hū atu ha fakakaukau mo ha ongo ki ho ʻatamaí kuo fakafeʻungaʻi pē ia ke feʻunga mo koe.
ʻOku ʻi ai ha fakahinohino fakalangi lahi fau ʻoku fakatatali mai ke mou maʻu mei he ngaahi pōpoaki ʻo e konifelenisi lahí. ʻOku siviʻi kitautolu mei he anga ʻetau fakafeaangai ki he ngaahi meʻa ʻoku tau fanongoa, lautohi mo ongoʻí.
ʻOku ou palōmesi atu ʻi hoʻo fanongo ki he leʻo ʻo e ʻEikí kiate koe ʻi he ngaahi akonaki mei he konifelenisi lahí, peá ke ngāueʻi leva e ngaahi ueʻi ko iá, te ke ongoʻi e ala mai ʻa e langí kiate koe, mo hoʻo moʻuí mo e moʻui ʻa kinautolu ʻoku mou feohí pea ʻe tāpuekina koe.