ʻOku ʻI ai ha Ngaahi Meʻa Lahi Ke u Ako Fekauʻaki mo e Lakanga Fakataulaʻeikí
ʻI heʻeku kei finemuí pea toki hoko ko ha faifekau kimui angé, ʻoku ou manatuʻi ʻeku fifili pe naʻe fekauʻaki ha ngaahi potufolofola pau pea mo au ʻi heʻeku hoko ko ha fefiné, tautautefito ki he ngaahi potufolofola ne ʻuhinga ki he ngāue fakafaifekaú mo e lakanga fakataulaʻeikí. ʻI he taimí ni ʻi hoku ngaahi uiuiʻi kehekehe he Siasí pea mo ʻeku hoko ko ha faiako fakalotú, kuo fai mai ʻe ha niʻihi ha ngaahi fehuʻi tatau fekauʻaki mo e founga ʻoku fekauʻaki ai e lakanga fakataulaʻeikí mo kinautolú.
Hangē ko ʻeku fakamatala he peesi 34, naʻe kole ʻe he kau taki ʻo e Siasí he kuohilí ki he kāingalotú ke nau feinga ke maʻu ha mahino lelei ange ki he lakanga fakataulaʻeikí. Naʻe fakahoko mai ʻe Palesiteni Lāsolo M. Nalesoni ha meʻa ʻoku hohaʻa ki ai “ʻoku tokolahi hotau ngaahi tokoua mo e tuofāfine ʻoku ʻikai mahino kakato kiate kinautolu ʻa e tafaʻaki mālohi mo e mafai ʻo e lakanga fakataulaʻeikí.”1
ʻOku moʻoni e lea ʻoku pehē “ʻoku tupu e ueʻi fakalaumālié ʻi he ngaahi fakamatalá.” ʻI heʻeku ako fekauʻaki mo e lakanga fakataulaʻeikí mo akoʻi ia ki he kau ako ʻunivēsití, ʻoku ʻikai ngata pē ʻi heʻeku ʻilo ʻoku kei siʻisiʻi ʻeku ʻiló ka kuó u fakaʻataʻatā ʻeku fakakaukaú mo hoku lotó ki ha ngaahi moʻoni taʻengata kau ki he lakanga fakataulaʻeikí.
ʻOku ou fakatauange pē ʻi hoʻomou ako fekauʻaki mo e lakanga fakataulaʻeikí ʻi he meʻá ni, ʻe mahino kiate kimoutolu ʻoku finangalo ʻetau Mātuʻa Fakalangí ke tāpuekina ʻaki kitautolu e lakanga fakataulaʻeikí, pea ʻoku kōlenga mai e kau palōfita ʻo e ngaahi ʻaho kimui ní ke tau fakaʻaongaʻi lelei e ngaahi faingamālie ko ʻení—kae tautautefito ki he ngaahi faingamālie ko ia ʻoku foaki ki he kakai tangata mo fafine moʻui taau ʻi he temipalé.
Fakaʻapaʻapa atu,
Barbara Morgan Gardner