Tali Fehuʻi ki he ʻEnitaumeni ʻi he Temipalé
Mateuteu nai ki he ʻenitaumeni ʻi he temipalé? Ko e ʻomi ʻe he kau taki ʻo e Siasí ha ngaahi tali ki ha niʻihi ʻo e ngaahi fehuʻi angamahení.
Te u teuteu fēfē nai ke maʻu hoku ʻenitaumení?
“Koeʻuhí ko e toputapu ʻa e temipalé, ʻoku kole mai ai e ʻEikí ke tau maluʻi ia mei hano ʻuliʻi. ʻE lava pē ke hū ki ai ha taha ʻoku loto fiemālie ke ne teuteu lelei atu ki he faingamālie ko iá. …
“… ʻOkú ke teuteu fakatuʻasino ʻaki hoʻo tui ʻa e teunga totonú ke ke ʻalu ki he temipalé. ʻOku ʻikai ko ha feituʻu ia ke ke vala ngaholo ki ai. Kuo fakamamafaʻi mai ʻe he kau palōfita ʻo e ngaahi ʻaho kimui ní ke tau fakaʻapaʻapaʻi hotau sino fakamatelié. ʻOku totonu ke tauhi ʻaupito ʻa e fakaʻapaʻapa ko iá kae tautautefito kiate kinautolu te nau hū ʻi ha temipale māʻoniʻoní.”1
“ʻOku faingofua mo fakaʻofoʻofa e ngaahi akonaki ʻo e temipalé. ʻOku mahino ia ki he niʻihi ʻoku loto-fakatōkilaló, ka ʻe malava ke mālie ia ki he fakakaukau ʻo e kakai potó. “ʻOku fakatupulaki ʻe he akó ʻa e mateuteu fakalaumālié. ʻOku ou fie faleʻi ki he kāingalotu ʻoku nau hū foʻou ki he temipalé ke nau lau ʻa e ʻū palakalafi ʻi he ngaahi tefito ʻe fitu ko ‘eni ʻi he Fakahinohino ki he Ngaahi Folofolá, : ‘Paní,’ ‘Fakaleleí,’ ‘Kalaisi,’ ‘Fuakavá,’ ‘Hinga ʻa ʻĀtama mo ʻIví,’ ‘Feilaulaú,’ mo e ‘Temipalé.’ ʻE hoko hoʻo fai iá ke ke maʻu ai ha fakavaʻe pau.”2
—Palesiteni Russell M. Nelson
ʻOku kau ʻi he ngaahi maʻuʻanga tokoni kehe ʻe ala tokoni ki hoʻo teuteu ke maʻu e ʻenitaumení ʻa e:
Russell M. Nelson, “Personal Preparation for Temple Blessings,” Liahona, July 2001, 37–40.
.
ʻI hoʻo teuteu ke maʻu ho ʻenitaumení, ʻoku totonu ke ke ongoʻi fiemālie ke talanoa mo e fāmilí, kaungāmeʻá mo e kau taki ʻo e Siasí fekauʻaki mo e temipalé. ʻE tokoni lahi foki e ngaahi lēsoni ʻi hoʻo kalasi teuteu hū ki he temipalé ke ʻomi ai ha ngaahi fakamatala mo e fakahinohino.
Ko e hā e meʻa ʻoku fai lolotonga e ouau ʻenitaumeni ʻi he temipalé?
“ʻOku maʻu … e ʻenitaumeni fakatemipalé ʻi ha konga ʻe ua:
“ʻI he konga ʻuluakí, te ke maʻu fakafoʻituitui ai ʻi he lilo ha ouau teuteu ʻoku ui ko e ouau ʻinisitolí. ʻOku kau ʻi he ouau ʻinisitolí ʻa e ngaahi tāpuaki makehe fekauʻaki mo hoʻo tofiʻa mo e mālohi fakalangí.
“ʻI he konga hono uá, te ke maʻu ai e toenga hoʻo ʻenitaumení ʻi ha feituʻu fakatokolahi fakataha mo e niʻihi kehe ʻoku nau omi ki he temipalé. ʻI he konga ko ʻení, ʻoku fakahaaʻi mai ai e palani ʻo e fakamoʻuí, ʻo kau ai mo hono Fakatupu ʻo e māmaní, ko e Hinga ʻa ʻĀtama mo ʻIvi, ko e Fakaleleí, ko e Hē mei he Moʻoní pea mo hono Toe Fakafoki Mai ʻo e ongoongoleleí, kae pehē foki ki he fakahinohino ki he founga ʻe malava ai ʻe he kakai kotoa pē ke toe foki hake ki he ʻao ʻo e ʻEikí. ʻOku fakahoko ha konga ʻo e ʻenitaumení ʻo fakafou ʻi ha fakaʻaliʻali fakavitiō pea ko e konga ʻoku fakahoko ʻe he kau ngāue he temipalé.
“ʻE kau ʻi he ngaahi ouau ko ʻení hano fakaafeʻi koe ke ke fai ha ngaahi fuakava pau mo e ʻEikí. ʻOku kau ʻi he ngaahi fuakava ko ʻení ʻa e talangofua ki he ʻOtuá mo tauhi ʻEne ngaahi fekaú, moʻui ʻaki e ongoongolelei ʻo Sīsū Kalaisí, tauhi koe ke ke haohaoa fakaeangamaʻa mo fakatapui ho taimí mo e ngaahi talēnití ki he ngāue ʻa e ʻEikí. Ko hono olá, ʻoku talaʻofa mai ʻe he ʻOtuá ha ngaahi tāpuaki fakaofo ʻi he moʻuí ni pea mo e faingamālie ke toe foki hake ʻo nofo fakataha mo Ia ʻo taʻengata.
“ʻI he fakaʻosinga ʻo e ʻenitaumení, ʻoku fakataipe ʻe he hū ʻa e [kau pataloní] ki he loki selesitialé ʻa ʻenau hū ki he ʻao ʻo e ʻEikí. Te ke lava ʻo fakaʻaongaʻi ai ho taimí ke fakalaulauloto, lotu, mālōlō, lau e folofolá pe fanafana mo hoʻo fāmilí pe kaungāmeʻá ʻo aleaʻi ho ngaahi aʻusiá. Ko ha feituʻu ia ʻo e nonga, ʻa ia te ke lava foki ʻo maʻu ai ʻa e fiemālié mo e fakahinohino fakalangí.”3
ʻE lava nai ke tau talanoa fekauʻaki mo e ʻenitaumení ʻi tuʻa he temipalé?
Ko e konga ʻo e ʻuhinga ʻoku ʻikai ke tau faʻa talanoa fakaikiiki ai fekauʻaki mo e ʻenitaumení ʻi tuʻa he temipalé koeʻuhí ko e fakahinohino ʻa e ʻEikí ke “ʻoua te [tau] vaʻinga ʻaki ʻa e ngaahi meʻa toputapú” (Tokāteline mo e Ngaahi Fuakava 6:12). Te tau lava ʻo houngaʻia ʻoku akoʻi kitautolu ʻe he ʻEikí ʻi he “ʻotu lea ki he ʻotu lea, ʻa e akonaki ki he akonaki” (2 Nīfai 28:30) pea te Ne foaki kiate kitautolu ʻa e meʻa pē ʻoku tau mateuteu, he taimi ko iá, ke maʻú. ʻOku fakaafeʻi ʻe he ʻEikí ʻa e tokotaha kotoa pē ke haʻu ki Hono falé, ka ko e ʻamanakí ke mateuteu ʻa kinautolu ʻoku nau maʻu ʻa e meʻaʻofa mo e fatongia toputapu ko ʻení.
ʻOku lahi e ngaahi tafaʻaki, kau ai e ngaahi fuakava ʻi he temipalé, ʻoku lava pea ʻoku totonu ke tau talanoa ki ai kimuʻa pea tau fuofua hū he temipalé. ʻOku ʻi ai e ngaahi tafaʻaki ʻe niʻihi, ʻa ia ʻoku fakapatonu ki he ngaahi ouaú, ʻoku tau toki aleaʻi pē ia ʻi loto he temipalé. ʻOku fakataautaha pea toputapu ʻa e ngaahi ouau ʻo e temipalé, pea ko e konga ʻo e meʻa ʻoku makehe aí ko e founga ʻoku tau ʻaʻapa mo tokanga ʻi hono aleaʻi iá.
“ʻI hano lau fakalelei ʻo e folofolá, ʻoku fakahaaʻi ai naʻe ʻikai fakahā ʻe he ʻEikí ʻa e meʻa kotoa pē ki he kakai kotoa pē. Naʻe ʻi ai ha ngaahi makatuʻunga naʻe fokotuʻu ʻa ia naʻe pau ke tomuʻa maʻu ia kimuʻa pea toki maʻu ʻa e fakamatala toputapú. Naʻe kau ʻa e ngaahi ouau fakatemipalé ʻi he makatuʻunga ko ʻení.
“ʻOku ʻikai ke tau aleaʻi ʻa e ngaahi ouau ʻo e temipalé ʻi tuʻa mei he temipalé. Naʻe ʻikai teitei fakataumuʻa ʻe he ʻOtuá ke fakangatangata ʻa e ʻilo ki he ngaahi ouau fakatemipalé ki ha niʻihi tokosiʻi pē kuo fili ke nau fakapapauʻi ʻoku ʻikai ʻilo ki ai e niʻihi kehé. Ka ko hono fehangahangai ʻo iá. ʻOku mau poupou lahi atu ki he tokotaha kotoa pē ke ne fakafeʻungaʻi ia mo mateuteu ki he aʻusia he temipalé.”4
—Palesiteni Poiti K. Peeka (1924–2015), Palesiteni ʻo e Kōlomu ʻo e Kau ʻAposetolo ʻe Toko Hongofulu Mā Uá
Ko e hā ʻoku matuʻaki mahuʻinga ai ke u maʻu ʻenitaumení?
ʻOku matuʻaki mahuʻinga ʻa e ngaahi ouau mo e fuakava ʻo e temipalé he ʻoku nau fakatau ki he ngaahi tāpuaki maʻongoʻonga taha ʻoku ʻatā maʻá e fānau ʻa e Tamai Hēvaní he taimi ní pea mo ʻitānití. Naʻe pehē ʻe ʻEletā Lōpeti D. Heili (1932–2017) ʻo e Kōlomu ʻo e Kau ʻAposetolo ʻe Toko Hongofulu Mā Uá, “Ko e tefitoʻi taumuʻa ʻo e temipalé ke fakahoko ai e ngaahi ouau ko ia ʻoku fie maʻu ki hotau hakeakiʻi ʻi he puleʻanga fakasilesitialé.”5 ʻOku tokoni ʻa e maʻu ʻenitaumeni ʻi he temipalé ke fakafeʻungaʻi kitautolu, ʻo fakafou ʻi he Fakalelei ʻa Sīsū Kalaisí, ki he moʻui taʻengatá. Ka ʻoku toe tokoni foki ia ki heʻetau moʻui fakaʻahó. ʻOku faitāpuekina kitautolu ʻe he ngaahi fuakava mo e ouau ʻo e ʻenitaumení he taimí ni ʻaki ʻa e mālohi, maluʻi mo e taumuʻa pea ʻokú ne tokoniʻi kitautolu ke tau aʻu ki he tuʻunga ʻoku finangalo ʻa e ʻOtuá ke tau aʻusiá.
Kuo fakamanatu mai ʻe he kau palōfita ʻo e ʻaho ní ʻoku malava ke tau maʻu ʻa e ngaahi tāpuaki ko ʻení ʻo fakafou ʻi he temipalé. Kuo pehē ʻe Palesiteni Poiti K. Peeka, “ʻOku hanga ʻe heʻetau ngaahi ngāue ʻi he temipalé ʻo ʻufiʻufi kitautolu ʻaki ha paletuʻa mo ha maluʻi.”6
Ko e hā te u lava ʻo fai ke u maʻu ai ha mahino lelei ange ki he maʻu ʻenitaumeni he temipalé pea mo e ngaahi fuakava ʻoku ou fai aí?
Tokanga taha ki he ngaahi akonaki mo e ngaahi fuakava ʻo e temipalé ʻi hoʻo ako fakatāutahá. Fekumi ki he fakamoʻoni fakafolofola ki he ngaahi tefitoʻi moʻoni mo e ngaahi fuakava ʻo e ʻenitaumení ʻoku hā ʻi he folofolá, ngaahi lea ʻi he konifelenisi lahí pea mo e nāunau kehe ʻa e Siasí. ʻE tokoni hono toe vakaiʻi ʻo e ngaahi moʻoni ko ení ʻi hoʻo ako fakatāutahá ke ke tupulaki ai ʻi hoʻo mahino ki he ngaahi ouau mo e ngaahi fuakava ʻo e temipalé. Hangē ko ʻení, ʻi he taimi te ke ako ai ki he fono ʻo e angamaʻá, ʻe fakamālohia fēfē ʻe he angatonu ʻa Siosefá, he taimi naʻe fakataueleʻi ai ia ʻe he uaifi ʻo Pōtifaá, ʻa hoʻo tukupā ke talangofua ki he fono ko ʻení? (vakai, Sēnesi 39). ʻE fakaʻaongaʻi fēfē ʻa e tukupā ʻa Nīfai ke talangofua ki he ngaahi fekau ʻa e ʻOtuá ki he anga hoʻo fua fatongiá? (Vakai, 1 Nīfai 3:7).
Toe foki ki he tempalé ʻi he lahi taha te ke lavá ʻo fakatatau ki hoʻo tūkunga fakatāutahá.