Rūm̧m̧an Ded ro
Gospel Eo: Juon Mour Indeeo ej Kōkōm̧anm̧anļo̧k Mour
Lori Fuller ej juon rijeje n̄an Friend māākjiin eo. Ej iakwe kappok rikōjanjan ko rekāāl, ron̄jake nuuj ko ilo retio, im kōm̧at m̧ōn̄ā jān peļaakin laļ in. Jet iien ej je men ko.
Kwonan̄in ke kar ļōmņak kōn wāween kōjparok kien ko ej kōm̧m̧an bwe mour en ļapļo̧k an pidodoļo̧k?
Allōn̄ eo ļo̧k, jet m̧ōtta im n̄a kōm̧ kar koba ippān doon im lale ejet mour ilo wiik eo am. Juon iaan ro m̧ōttam̧ ekar kwaļo̧k bwe ekar bōk eddo in m̧anļo̧k an̄ūrlep in ekadōkdōk eo an jinen. Ekar dikļo̧k jān n̄a, im bwe ekar āinwōt juon jerbal eo eļap an nana.
Tokālik ilo bon̄ōn̄ eo, bwebwenato ko rekar oktak n̄an jon̄an ļap wōņāān kōbataat im ewi wāween an juon armej jeļā bwe ekar kōbataat juon bakij in jikka juon raan. (Lale jete wōņāān; elukkuun in ļap!) Ekar kajjieon̄ in kabōjrak kōbataat im ekar kajjieon̄ in kadikdikļo̧k. Ļaddik eo nejin ekar lukkuun m̧ōņōņō bwe ekar kabōjrak kōbataat. Jemān ekar mej jān an kar tarjān jon̄an an bōk uno ko rekajjoor, eo me ekar kōm̧m̧an bwe jabdewōt uno ko rekkajoor eļapļo̧k aer kaam̧jak n̄an ļaddik in.
Āliktata, bwebwenato eo am̧ ekar jem̧ļo̧k kōn kope—jete armej rej idaak kope aolep jibbon̄ (im ālkin rālep im jet iien jota) im ewi jon̄an aer ajļo̧ke kab in kope kiiō ke rejjab maron̄e wōņāāer aolep raan.
Ke ikar ro̧o̧lļo̧k n̄an m̧weo, kōļmenļo̧kjeņ kōn aolep bwebwenato kein, ikar ļōmņak, “Naan in Māletlet ej men eo ej kōkōm̧anm̧anļo̧k mour eļaptata.” (Eļan̄n̄e kwojjab jeļā, juon “mour ej kōkōm̧anm̧anļo̧k” ej juon wāween n̄an kōm̧m̧an bwe mour eo am̧ en em̧m̧anļo̧k, pidodo ļo̧k mour, men ko eierļo̧k wōt. Ilo an juon armej ilo online kar kōmeļeļeiki, juon mour ej kōkōm̧anm̧anļo̧k ej ta eo kar jeļā kake āinwōt “juon ļōmņak em̧m̧an.”) Ej āinwōt n̄e Anij ekar ba, “En̄in ej juon wāween n̄an kōjparok jāān ko am̧, jipan̄ eok ājmour wōt, kōjparok ajri ro nejūm̧, im kattoļo̧k eok jān eddodo in en̄jake ko reppen, ekoba ko am̧ make im an̄ūrlep ko an ro jet.” Enan̄in āinwōt eļan̄n̄e Anij ekar būki aolep jorrāān ko jekar jelm̧ai im kar letok n̄an kōj juon iaļ n̄an kattoļo̧k jimettanier. …
Kōn jabdewōt kien ko an Anij, ewōr ad kālet n̄an ļoor er ak meļo̧kļo̧k er. Bōtaab ilo aō ļōmņak kōn Naan in Māletlet āinwōt juon jon̄ak in unin tōl ko jān Anij me jim̧or būki im kōjparok kōj jān elōn̄ wōt im lōn̄ apan̄ ko, ikar ļōmņak, “Ta eļan̄n̄e aolep kien ko an Anij rej jerbal ilo wāween in?” Ta eļan̄n̄e juon Jemedwōj Ilan̄ eo ej iakwe, eo ewōr an jeļā bwe mour in im apan̄ ko ie, kar letok juon bok in tōl n̄an jipan̄ kōj ejjerakrōk ilo iaļ in āinwōt an kōmettak āinwōt an maron̄? Im ta eo Ekar letok n̄an kōj kōnke Ej iakwe kōj im kōņaan kōjparok kōj?
Kōņaan m̧ōņōņō ippān ta eo ewōr ippem̧, n̄an m̧ōņōņō im kam̧oolol? “Kwon jab aņokņak m̧weien riturum̧” (Exodus 20:17).
Kōņaan ke kattoļo̧k būrom̧ōj, kalbuuj, jorrāān ak bakkiin̄ ko an court? Kōņaan ke kōjparok lōke an armej im kautiej—im jerbal eo am̧? “Kwōn jab ko̧o̧t” (Exodus 20:15).
Kōņaan ke pād wōt epaake Anij bwe En maron̄ tōl im jineet eok im jipan̄ kotak eddodo ko am̧? “Kwōn yokwe Irooj am̧ Anij kōn aolepen būruōm̧ im kōn aolepen am̧, im kōn am̧ ļōmņak otemjej.” (Matu 22:37).
Laajrak in ej etal wōt im etal wōt. Aolep kien ko kajjojo remaron̄ kōjparok kōj jān metak ubōr, kōm̧m̧an an mour ko ad pidodo, kōjparok kōj jān jorrāān, ak baj jipan̄ kōj loe aenōm̧m̧an. Im aolepāer edik wōņāān ko aer ak jab jokne. (Im ejjeļo̧k wōņāān ko rettiņo̧!)
Ijjab kōņaan in kadikļo̧k kien ko an Anij āinwōt unin tōl ko rejjab aorōk ak rejipan̄ kōkōm̧anm̧anļo̧k mour. Er eļapļo̧k jān men in. Ak er rej barāinwōt ļam waan. Jemedwōj Ilan̄ ejjab maron̄ kōjparok kōj jān jabdewōt men. Ak āinwōt juon jemān eo ej iakwe, Ekōņaan kōpooj kōj im kōjparok kōj jān wōņāān kālet ko ad—jān tōl kōj n̄an kōm̧anm̧anļo̧k juon.
Aaet, jemaron̄ kōjparok kien ko im men ko renana rej waļo̧k wōt. Kōn menin etke kabōņōņōik kōj?
Kōnke jej jāmin jeļā ta eo jej bōk kōjparok jāne kōn pokake eo ad. Kōnke ej jipan̄ kōj anemkwoj jān juon mour eo ej kakinejnej kōj make. Kōnke pokake ej jipan̄ kōj pād wōt im epaake Anij. Kōnke ej likūt kōj ilo jabdewōt jekjek n̄an ukweļo̧k n̄e jej kālet men eo ebōd. Kōnke jej lōke Anij n̄an jeļā ewi wāween n̄an kōjeraam̧m̧an im kōjparok kōj.
Lajrak in ej etal wōt im etal wōt. Ejapļok an aitokļo̧k jān juon laajrak in un ko jab n̄an kōjparok kien ko.
N̄an em̧m̧an ak nana, Anij ej kōtļo̧k aō kālet wāween aō pokake eo ikōņaan. Ij bōk n̄an kālet ewi jon̄an aō kōppeļļo̧k n̄a make n̄an kōjeraam̧m̧an ko ewōr Ippān n̄an n̄a. Kōn menin etke kōjparok kien ko? Kōnke ikōņaan bwe mour eo aō en lukkuun peļļo̧k n̄an jipan̄ eo Anij ej kajjieon̄ letok.