Āinwōt Rilo̧mo̧o̧r eo:Eddōkļo̧k ilo Emān Eria ko Raorōk
Jejjab lukkuun jeļā eļap kōn wāween an Jisōs Kraist kar eddōkļo̧k, ak Luke 2:52 ej letok n̄an kōj juon jipan̄ epen.
Pija in kōrā eo ej ebbirbir laļļo̧k jān Getty Images
“Kōn menin, ij aikuj in … ta?”
Ikar ron̄jake. Em̧ool, ikar. Rikōmeļeļe eo ekar etale kein ikkure eo aō, im kar kwaļo̧k n̄an n̄a jejjet in kōtļo̧k to eo, im aaet kar reitok n̄an n̄a ilo mejān im ba, “Ij JĀMIN kōtļo̧k am̧ wōtļo̧k!”
Ak ilo iien eo reppen, ikar jutak ijo: ikar jutak wūdiddid im menokadu, ke ikar kalimjōk ioon aera im laļļo̧k … laļtata, ikar jeļā bwe ikar bōk bun̄tōn eo kein kajuon.
Wōtlo̧k jān jikin eo eutiej.
Kiiō bōlen kwoj jan̄in meļeļe ta eo ikar ioone, kōn lukkuun wōtlo̧k jān jikin eo eutiej, ij kōjatdikdik bwe ebwe am̧ kar pojak n̄an am̧ ibberber laļtak. Ak kwōnej kar kōņaan pād ijeņ ilo jetōb. Kwōjeļā, n̄e kwoj ekkatak jeje ko rekwojarjar ilo iien ko am make im kwoj ron̄ an rūkaki ro kam̧ool kōn m̧ool in katak ko im pedped in katak ko. Kwoj en̄jake Jetōb eo ej karuwaineneik eok ilo waween ko me renaaj jipan̄ eok erom̧ eļapļo̧k āinwōt Rilo̧mo̧o̧r eo. Kwoj m̧ōņōņō in bōk bun̄tōn in im kwaļo̧k n̄an Irooj ewi jon̄an kallim̧ur eo am̧ n̄an gospel eo An.
Innām kwoj ļōmņak, “Ewi wāween aō kōm̧m̧ane menin?”
Im ta eo āinwōt ealikkar im epidodo kōm̧m̧ane baj jidik iien emootļo̧k em̧ōj an jako. En̄ņe kwe ņe, ej jutak ilo idam̧in juon jikin eutiej ilo jetōb, jab jeļā eļan̄n̄e kein jerbal ko am̧ rekkar ak pojak n̄an m̧akūtkūt kōn m̧ool eo kwaar bōke.
N̄an erom āinwōt Jisōs Kraist: Ewi wāween am̧ kōm̧m̧ane menin?
Jino jān Jinoin
Rilo̧mo̧o̧r eo ekar jino mour eo An ioon laļ in ejja wāween in wōt kwe im n̄a kōjro ekar kōm̧m̧ane: āinwōt nin̄nin̄ ro. Ilo kajjojo iien, āinwōt kōj, Jisōs ekar jino rūttoļo̧k (lale Katak im Bujen ko 93:11–17). Ekar ekkatak kilen etetal, kōnono, im ettōn̄. Ekar ekkatak kilen jerbal, riit, im iiaio ippān armej.
Ilo m̧ool, wāween an Irooj kar “rūttoļo̧k” ej jeje ilo Luk 2:52: “Jisōs ekar ļapļo̧k ilo māletlet im ānbwin, im ilo utiej ippān Anij im armej.”
Eļan̄n̄e jej kōņaan erom āinwōt Rilo̧mo̧o̧r eo, jemaron̄ ļoor waanjon̄ak eo An.
Kōn menin jen lale jon̄ak in im lale kōj make wāween ad erom āinwōt Jisōs Kraist ej ļam waan!
“Ļapļo̧k ilo māletlet”
Anij ekar kōm̧anm̧an ļōmņak ko ad bwe ren maron̄ wōr ippāer juon maron̄ ekabwilōn̄lōn̄ n̄an etale, jerbale, im kōjerbale jeļāļo̧kjeņ eo. Mool ko, kōtmāne ko, kapāāl ko, wāween jerbal ko—jon̄an meļeļe ko jemaron̄ aiini renan̄in ejjeļo̧k jon̄aer!
Ak āinwōt Rilo̧mo̧o̧r eo, je pukot n̄an kōļapļo̧k māletlet, jab baj wōt meļeļe. Māletlet ej maron̄ jim̧we kōjerbal meļele ko, meļeļe kālet ko ad, im kōm̧m̧n jokālet ko rem̧m̧an.
“Jejjet in kōjerbal jeļāļo̧kjeņ kile āinwōt māletlet,” Elder James E. Talmage ekar katakin (1862–1933) jan Doulul eo an Jon̄oulruo Rijilōk ro.1 Ekar barāinwōt kōmeļeļeiki wāween an Rilo̧mo̧o̧r eo kar bōk māletlet: “Ekar bōk jeļāļo̧kjeņ jān ekkatak, im kar bōk māletlet jān jar, ļōmņak, im kijejeto.”2 Alma ekar katakin ļaddik eo nejin Hilamōn, “O, kwōn keememej, nejū m̧aan, im ekkatak mālōtlōt ilo am̧ em̧m̧an ded; aaet, ekkatak ilo am̧ em̧m̧an ded n̄an kōjparok kien ko an Anij” (Alma 37:35; eoon eo eaorōk ko kobaiktok). Ļōmņak kōn menin: Tōmak, katak, im pokake ej kōkōm̧anm̧anļo̧k ad maron̄ n̄an bōk jeļāļo̧kjeņ im ļapļo̧k ilo māletlet!
“Ļapļo̧k ilo ānbwin”
Nipai ekar inea im kajoor. Ekar ta eo jeje ko rekwojarjar rej ņaetan “ļap ilo ānbwin” (1 Nipai 2:16). N̄a ijjab. Ānbwinnin Nipai ekar kōm̧anm̧an n̄an kōm̧m̧ani m̧akūtkūt ko relukkuun oktak jān ānbwinnū kōn Irooj kar leļo̧k n̄an Nipai jerbal ko roktak. Nipai ekar aikuj in jek juon wa, pukot m̧ōn̄ā n̄an baam̧le eo an, im jipan̄ er ito itak ilo āne jam̧dān.
Ānbwinnid ewōr ie ta ko jej aikuji n̄an mour im lan̄lōn̄ ilo mour in. Kōnke jon̄ak eo ekwojarjar an Anij, juon ajri ej kab ļotak ej eddōkļo̧k ilo ānbwin ium̧win iien. Jejjab aikuj in ejaake elōn̄ļo̧k m̧ōttan ānbwin ko ak ne im pa ko ilo ad rūttoļo̧k—m̧ōttan ānbwin kein rekar ejaak kadede āinwōt m̧ōttan wōt ānbwinnid. Ejjeļo̧k ba kakkobaba tok m̧ōttān ānbwin eo emenin aikuj! Bwe n̄an ad maron̄ jerbal n̄an Anij im ro ipeļaakid, jej aikuj in kōkōm̧anm̧anļo̧k ājmour eo an ānbwinnid.
Ānbwinnid rej tampeļ ko rejejjet kar kōm̧anm̧ani, m̧ōko, n̄an jetōb ko ad (lale 1 Korint 3:16–17; 6:19–20). Būreejtōn Russell M. Nelson ekar katakin: “Ānbwinnūm̧, jekdo̧o̧n kain rot menin letok ko an, ej juon kōm̧anm̧an ewājabdik an Anij. Ej juon imōn kōppād—juon tampeļ n̄an jetōb eo am̧.”3
Ānbwinin ko ad remaron̄ en̄jake apan̄ ko reļļap an ānbwin, utam̧e ko ilo ānbwin, im metak kōnke jej jelm̧ae juon en̄jake in jab wabanban, ak Jemedwōj Ilan̄ ekar kōm̧anm̧an ānbwinnid jejjet n̄an kōttōbrak jibadbad ko ad ilo mour.
“Ļapļo̧k ilo jou ippān Anij”
Elder Jeffrey R. Holland jān Doulul eo an Jon̄oulruo Rijilōk ro ekar katakin bwe “m̧ool eo jinointata eļap an aolep indeeo ej bwe Anij ej iakwe kōj kōn aolepān būruwōn maron̄, ļōmņak, im kajoor.”4
Anij ej iakwe kom̧. Men̄e raan eo n̄an kwe ej juon raan eo enana, Ej iakwe eok—kōn aolepān am̧ kajoor, mōjņo̧, kajjitōk, im kōjatdikdik. Kōn menin, ewi wāween am̧ “ļapļo̧k ilo jouj ippān Anij”? Kwoj kwaļo̧k n̄an E bwe kwoj bar iakwe E!
Jisōs juon iien kar ba n̄an rikaļoor ro An “Eļan̄n̄e kom̧ij yokwe Eō, kōjparok kien ko aō” (Jon 14:15). Am̧ pokake ej kōmeļeļeiki iakwe eo am̧ n̄an Anij. Am̧ m̧ōņōņō in pokake ilo aolep iien ilo m̧akūtkūt ko reddik, emaron̄ kōpooj eok n̄an uwaak, āinwōt an naan in karuwainene ko An nej itok ilju im jekļaj, im kōttōbrak aaet men ko reļļapļo̧k.
“Ļapļo̧k ilo jouj ippān armej”
Bwilōn̄! An lōn̄tata m̧ōttam armej ilo social media ej jab meļeļein bwe kwaar “jouj n̄an armej.”
Jisōs ekar kōmeļeļeiki ilo juon wāween eoktak kōn wāween kareel ro jet—im ro rekar Ekar kōtļo̧k aer kareel E. E “ekar etal im kōm̧anm̧an em̧m̧an, … bwe Anij ippān” (Jerbal 10:38).
Būreejtōn Henry B. Eyring, Rikakpilōklōk eo Kein Karuo ilo Būreejtōnji eo Kein Kajuon, ekar ba, “Imaron̄ keememej, āinwōt eļan̄n̄e ekar rainin, ro m̧ōtta me rekar un̄ūr mour eo aō ilo em̧m̧an etto im etto. Emōj aer jako, ak ememļo̧kjeņ in iakwe eo aer, waanjon̄ak, tōmak, im naan in kam̧ool rej kotak wōt n̄a.”5
Komaron̄ kōļapļo̧k kareel eo am̧ ilo am̧ un̄ūr mour eo an juom m̧ōttam ilo em̧m̧an! For the Strength of Youth ej katakin eok wāween: “kwaļo̧k itok limo eo em̧m̧an n̄an ro jet; ettōn̄ dikdik im kwaļo̧k n̄an er ke kwoj kea kōn er. Kōm̧m̧an n̄an aolep kōn jouj im kautiej, im bōjrak jān ekajet im kajook ro ipeļaakim … Kōm̧m̧ane juon kijejeto in jerbal eaorōk bwe kwon erom̧ juon m̧ōttā n̄an aolep ro rej jook ak make iaer, ewōr menin aikuj ko ippāer, ak rejjab en̄jake aer kaarmejete er.”6
Ļōmņak kōn kajjojo armej ro kwoj lukkuun nōbar im kautiej er—ro me em̧m̧an ippem̧. Ta kadkad in m̧wil ko rekar ejaake me rej kakeememej eok kōn Jisōs Kraist? Kōnke ilo aer em̧m̧an āinwōt ro m̧ōttad, eo Mōttad em̧m̧antata ej Jisōs Kraist, im waanjon̄an eo An ej juon iaan ro jej kōņaan in ļoore!
Ilo Meram eo An, jān Greg K. Olsen
Aolepān Ej Ekkejeltok
“Im Jisōs ekar kalapļo̧k ilo An mālōtlōt im rūtto, im ilo jouj ippān armej im Anij” (Luk 2:52). Ilo am̧ ļoor jon̄ak in eddōkļo̧k eo an Rilo̧mo̧o̧r, kwonaaj loe bwe men ko otemjej rej jerbal ippān doon ilo wajāpdik, im kwonaaj erom̧ eļapļo̧k āinwōt E. Ļōmņak eo am̧, ānbwinnūm̧, im jetōb eo renaaj jerbal ippān doon n̄an em̧m̧an eo am̧, im kwonaaj maron̄ kōjeraam̧m̧an mour ko an elōn̄ armej ro jet im “jerbal n̄an [Anij] kōn aolep būruwōm̧, ļōmņak im kajoor”! (Katak im Bujen ko 4:2).