Jān Mijak n̄an Mōn̄ā
Matt Maxwell
Utah, USA
Kōmeļeļe jān Greg Newbold
Ikar niknik ilo Kabun̄ in ilo aolepān mour eo aō. Ikar jerbale juon mijen elikio, m̧are ilo tampeļ eo, im jipan̄ kōkkaajririki emān leddik ro nejū rem̧m̧an. Ilo an eļļāļo̧k elōn̄ iiō ko, kōn menin, ikar kile bwe jet iaan ro m̧ōtta rekar ebbeer kōn aer uwaan Kabun̄ in. Jet uwaan baam̧le ko rekar kōjerbal social media n̄an kajjitōk im kōnanaiki ritōl ro an Kabun̄ in. Im ekar jino wōr aō pere ko kōn Kabun̄ in kein kajuon ilo mour eo aō. Pere ko aō rekar kōm̧m̧an aō mijak ilju im jekļaj eo aō. Ilo jet iien, ikar anjo̧ jān jako kōjatdikdik.
Ilo iien in epen, ikar kipel m̧ake n̄a bwe in pād ilo kweilo̧k eo eļap an stake. Ke stake būreejtōn eo aō ekar kōnono, ekar ba, “Eļan̄n̄e jej en̄taan ilo iien ko reppen im̧aad, jej aikuj in em̧m̧akūt jān ad jab lukkuun m̧ōn̄ā n̄an aikuj in m̧ōn̄ā jān naan ko an Anij. Jej aikuj in kōm̧m̧an iien ekkatak jeje ko rekwojarjar aolep iien im mejōk ekkatak in āinwōt juon kālet eaorōk ilo mour ko ad. Eļan̄n̄e jej kōm̧m̧ane, ij kallim̧ur bwe jej jāmin naaj mijak.”
Naan in “mijak” ekar kairuj eō. Ikar kile bwe ikar kōtļo̧k aō ekkatak gospel eo bwe en jab lukkuun kōm̧m̧an. Āinwōt juon uwaak, mijak ekar dāpdep ilo mour eo aō. Ikar pepe bwe in kajjieon̄ e kapilōk eo an stake būreejtōn eo aō.
Ikar ro̧o̧l n̄an m̧weo im̧ō im kōm̧m̧ane juon jikin n̄an ekkatak gospel eo. Ilo juon dam̧ ilo juon ruum̧, ikar kōjenolo̧ke ippān juon tebōļ edik ippān juon jea em̧m̧an. Ikar likūti jejjo pija in Rilo̧mo̧o̧r eo ioon wall eo. Ikar aini jeje ko rekwojarjar aō, jet pinjeļ, im juon bok in jeje jidikdik. Ikar jino ekkatak kōn juon jar.
Ālkin juon ak ruo wiik, ikar ejaake juon imminene. Inaaj m̧okta ron̄jake juon kōnono jān kweilo̧k eo eļap innām ekkatak juon unin kōnono jān gospel eo. Innām inaaj riiti jejjo jebta jān Bok in Mormon eo im kam̧ōj aō ekkatak kōn juon jar em̧wilaļ n̄an Jemedwōj Ilan̄.
Mekarta elōn̄ kabōņōņō ko, ikar jab joļo̧k juon raan in ekkatak gospel eo ium̧win jiljiljino allōn̄ ko. Ikar bōk juon meļeļe eļap kōn elōn̄ unin kōnono ko an gospel eo im kar kōkajoorļo̧k jem̧jerā eo aō ippān Jemedwōj Ilan̄ jān aolep iien im jar em̧ool.
Naan in kam̧ool eo aō ekar bar juon alen erom juon men eo ikar ataratar ioon. Pere ko aō rekar jako kōnke kam̧ool ko rekāāl ikar būki jān jepļaaktok eo an gospel eo. Ikar loe eō make an dikļo̧k aō inepata kōnke ikar lōke ilo Anij eļapļo̧k. En̄jake mijak eo aō im ebbeer eo rekar em̧m̧akūt jān eō. Ej barāinwōt jako aō itok limo ilo m̧akūtkūt ejjeļo̧k tokjāer im kile bwe ikar erom̧ jouj ļo̧k im iakwe ro jet.
Ke kar eo̧ron̄ kapilōk eo an stake būreejtōn eo aō, Anij ekar maron̄ ukōte eō. Ikar mour im bar jepļaaktok jān Maajta eo Make ke ikar m̧ōn̄ā jān naan ko An.