Rikkatak ro Rej Wōtlo̧k jān Wōjke ko
Yamila Caminos
Buenos Aires, Argentina
Kōmeļeļe jān Robert Crawford
N̄an mijenede ro rem̧m̧an ded rej kōļļaļļaļ ilo kābunen iaļ ko ilo Buenos Aires, Argentina, ilo 1995, kallim̧ur eo rekar bōke jān juon uwaan Būreejtōnji eo an Eria ekar āinwōt ejjeļo̧k kar kōtmāne kake: “Eļan̄n̄e ej ļap am̧ jerbal im kwoj lukkuun in pokake, rikkatak ro renaaj wōtlo̧k jān wōjke ko im peptaij.” Kōm̧ kar loe kōn kallim̧ur in jidik iien tokālik.
Jema ekar jeke juon iaan wōjke ko itōrere in iaļ in etetal eo im̧aan m̧weo imōm̧. Ke ekar pād ijo ilōn̄ ioon wōjke eo jekjek, ekar kile ruo likao em̧m̧an dettāer rej etetal tok n̄an e ioon iaļ eo. Ke rekar pād ium̧win wōjke eo, ekar ikkūr laļļo̧k n̄an er ilo kajin Pālle.
Jema ekar jab lukkuun jeļā kajin Pālle, bōtaab ekar jeļā jet naan ko, im ekar itok limoin. Wōn likao rein, im ta eo rej kōm̧m̧ane ilo bukwōn in am?
Mijenede ro rekar bōjrak, ļōmņak ia eo ainikien eo ej itok jāne. Innām jema ekar tolaļtak jān wōjke eo bwen kōnono n̄an er. Ekar bwilōn̄ kōn ennaan eo aer im m̧wilier, ekar karuwaineneik er n̄an m̧weo im̧ōn.
En̄jake eo m̧okta an jema kōn kabun̄ ekar kōm̧m̧an an inepata, ak ennaan eo an jepļaaktok eo an gospel eo ekar kōnono n̄an būruwōn. Ekar mour ilo jet iien ko reppen, im ekar jeļā ke ekar aikuj in oktak. Ekar lukkuun ron̄jake ke mijenede ro rekar katakin e, jinō, jibū, im n̄a.
Ekar 11 wōt iiō rūttō, ak m̧ool ko rekar katakin rekar barāinwōt kobrak eō—im ippān jinō im jibū. Āinwōt juon uwaak, kōm̧ kar aolep peptaij jejjo allōn̄ tokālik, ilo Jeptōm̧ba 1995.
Ine in tōmak ko me mijenede ro rekar katōki ilo būruōm̧ rekar ejjab etto naajdik jān jem̧jerā jān ro m̧ōttam ilo kabun̄ in, katakin gospel ko jet, im en̄jake ko rem̧m̧an ippān ritōl ro rekajoor an Kabun̄ in. Kōn karuwaineneik eo em̧m̧an kōm̧ ar bōke, ine ko an tōmak eo am “ekar wōtlo̧k ioon bwidej eo em̧m̧an, im juļ, im kar kalle bukwi leen ko” (Luk 8:8).
Leen tōmak ko am me kōm̧ij lan̄lōn̄ kaki rainin—turinļo̧k 25 iiō tokālik—ekoba juon kallim̧ur edim n̄an jepļaaktok eo an gospel eo an Jisōs Kraist, kōjeraam̧m̧an ko an tampeļ eo, im juon likio im mour elemōņōņō kōn juon epepen ekāāl an ro uwaan baam̧le ko rej ippān doon n̄an indeeo.
Kōm̧ naaj aolep iien kam̧oolol kōn ruo mijenede ro retiljek ro rekar likūt juon kallim̧ur eim̧we n̄an mālijjon̄ in.