Pagpadayag ngadto ni Propeta Joseph Smith—ug nganha Kanimo
Ang Doktrina ug mga Pakigsaad nagpakita kon sa unsang paagi nga ang pagpadayag migiya ni Propeta Joseph Smith ug naghatag og sumbanan kon sa unsang paagi nga ang inspirasyon makagiya sa imong kinabuhi.
Paghulagway pinaagi ni Michael Mullan
Hunahunaa ang tanang talagsaong mga butang nga nahimo ni Joseph Smith: paghubad sa Basahon ni Mormon, pag-organisar sa Simbahan, pagdawat sa priesthood, pagtukod og mga templo, pagtudlo sa gipahiuli nga ebanghelyo, pagpadala sa mga misyonaryo. Ug mas nahimo pa kining talagsaon kay iyang nabuhat kadtong mga butanga sa ingon ka batan-on nga edad.
Giunsa man niya pagkasayud kon unsaon pagbuhat kadtong mga butanga? Swerte lang, dili na siya kinahanglang motag-an—gigiyahan siya pinaagi sa pagpadayag. Pinaagi niining mga pagpadayag, nga daghan niini anaa na sa Doktrina ug mga Pakigsaad, gitudloan siya sa Ginoo sa doktrina, gigiyahan siya sa pag-organisar sa Simbahan, ug gitubag ang importante nga mga pangutana. Ania ang pipila lang ka mga ehemplo.
Mga Pangutana nga Gitubag pinaagi sa Pagpadayag
-
Kinsa ang dunay awtoridad sa pagbunyag? Niadtong Mayo 15, 1829, nag-ampo sila si Joseph Smith ug Oliver Cowdery mahitungod sa bunyag. Mipakita si Juan Bautista ug mihatag kanila sa Aaronic Priesthood ug misugo kanila nga bunyagan ang usag usa. (Tan-awa sa D&P 13.)
-
OK ra ba nga mogamit og tabako? Ang pag-usap ug pagpanabako sagad nga gibuhat sa panahon ni Joseph Smith. Niadtong 1833 nag-ampo siya alang sa giya bahin sa hilisgutan ug nakadawat og pagpadayag nga nailhan isip ang Pulong sa Kaalam, nga namahayag nga “ang tabako dili alang sa lawas” (tan-awa sa D&P 89).
-
Nganong magpahigayon man kita og buhat sa templo alang sa patay? Ubos sa pagpangulo ni Propeta Joseph Smith, gitukod sa mga miyembro sa Simbahan ang Kirtland Temple ug dayon ang Nauvoo Temple, diin makapahigayon sila og mga bunyag ug ubang mga ordinansa sa templo. Doktrina ug mga Pakigsaad 128 mipasabut nga “kita kon wala sila [ang mga patay] dili mahimo nga hingpit; ni sila kon wala kita mahimo nga hingpit” (bersikulo 18).
Ikaw usab makabaton sa giya sa Ginoo sa imong kinabuhi ug motubag sa imong mga pangutana pinaagi sa personal nga pagpadayag. Usahay kadtong mga tubag moabut gikan sa mga kasulatan o gikan sa inspirasyon nga imong mabati sa imong kasingkasing ug hunahuna. Ug usahay magpadayon ka pinaagi sa pagtuo, nga wala gayud masayud kon unsay resulta apan naninguha sa imong pinakamaayo nga mahimong masulundon.
Kasagaran magkinahanglan kini og igong panahon aron makita ang inspirasyon ug giya nga imong gikinahanglan. Sama ni Propeta Joseph, mahibaloan nimo ang kabubut-on sa Ginoo “pagtulun-an ngadto sa lain nga pagtulun-an, lagda ngadto sa lain nga lagda” (D&P 98:12). Sama sa gibuhat sa Propeta, sugdi pinaagi sa pag-ampo. Pangayo sa Langitnong Amahan og inspirasyon gikan sa Espiritu Santo. Siksika ang mga kasulatan ug ang mga pagtulun-an sa modernong mga propeta. Himoa ang imong desisyon ug dayon pangutana kon husto ba kini (tan-awa sa D&P 9).
Pagkat-on paglabay sa Panahon
Tan-awa kini nga mapa, ug imong makita kon asa si Joseph Smith sa dihang nadawat niya kining mga pagpadayag gikan sa Ginoo. Ang mga pagpadayag miabut kon kanus-a ug asa kini gikinahanglan ni Joseph Smith, sumala sa kabubut-on sa Ginoo.
Nakadawat si Joseph og 46 ka pagpadayag didto sa Kirtland, Ohio, apan dili siya kinahanglang magpabilin didto aron padayong magiyahan sa Ginoo. Nakadawat usab siya og mga pagpadayag didto sa Pennsylvania, New York, Missouri, ug Illinois.
Kining mga pagpadayag miabut sulod sa daghang katuigan. Dili ba mas nindot unta kon gipadayag pa sa Ginoo ang tanang kinahanglang mahibaloan ni Joseph Smith mahitungod sa priesthood, pananglitan, sa usa ka pagpadayag? Hinoon, gihatagan sa Ginoo ang Propeta og mga pagpadayag mahitungod sa priesthood niadtong 1829, 1830, 1832, 1835, 1841, ug uban pa (tan-awa, pananglitan, sa D&P 13; 20; 84; 107; 124).
Ang imong kahibalo bahin sa ebanghelyo molambo usab paglabay sa panahon. Samtang magkat-on ka sa ebanghelyo uban sa tabang sa Espiritu Santo—pinaagi sa mga kasulatan, kinatibuk-ang komperensya, mga miting sa Simbahan, seminary, ug uban pa—ang imong panabut molambo paglabay sa panahon, sama sa gibuhat ni Joseph Smith.