Presidente Dallin H. Oaks: Pagsunod sa mga Paagi sa Ginoo
Sa higayon nga mahibalo si Presidente Oaks kon unsay gustong ipabuhat sa Ginoo kaniya—iya kining buhaton.
Human matawag nga moserbisyo isip usa ka sakop sa Korum sa Napulog Duha ka mga Apostoles niadtong Abril sa 1984, namalandong og maayo si Elder Dallin H. Oaks bahin sa iyang bag-ong tahas ug sa dili malikayan nga mga kausaban nga mahitabo sa iyang kinabuhi.
Dili kini ang unang higayon nga gihangyo si Elder Oaks nga biyaan ang iyang personal ug propesyonal nga “mga pukot [trabaho]” (tan-awa sa Mateo 4:18–20). Niadtong 1970 mi-resign siya sa iyang posisyon sa faculty sa University of Chicago Law School agig tubag sa pagdapit gikan sa mga lider sa Simbahan nga mahimong presidente sa Brigham Young University sa Provo, Utah, USA. Ganahan kaayo siyang magtudlo, mopahigayon og research, ug makig-interact sa mga estudyante sa abogasya didto sa Chicago. Apan mitubag siya pinaagi sa hugot nga pagtuo sa hangyo nga moserbisyo isip ang ikawalo nga presidente sa BYU.
Miatubang si Elder Oaks og susama nga sitwasyon niadtong 1984 human sa iyang tawag ngadto sa Napulog Duha, samtang mibiya na usab siya sa usa ka posisyon ug trabaho nga ganahan niya isip huwes sa korte suprema sa estado sa Utah. Hinoon, kini nga kausaban lahi.
Niadtong 1970, makatarunganon lang nga tingali nakahunahuna si Elder Oaks nga mobalik siya sa iyang pangabogasya human sa iyang pagserbisyo sa BYU, nga gani sa katapusan maoy iyang gihimo. Apan ang tawag niadtong 1984 lahi—usa ka mapahinungurong pasalig sa iyang tibuok nga kalag ug tibuok kinabuhi ngadto sa Ginoo. Ang mahangturong kaimportante ug tibuok kalibutan nga nahisakop sa iyang bag-ong mga responsibilidad sa pagkatinuod bug-at.
Gihulagway ni Elder Oaks ang tinud-anay niyang mga hunahuna mahitungod niining importante nga transisyon:
“Atol niining panahon sa paghinuklog, namalandong sa paagi nga akong igahin ang nahabilin sa akong kinabuhi, nangutana ko sa akong kaugalingon kon unsa ako nga matang sa pagka-apostol. Mahimo ba kong usa ka abogado nga gitawag nga mahimong apostol, o mahimo ba kong usa ka apostol nga nahimong abogado sa una? Ang akong konklusyon mao nga ang tubag niining pangutana nagdepende kon sulayan nako pagpahiangay ang akong calling ngadto sa akong kaugalingong personal nga mga kwalipikasyon ug kasinatian, o mopaubos ba ko sa sakit nga proseso sa pagsulay og pagpahiangay sa akong kaugalingon ngadto sa akong calling.
“Sulayan ba nako sa pagpahigayon ang akong calling diha sa mga pamaagi sa kalibutan, o sulayan nako sa pagtino ug pagsunod ang mga pamaagi sa Ginoo?
“Nakadesisyon ko nga sulayan nako sa pag-usab ang akong kaugalingon aron mohaum sa akong calling, nga sulayan nako nga mahiangay ngadto sa mga kwalipikasyon ug espiritwal nga kahalangdon sa usa ka apostol. Usa kana ka hagit sa tibuok kinabuhi.”1
Ang balaanong grasya sa Ginoo, ang mga kasinatian sa kinabuhi, usa ka nagsuporta nga pamilya, ug ang personal nga mga kinaiya ug disiplina nga napalambo pinaagi sa makugihong pagtuon ug pagkat-on, pagtrabaho og maayo, ug mahigugmaong pagserbisyo nakapahimo kang Presidente Oaks sa “pagsunod sa mga pamaagi sa Ginoo” ug tinud-anay nga mahimong usa ka maisugong Apostol kinsa kausa nahimong usa ka abogado.
Daghang espiritwal nga mga gasa ang makita diha sa kinabuhi ug pangalagad ni Presidente Dallin H. Oaks.
Hugot nga Pagtuo diha sa Manluluwas
Si Presidente Oaks napanalanginan og espiritwal nga gasa nga masayud pinaagi sa gahum sa Espiritu Santo nga si Jesukristo mao ang Anak sa Dios (tan-awa sa D&P 46:13–14). Nagtudlo siya sa doktrina sa Manluluwas uban sa kaklaro ug nagpamatuod bahin Kaniya nga may kombiksyon. Ang Ginoo mao ang iyang kahayag sa matag aspeto sa iyang kinabuhi. Sa higayon nga mahibalo si Dallin H. Oaks kon unsay gustong ipabuhat sa Ginoo kaniya—iya kining buhaton.
Pinaagi sa iyang mga pagtudlo sulod sa daghang katuigan, nakatabang si Presidente Oaks sa mga miyembro sa Simbahan nga mas hingpit nga masabtan ang katuyoan ug kaimportante sa plano sa Amahan bahin sa kaluwasan, ang Pag-ula sa Manluluwas, awtoridad ug mga yawe sa priesthood, ang sagradong ordinansa sa sakrament, ang proseso nga dili lamang “mobuhat” apan “mahimo,” ang mga kalainan diha sa atong kinabuhi sa maayo, mas maayo, ug labing maayo, ug daghan pang mga baruganan sa ebanghelyo. Ang iyang yano ug han-ay nga pamaagi sa pagkat-on sa ebanghelyo nakapalig-on sa pagtuo sa mga Santos sa Ulahing mga Adlaw sa tibuok kalibutan.
Integridad
Si Presidente Oaks usa ka tawo nga dunay integridad. Ang iyang mga gituohan ug kinaiya nakabase sa mga baruganan sa ebanghelyo, ug iyang gituman kon unsay iyang gituohan. Ang unsay dali dili gayud usa ka opsyon alang niya tungod kay determinado siya sa pagbuhat kon unsay matarung, bisan kon ang usa ka aksyon dili mopalambo sa iyang personal nga reputasyon o panglantaw. Walay mga pagpanglaktud diha sa iyang kinabuhi—buhata ang mga butang sa sakto o ayaw na lang.
Ang iyang integridad makita diha sa iyang kaandam nga mosagubang sa mahagitong mga isyu ug mga buluhaton. Ug gibuhat niya kana sa hanas kaayo nga pamaagi—sa pamaagi sa Ginoo. Direkta siyang nagtudlo mahitungod sa mga hilisgutan sama sa pagpanalipod sa tradisyonal nga pamilya, pagtubag sa mga panghulga sa kagawasan sa relihiyon, pagprotektar sa mga bata gikan sa hinakog nga mga sala sa mga hamtong, ug pagkondenar sa kadautan sa pornograpiya.
Kaaghup
Ang personal ug propesyonal nga mga nakab-ot ni Presidente Oaks eksepsyonal sa bisan unsang sumbanan. Apan nagpakita si Presidente Oaks og kaaghup ug usa ka espiritwal nga pagkamadawaton ngadto sa pagkat-on gikan sa Espiritu Santo ug gikan sa mga tawo nga dunay nagkadaiyang mga background ug mga kasinatian.
Sa usa sa among mga miting sa korum, mipahayag si Elder Oaks og lig-ong opinyon mahitungod sa usa ka aksyon nga iyang gituohan nga kinahanglang ipadayon. Ang mga rason nga iyang gipamulong makapakumbinser, ug ang iyang kahibalo mahitungod sa isyu dako. Ang iyang mga argumento nga pabor sa aksyon makapaagni.
Sa among pagtinambagay, usa ka sakop sa Napulog Duha nga dili pa kaayo dugay mipahayag og pag-uyon sa aksyon apan nagpanagana bahin sa gisugyot nga tayming. Mahimo untang tubagon ni Elder Oaks ang kabalaka pinaagi sa pagtubag og sama sa “Siguro duna koy mas daghang kasinatian bahin niining butanga kay kanimo.” Apan wala niya buhata. Sa walay pagpakita og pagdepensa o kayugot, gipangutana ni Elder Oaks ang iyang sakop sa korum, “Pwede ba ko nimong tabangan aron masabtan ang imong pagpanagana mahitungod sa tayming?”
Human maminaw og maayo sa iyang kaubang apostol, namalandong og kadali si Elder Oaks ug dayon miiingon, “Ang punto nga imong gihimo importante. Wala nako makonsiderar og maayo ang mga implikasyon sa tayming niini nga aksyon sa paagi nga imong gibuhat, ug naagni ko nga ang gisugyot kinahanglang usbon base sa unsay atong nakat-unan niining panaghisgutan.”
Si Elder Oaks naminaw ug nakakat-on gikan sa iyang kauban nga sakop sa korum ug dayon milakaw diha sa kaaghup sa Espiritu sa Ginoo (tan-awa sa D&P 19:23) aron matuman ang gitinguha nga resulta. Alang ni Dallin H. Oaks, ang isyu dili gayud mahitungod sa unsay iyang gusto; kanunay kining mahitungod sa kon unsay gusto sa Ginoo ug mahitungod sa pagsunod sa Iyang mga pamaagi.
Pag-ila
Napanalanginan usab si Presidente Oaks og espiritwal nga gasa sa pag-ila ug sa abilidad nga makaila sa dugay nga molungtad nga mga sangputanan sa mga gisugyot, mga desisyon, ug mga aksyon. Kini nga kapasidad makita diha sa usa ka pangutana nga kanunay niyang ipangutana sa iyang kaugalingon ug sa uban: “Asa man kini paingon?”2 Ang usa ka tawo dili mahimong makig-istorya o makigtambag uban ni Presidente Oaks ug dili makaila dayon kon sa unsang paagi nga kining abilidad nakabenepisyo sa dili maihap nga mga indibidwal ug mga pamilya ug sa tibuok Simbahan atol sa iyang tibuok kinabuhi nga pagserbisyo sa Ginoo.
Sa usa ka gabii sa ting-init niadtong 1970, dunay makalilisang nga engkwentro si Presidente Oaks sa usa ka armadong kawatan didto sa Chicago’s South Side sa iyang pagbalik ngadto sa iyang gi-parking nga sakyanan. Ang iyang asawa, nga si June, naghulat kaniya diha sa sakyanan.
“Ihatag nako ang imong kwarta,” miingon ang kawatan.
“Wala koy kwarta,” mitubag si Brother Oaks, nga mipakita niya sa iyang walay sulod nga pitaka.
“Ihatag nako ang mga yawe sa imong sakyanan,” mimando siya. Ang mga yawe nahabilin sa sakyanan diha ni Sister Oaks. “Sultihi siya nga ablihan ang sakyanan,” miinsister ang kawatan. Miingon si Brother Oaks nga dili.
Nanghulga ang kawatan,“Buhaton nimo, o patyon ka nako.”
Kusganong miingon si Brother Oaks, “Dili nako kini buhaton.”
Samtang gibalik-balik sa kawatan ang iyang gimando ug mga pangpanghulga, nakakita si Brother Oaks og oportunidad sa pagkuha sa pusil palayo sa batan-ong lalaki. Sama sa gihulagway ni Presidente Oaks sa usa ka mensahe sa 1992 nga kinatibuk-ang komperensya, “Sa dihang molihok na unta ko, duna koy talagsaong kasinatian. Wala koy nakita nga bisan unsa o nadungog nga bisan unsa, apan nasayud ko bahin sa usa ka butang. Nasayud ko sa unsay mahitabo kon akong kuhaon kana nga pusil. Maglayugay mi, ug akong ition ang pusil ngadto sa dughan nianang batan-ong lalaki. Mobuto kini, ug mamatay siya. Nasabtan usab nako nga dili gyud ko pwedeng magdala-dala diha sa akong konsyensya sa kamatayon nianang batan-ong lalaki sa tibuok nakong kinabuhi.”3
Kining milagrusong pagpakita sa gasa sa pag-ila nakapahimo ni Presidente Oaks sa pagresolbar sa komprontasyon ug sa katapusan nakaluwas sa iyang kaugalingong kinabuhi ug sa kinabuhi sa batan-ong kawatan.
Bag-o pa lang gayud, sa usa ka miting sa Missionary Executive Council, nga gipangulohan ni Elder Oaks nianang higayuna, nagtinambagay mi mahitungod sa usa ka sugyot nga may kalabutan sa mga misyonaryo nga nagserbisyo sa usa ka partikular nga dapit sa kalibutan. Human makapahayag ang tanang sakop sa council sa ilang panglantaw bahin nianang butanga, nangutana si Elder Oaks og pipila ka pangutana ug gi-summarize kon unsay nakat-unan. Dayon namahayag siya, “Wala nako batia nga human na kita niining butanga. Kinahanglan natong maghulat sa Ginoo ug dili mohimo og final nga desisyon karon.”
Ang mga panghitabo sa mga bulan human niana sa talagsaong paagi nakapakita sa inspirasyon nga nadawat nga ihulat kana nga desisyon. Ang council, nga naglihok ubos sa dinasig nga pagpangulo ni Elder Oaks, napanalanginan nga makahimo og saktong desisyon, sa saktong panahon, ug diha sa pamaagi sa Ginoo aron mapanalipdan ang mga misyonaryo ug mouswag ang buhat.
Pagkakomedyante ug Pagkamabination
Si Presidente Oaks dunay pagkakomedyante. Pananglitan, atol sa pagtapos sa usa ka paniudto nga gitambungan sa tanang sakop sa Napulog Duha, usa sa mga Kaigsoonan ang misugyot nga ang pagpabilin nga magmata nianang hapuna lisud human makatagamtam sa ingon ka lami nga pagkaon. Si Presidente Oaks mipahiyum og dako ug mitubag, “Kana kon dili ka makakita og maayong dapit nga makatulgan.”
Kanunay niyang binuangan ang iyang kaugalingon ug ang iyang pagkaupaw. Apan mahimo usab siya nga lig-ong tigpanalipod niadtong dunay gamay na lang nga buhok sa ilang mga ulo. Kanunay siyang mamahayag, “Ang Ginoo mihimo og daghang ulo, ug kadtong dili kaayo nindot iyang tabunan og buhok.”
Ang iyang mainiton ug abtik nga panabut makalingaw, ug dili gayud siya mapakyas sa pagpakita og konsiderasyon ug kamabination. Ang mga tawo kasagaran mokomentaryo human makauban ni Presidente Oaks nga ganahan sila kon giunsa niya sa pagpabati nila nga komportable tungod sa iyang pagkakomedyante, sa kasinsero sa iyang gugma, ug sa nagpakabana nga kinaiya.
Impluwensya sa Matarung nga mga Babaye
Sa tanang nakab-ot ug mga pasidungog nga may kalabutan sa iyang talagsaong kinabuhi, si Presidente Oaks mao ang unang moila sa talagsaong impluwensya sa tulo ka matarung nga mga babaye sa iyang kinabuhi: sila si Stella Harris Oaks, June Dixon Oaks, ug Kristen M. McMain Oaks.
Siyete anyos pa lang si Dallin Oaks sa dihang ang iyang amahan, si Lloyd E. Oaks, nga usa ka doktor, namatay tungod sa tuberkulosis sa edad lamang nga 36. Gilubong siya sa ika-11 nga anibersaryo sa iyang kaminyoon ngadto sa inahan ni Presidente Oaks, nga si Stella Harris Oaks. Nagpabilin siyang wala maminyo og usab sa tibuok niyang kinabuhi ug mipadako sa ilang tulo ka anak.
“Napanalanginan ko og talagsaon kaayo nga inahan,” nahinumdom si Presidente Oaks. “Sigurado nga usa siya sa daghang halangdong mga babaye nga nabuhi sa ulahing mga adlaw.”4
Isip usa ka freshman sa BYU, nahimamat ni Presidente Oaks si June Dixon. Naminyo sila niadtong 1952 ug napanalanginan nga mahimong mga ginikanan sa unom ka anak. “Wala ko maninguha sa padayon nga taas nga lebel hangtud miabut si June sa akong kinabuhi,” miingon si Presidente Oaks. “Utang gayud nako ang akong mga nakab-ot ngadto niya.”5 Niadtong Hulyo 21, 1998, namatay si June tungod sa kanser.
Si June ug Dallin naghisgot mahitungod sa kaugmaon sa ilang pamilya sa wala pa siya mamatay. Ilang nauyonan nga ang pagminyo og usab mahimong usa ka panalangin ngadto niya ug sa ilang pamilya. Niadtong Agosto 25, 2000, naminyo si Elder Oaks kang Kristen M. McMain.
Gihulagway ni Kristen Oaks ang iyang kinabuhi uban ni Presidente Oaks pinaagi sa usa ka yano nga sentence: “Nagkahiusa kami sa buhat sa Ginoo, ug kini naghatag kanamo sa dili maihap nga mga panalangin.” Maghimo siya og mga panagpundok sa pamilya kutob sa mahimo tungod kay nagdala kini og dakong kalipay sa tibuok pamilya. Si June kanunay nga kabahin sa panag-istoryahanay.
Litrato uban sa mga miyembro sa Asia gikan sa Deseret News; litrato uban sa asawa, nga si Kristen, atol sa RootsTech pinaagi ni Jeffrey D. Allred, Deseret News
Samtang magtudlo ug magpamatuod si Presidente Oaks mahitungod sa mga kamatuoran nga nalangkob diha sa “Ang Pamilya: Usa ka Pamahayag ngadto sa Kalibutan,” nahibalo gayud siya sa kaimportante nga mahimong usa ka bana ug amahan. Nakakat-on siya og mahinungdanong mga leksyon mahitungod sa mga responsibilidad nga gisaw-an sa mga bana ug mga asawa “sa paghigugma ug pag-amuma sa usag usa ug alang sa ilang mga anak”—ug nga “niining sagrado nga mga kapangakohan, ang [mga bana ug] mga amahan ug ang [mga asawa ug] mga inahan adunay katungdanan sa pagtabang sa usag usa ingon nga magkauban.”6 Padayon ug sa labing maayo niyang abilidad, gipuy-an ni Presidente Oaks ang iyang kinabuhi sa pamilya nga nagsunod sa mga pamaagi sa Ginoo.
Ang Pagpahinungod sa Tibuok Kinabuhi
Niadtong Abril 6, 2018, gipaluyohan si Presidente Russell M. Nelson isip ang Presidente sa Ang Simbahan ni Jesukristo sa mga Santos sa Ulahing mga Adlaw, uban ni Presidente Dallin H. Oaks isip Unang Magtatambag sa Unang Kapangulohan ug Presidente Henry B. Eying isip Ikaduhang Magtatambag.
Miabut si Presidente Oaks ngadto sa iyang bag-ong buluhaton diha sa tigdumalang korum sa Ang Simbahan ni Jesukristo sa mga Santos sa Ulahing mga Adlaw nga may “hilum ug mapadayunong pagpahinungod sa tibuok kinabuhi”7—usa ka kinabuhi nga gipahinungod ngadto sa Manluluwas ug sa Iyang gipahiuli nga Simbahan. Ang personal nga pagkadisipulo ni Presidente Oaks, gamhanang mga pagtulun-an, ug pagpadayon sa iyang matarung nga ehemplo makaimpluwensya sa positibong paagi sa mga tawo sa tibuok kalibutan ug motabang kanila sa pagsunod sa mga pamaagi sa Ginoo.