Presidente Henry B. Eyring: Talagsaon nga Salabutan, Sama sa Bata nga Pagkamapainubsanon
Ang detalyado nga kinabuhi ug kinaiya ni Presidente Henry B. Eyring sama ka putli nga usahay daw nagsumpaki [paradoxical].
Usa sa mga anak nga lalaki ni Presidente Henry B. Eyring bag-ohay lang nga misulti, “Ang akong papa mahulagway sa duha ka pulong: putling tinguha.” Sigurado nga ang tanan nga nakahimamat niining bag-o nga Ikaduhang Magtatambag ngadto ni Presidente Russell M. Nelson, nga nakakita niya nga mi-interact sa uban, o nakadungog niya nga mihatag og usa ka wali mouyon. Sa pagkatinuod, morag kanang talagsaong nagkadaiya nga mga dimensyon sa kinabuhi ni Hal Eyring (sigun sa kanunayng nailhan sa iyang pamilya ug mga higala) usa ka taas nga pagpakita sa dili ordinaryo nga putli nga hiyas, usa ka mapadayunong pagpakita sa “putling tinguha”: nga mahimong anaa sa parehong pulong ug binuhatan sa tukma gayud kon unsay gusto sa Dios nga mamahimo ang Iyang mga anak.
Ang pamaagi ni Presidente Eyring sa pagkab-ot niana nga tumong sama ka klaro ug ka dili komplikado sa mismong buluhaton—ug dili ingon nga dili mahagiton! Gikan sa iyang pagkabata hangtud karon sa iyang sobra na sa 80 nga pangidaron, gibuhat ni Hal kining mga paningkamot aron mahimong matarung sa atubangan sa Dios pinaagi sa kinasingkasing nga pagtinguha—ug pagkahimong andam nga dili gayud molihok kon wala—ang giya sa Espiritu Santo, usa ka langitnong kauban nga iyang ipasabut sa hapit tanan niyang pagpakig-istorya, matag administratibong desisyon nga iyang himoon, o matag pamahayag sa publiko nga iyang isulti. Ang pagtagamtam sa pakig-uban sa Espiritu Santo mao ang labing importante nga paagi ni Henry B. Eyring paingon sa celestial nga himaya. Usa kini ka pagpakita sa iyang tinuod nga sama sa bata nga pagkamapainubsanon. Ebidensya kini sa iyang dili ordinaryo nga espiritwal nga kaputli.
Kataw-anan lang, ang daghang daw panagsumpaki sa iyang kinabuhi ang nakapahimo sa kaputli nga mas makapakurat hinoon. Natawo ug gipanganlan nga gisunod sa usa ka chemist nga dunay kahigayunan nga makadaug og Nobel prize, gisulayan ni Hal ang physics ug chemistry apan mipili sa negosyo alang sa iyang akademikanhong trabaho, usa ka bag-ong hilisgutan sa pamilyang Eyring nga angay makat-unan. Dunay access sa talagsaong katigayunan, siya ug ang iyang asawa, nga si Kathleen, mipili sa ilang tibuok kinabuhi isip minyo nga magpuyo nga igo ra ug sa madaginutong paagi—usahay mainampingon kaayo sa ilang pinansyal (sama sa gireport sa ilang mga anak nga nangatawa). Naedukar sa propesyonal nga paagi sa usa sa nag-unang mga unibersidad sa Estados Unidos, nagtrabaho isip full professor sa lain, ug visiting fellow sa ikatulo, walay usa nga mas labaw pa sa unsay nakab-ot ni Hal sa bata nga pangidaron, apan gibiyaan niya kanang pagkainila sa akademya ug ang propesyonal nga kasiguroan aron pangulohan ang usa ka wala mailhi nga duha ka tuig nga kolehiyo (nga wala mailhi sa bisan kinsa ug sa tanan niyang mga kauban sa Harvard, Stanford, ug MIT), usa ka eskwelahan nga wala pa gayud niya mabisitahi—ang Ricks College—sa usa ka siyudad kansang lokasyon wala gani siguro niya mapakita ni bisan kinsa—ang Rexburg, Idaho, USA.
Ang kaputli ug daw panagsumpaki nagpadayon. Hayag nga lapas pa sa kasagaran nga mga ehemplo nianang intelektwal nga kinaiya, si Presidente Eyring dili andam nga magdepende sa iyang kaugalingong talento o maayong paghukom sa paghimo og bisan unsa nga desisyon bahin sa mga butang nga dunay espiritwal nga sangputanan. Ingon ka maisugon nga mahimo sa usa ka tawo kon gikinahanglan ug lig-on nga lapas pa sa naandan nga depinisyon sa kalig-on, dili gayud siya, sama sa giingon ni Presidente M. Russell Ballard (ug sa kaugalingong mga anak ni Presidente Eyring), “madali-dali sa paghimo og desisyon diha-diha dayon o sa pagpili og aksyon nga dili mag-amping. Dili gayud siya molihok sa bisan unsang paagi nga mobutang sa Simbahan o ni bisan kinsa nga siya responsable diha sa peligro.”1
Usa ka katapusang ehemplo sa kaputli ug daw nagsumpaki nga anaa gayud mismo sa sentro sa kalag ni Henry B. Eyring mahimong mosumada sa integridad niining talagsaon nga tawo:
Kausa kinahanglan ni Presidente Eyring nga mopahigayon og sakrament ngadto sa usa ka grupo nga wala makaapil sa regular nga sakrament miting sa ward. Sa wala pa siya mopadayon nianang mabinationg aksyon, dali siyang nanawag ngadto sa bishop sa iyang ward aron magtinguha og pagtugot sa pagbuhat sa ingon. Siyempre, ang bishop andam ug mahigugmaong mitugot sa gihangyo.
Akong gihatag kining partikular nga panghitabo alang sa usa ka katuyoan. Sigurado nga ang leksyon klaro sa tanan. Usa kini ka sakop sa Unang Kapangulohan sa Simbahan ang mihangyo. Usa kini ka giordinahan nga Apostol, usa nga naghupot sa tanang yawe sa priesthood nga mahuptan ni bisan kinsa dinhi sa yuta. Kini ang tawo nga makahatag ug naghatag og direksyon sa tanang lider sa ward ug stake diha sa Simbahan, lakip na ang bishop sa iyang kaugalingong ward sa Bountiful, Utah, USA. Kini ang tawo nga makasapaw sa iyang mga yawe niadtong bisan kinsa nga lokal nga lider ug isip tigdumalang opisyal sa Simbahan kasagaran kinahanglang mobuhat sa ingon. Apan uban sa kaputli sa kasingkasing nga naghulagway sa tanan nga iyang gibuhat ug sa daw panagsumpaki nga dili tanan andam nga mopakita, kini mao si Presidente Henry B. Eyring nga mabinantayong misunod sa protocol nga gilatid alang sa matag ordinaryong miyembro sa Simbahan bisan asa sa kalibutan, nga mapainubsanong mipresentar sa iyang hangyo sa atubangan sa dinihugan sa Ginoo ug mas andam nga modawat og tambag ug motuman sa desisyon sa iyang lokal nga lider.
Ang Sinugdanan sa Iyang Hugot nga Pagtuo
Kining abunda nga pagka-espiritwal ug dayag nga kaputli sa hugot nga pagtuo ni Presidente Eyring nagsugod og sayo. Natawo ngadto nila ni Henry ug Mildred Bennion Eyring niadtong Mayo 31, 1933, samtang si Henry Sr. usa ka inila sa kalibutan nga propesor sa Princeton University, gipadako si Hal sa usa ka rehiyon diin dunay gamay ra kaayo nga mga miyembro sa Simbahan nga ang mga Eyring mopahigayon og mga miting sa Igpapahulay diha sa ilang panimalay. Si Presidente Eyring mangomedya human niana nga siya ug ang iyang manghud, nga si Harden, naglangkob sa tibuok Primary sa branch, ug ang ilang magulang, nga si Ted, naglangkob sa tibuok Young Men. Ang ilang inahan, nga si Mildred, mao ang pianist ug lider sa musika, bisan kon dili kaayo siya makahinumdom kon giunsa niya pagbuhat kadtong duha.
Bisan wala makahimo sa pagsimba sa dakong ward wala kini makapugong kang Hal gikan sa sinugdanan aron makaangkon og pagpamatuod. “Akong nakat-unan nianang higayuna,” nahinumdom siya, “nga ang Simbahan dili usa ka building; ang Simbahan dili gani sa kadaghan sa mga tawo. Mibati ko nga duol sa Langitnong Amahan ug nasayud [bisan nianang higayuna] nga ang Simbahan ni Jesukristo sa mga Santos sa Ulahing mga Adlaw Iyang simbahan; dili igsapayan nga ang among gamay nga branch nagpundok didto sa among kan-anan.”
Sa dihang 13 anyos na si Hal, gidawat sa iyang amahan ang usa ka dako nga posisyon sa University of Utah. Ang batan-ong Henry mitambong sa sayo sa buntag nga seminary ug nalingaw nga magdula sa basketball team sa iyang high school, apan sa kaugalingon niyang pag-angkon wala gayud makabaton og suod nga personal nga mga higala.
Samtang mibati og kaguol alang sa iyang kaugalingon usa ka adlaw niana, nakadawat siya og usa ka impresyon nga nakapausab sa iyang kinabuhi. Iyang gibati nga pasidaan kadto gikan sa Dios: “Sa umaabut, kon imong mahibaloan kon si kinsa gyud ka, magmahay ka nga wala nimo gamita sa mas maayo ang imong oras.” Mitubag siya niana nga pag-aghat pinaagi sa pagbasa sa Basahon ni Mormon pipila ka higayon isip tin-edyer. Mibati usab siya nga nagiyahan sa libro ni Presidente David O. McKay nga Gospel Ideals, nga, lakip sa ubang mga butang, nagtudlo niya kon unsaon ang saktong pagtratar sa mga babaye, usa ka debosyon nga iyang gipakita sa tibuok niyang kinabuhi ngadto sa iyang pinalanggang asawa, nga si Kathleen.
Usa ka Damgo nga Natuman
Sukad sa pagkabata, ang mga damgo gayud ni Hal mao ang magminyo ug magkapamilya. Pirme gayud siyang naghunahuna sa iyang umaabut nga mga anak nga gihatagan na niya sila sa kinatibuk-ang angga nga “Ang mga Pula og Buhok,” nga naghunahuna nila nga dunay pula nga buhok sama sa iyang mama.
Kini nga damgo natuman atol sa iyang pagserbisyo isip magtatambag sa Boston District presidency, ang calling ni Hal sa Simbahan samtang nagpadayon sa iyang graduate work sa Harvard University human sa iyang undergraduate studies sa University of Utah. Isip usa ka estudyante sa doctoral sa ting-init sa 1960, girepresentar ni Hal ang district presidency atol sa usa ka debosyonal sa mga single adult nga gipahigayon sa Cathedral of the Pines didto sa habagatang-kasadpan sa New Hampshire, USA, usa ka natural nga amphitheater sa gawas nga sikat sa rehiyon. Atol sa kalihokan nakita niya ang usa ka batan-ong babaye nga nagsul-ob og pula ug puti nga sinina ug nakadayeg sa lunsay nga kamaayo nga iyang gipakita. Naghunahuna siya, “Kana ang labing maayo nga tawo nga akong nakita sukad. Kon makauban nako siya sa tibuok nakong kinabuhi, mahimo gyud kong maayo sa tanang gusto nakong mahimo.”
Ang batan-ong babaye mao si Kathleen Johnson gikan sa Palo Alto, California, USA, kinsa wala magtuo nga makaadto sa New England niana nga ting-init apan, tungod sa pagpamugos sa iyang higala, mitambong sa summer school uban niya sa Harvard. Human nianang debosyonal sa gawas, nakigsabut si Hal nga makigkita ni Kathy sa simbahan usa ka Dominggo niana ug nalipay nga makadungog nga malingaw siya nga magdula og tennis. Nagdulaan na si Hal og tennis pipila ka higayon sa usa ka semana kauban ang usa ka higala sa kolehiyo ug hanas nga atleta, mao nga nagtuo siya nga ang pagdula og tennis mahimong usa ka ideyal nga unang date ug usa ka paagi aron makahimo siya og nindot kaayong impresyon. Unsay wala masulti ni Kathleen niya nga siya diay ang captain sa iyang tennis team sa high school! “Mas maayo pa siya nako,” nagbagulbol gihapon si Hal mahitungod sa dula. Usa kini sa unang talagsaong mga ehemplo sa iyang umaabut nga asawa sa mapainubsanong pagpuyo ug dayon sa pagtabang sa iyang bana sa pagbuhat sa ingon.
Usa ka Bag-ong Dalan
Human sa ilang pagminyo ug pagkatudlo ni Hal ngadto sa faculty sa business school sa Stanford University, usa ka gabii na kaayo sa Disyembre 1970, pipila pa lang ka bulan sa wala pa ma-release si Hal isip bishop sa student ward sa Palo Alto, nangutana si Kathy og usa ka pangutana nga wala damha. Sa dayong higda ni Hal human sa usa ka mahagitong adlaw, mitakilid si Kathy ug nangutana, “Sigurado ka ba nga imong gibuhat kon unsay angay nimong buhaton sa imong trabaho?”
Ang iyang pangutana nakapakurat sa iyang bana. Ang tanan sa ilang kinabuhi morag perpekto. Ang umaabut morag hayag ug klaro, lakip na sa gipangandoy nga panimalay sa mga Eyring nga bag-ohay lang nga gidrowing ni Hal diha sa iyang journal. Naglakip kini sa mga detalye sama sa “usa ka kwarto alang sa mga proyekto, nga igong gidak-on ug dili dangug nga katrabahuan ug kabutangan og kayak,” kauban sa “dili mominus sa lima ka outlet sa kuryente diha sa lamesa sa kusina” ug “usa ka balay nga kapasilungan o kailisan sa mangaligo nga hilum nga dapit para magsulat.”
“Unsay buot nimong ipasabut?” Gipangutana ni Hal ang iyang asawa.
“Dili ka ba makahimo og mga pagtuon para ni Neal Maxwell?” misugyot siya, nga nagpasabut sa bag-ong Commissioner of Education sa Simbahan. Bahin niini, wala makatingog si Hal. Kausa ra niya mahimamat si Neal A. Maxwell, ug nasayud siya nga wala pa gayud siya mahimamat ni Kathleen. Gisulayan niya sa paghulagway ngadto sa iyang asawa nganong ang pagbalhin sa maong trabaho dili mohaum niya, apan miinsister siya nga bisan mag-ampo lang bahin sa maong butang. Iya dayon kining gibuhat, miluhod duol sa higdaanan ug mihalad og mubong pag-ampo. Sa dihang walay tubag nga miabut, gibati ni Hal nga nadesisyunan na ang maong butang ug natulog dayon.
Apan, pagkasunod buntag, nakadawat si Hal og duha ka lahi nga espiritwal nga mga impresyon nga mousab hangtud sa hangtud sa iyang trabaho ug sa iyang kinabuhi. Iyang nasulat ang duha diha sa iyang journal. Una, “Ayaw gamita ang imong tawhanong paghukom aron mawala ang mga oportunidad nga gipresentar nganha nimo: pag-ampo mahitungod niining tanan nga dunay bukas nga hunahuna.” Ug ikaduha, “Buhata ang mga buluhaton nga gisangun diha sa Simbahan ug sa imong propesyon sa maayong paagi kutob sa imong mahimo; preparasyon kini.”
Ang unang impresyon miabut isip usa ka pagbadlong nga gisunod ni Hal human niana. Human balibari ang tulo ka lain-laing tanyag sa trabaho nga wala mag-ampo bahin niini, misantup sa iyang hunahuna ang mga pulong, “Ayaw na gyud usba kana nga sayop. Wala ka masayud kon unsay makaayo sa imong propesyon.”
Pinaagi niining espiritwal nga direksyon nga presko pa sa iyang hunahuna, andam na si Hal sa dihang wala pa kaabut og tulo ka semana human niana, nanawag si Commissioner Maxwell aron mag-iskedyul og miting uban niya didto sa Salt Lake City. Midiretso si Brother Maxwell sa iyang tuyo. “Hangyuon ka nako nga mahimong presidente sa Ricks College,” miingon siya. Mitubag si Hal nga mag-ampo pa siya mahitungod niini. Iyang gibuhat ug ang mubo nga tubag nga iyang nadawat mao nga, “Ako kining eskwelahan.” Ang misunod, sama sa ilang giingon, kasaysayan na. Ang iyang serbisyo sa Simbahan sukad niana nahimong talagsaon kay kini dayag, nagpadayon nga miserbisyo isip Deputy Commissioner of Education ug dayon Commissioner (kaduha), gisundan sa mga tawag ngadto sa Presiding Bishopric, sa Korum sa Seventy, sa Korum sa Napulog Duha ka mga Apostoles, ug isip magtatambag sa tulo ka Presidente sa Simbahan.
Litrato uban ni Presidente Hinckley ug sa iyang asawa, nga si Kathy, gikan sa Deseret News; litrato gikan sa parada pinaagi ni Tom Smart, Deseret News
Apan sa tinuod gayud nga kahimtang alang kang Hal, walay calling diha sa Simbahan nga mas importante alang niya kay sa lain: “Ang kakapoy nga atong bation sa matag gutlo sa atong kinabuhi makatintal nato nga isalikway o dili dawaton ang calling sa pagserbisyo sa Manluluwas,” si Presidente Eyring nagtudlo. “Pipila niana nga calling morag dili importante, apan ang akong kinabuhi, ug ang akong pamilya, nausab alang sa mas maayo pinaagi sa akong pagdawat sa calling nga motudlo sa korum sa mga deacon. Gibati nako ang gugma sa mga deacon alang sa Manluluwas ug ang Iyang gugma alang nila.”2
Usa ka katapusang daw nagsumpaki: Hapit wala koy mahunahunaan nga akong nailhan ang mas supak sa panagbangi ug moabug sa kabayolente kay sa akong higala nga si Henry B. Eyring. Apan migradwar siya isip nag-una nga ROTC cadet sa iyang klase sa University of Utah ug miserbisyo sa iyang nasud nga dunay pasidungog sa Air Force sa Estados Unidos. Kon dunay tawo nga moadto sa gubat—ug sigurado nga didto kita sa usa nga nagsugod sa mga konseho sa langit—gustohon ninyo, una sa tanan, nga pangulohan sa usa ka tawo nga nagdumot sa mismong hunahuna bahin sa gubat. Apan kon ang (espiritwal) nga gubat mahitabo, nan mangamuyo kamo alang niana nga lider nga maghunahuna og klaro, gani sa makinaadmanong paagi, sa pagsukod sa matag taktikal ug estratehikong opsyon batok sa gipadayag nga doktrina, ug magsunod ug magtinguha sa kumpirmasyon sa Espiritu Santo sa matag desisyon nga iyang gihimo. Ang maong talagsaong depensa sa sagradong butang diha sa usa ka gubat batok sa bisan unsa nga dili balaan o pagpanamastamas nagpakita tingali sa katapusang kaputli sa usahay daw nagsumpaki nga kinabuhi ni Henry B. Eyring. Mapasigarbuhon kong moserbisyo diha sa iyang flight crew, sakay sa iyang barkong panggubat, o diha sa iyang foxhole.