Ang Gahum sa Hugot nga Pagtuo ug mga Istorya sa Pamilya
Mas dali kitang makabarug sa pagsagubang og mga pagsulay kon pamilyar kita sa mga hagit nga gisagubang sa atong kaugalingong mga katigulangan.
Kanunayng mibati si Rosalene Pacini og espesyal nga koneksyon sa iyang lola sa tuhod, nga si Elizabeth Xavier Tait, tungod sa puno sa pagtuo nga mga istorya nga gidak-an na ni Rosalene. Ang mga istorya ni Elizabeth bahin sa pagsalig sa Ginoo samtang mibiyahe siya gikan sa Bombay ngadto sa Liverpool paingon sa Zion, ingon man usab ang iyang paglahutay agi sa makapasakit sa dughan nga mga pagsulay, nakaagni sa imahinasyon ni Rosalene isip usa ka batan-on.
Kadtong mga istorya dunay importante nga papel sa pagpangandam ni Rosalene nga mopalambo ug mosalig sa samang matang sa pagtuo sa dihang nag-atubang siya og susamang mga hagit sa iyang kaugalingong kinabuhi.
Mibiya sa Panimalay, Nawad-an og Pamilya
Si Elizabeth, mga 1850, Bombay, India
Si Elizabeth Xavier usa ka edukada kaayo nga batan-ong babaye kinsa nakatagamtam og haruhay nga kinabuhi isip kabahin sa usa ka adunahan, halangdon nga pamilya sa India. Pero ang kinabuhi nausab sa hilabihan niadtong 1850 sa dihang naminyo siya ni William Tait, usa ka regimental drill master sa British navy kinsa nabunyagan ni Elder Parley P. Pratt didto sa Scotland.
Paghulagway pinaagi ni Michael T. Malm
Ang pamilya ni Elizabeth supak gayud sa iyang bunyag. Ang kaguol sa dili maayong mga relasyon gisundan sa trahedya sa pagkamatay sa iyang unang anak nga lalaki tungod sa sakit nga kolera. Dayon, walo ka bulan nga mabdos pero nangandoy nga makauban ang mga Santos ug mahimong usa ka mahangturong pamilya, gipadala ni Elizabeth si William ug ang ilang ikaduhang anak nga lalaki aron mag-andam og panimalay alang sa ilang pamilya didto sa Zion.
Human matawo ang bata, nangamuyo ang pamilya ni Elizabeth nga isalikway niya ang iyang bana ug ang iyang relihiyon ug magpabilin kauban nila. Pero lig-on sa iyang determinasyon nga mosunod sa Manluluwas, gibiyaan niya ang iyang pamilya ug yutang natawhan hangtud sa hangtud, milayag paingon sa Liverpool, England.
Si Rosalene, 2003, Colorado, USA
Nagdako si Rosalene isip kinamanghurang anak sa usa ka dako nga pamilya didto sa Enterprise, usa ka gamayng komunidad sa Habagatang Utah, USA. Duna siyay daghang oportunidad nga makasaksi sa gahum sa hugot nga pagtuo kang Jesukristo atol sa iyang katuigan diha sa panimalay ug sa iyang misyon. Human naminyo sa templo, gisugdan ni Rosalene ang usa ka biyahe nga mosulay o mopalig-on sa iyang pagpamatuod sa dihang ang iyang bana nagsugod og trabaho nga nakapalayo og maayo kaniya gikan sa panimalay.
Human makabalhin sa estado sa Colorado, nagtan-aw si Rosalene gikan sa layo samtang nakigbatok ang iyang inahan og kanser hangtud namatay pipila ka tuig human niana.
GIKAN SA STOCK.ADOBE.COM, UG GIKAN SA GETTY IMAGES
“Malipayon unta ko nga magpuyo sa akong lungsod nga natawhan duol sa akong mga ginikanan sa tibuok nakong kinabuhi,” miingon siya. “Nakapaguol kini kanako sa dihang kinahanglan nakong makat-on sa akong kaugalingon ug mobalhin. Ang mawad-an sa akong mama sakit kaayo. Bisan karon, walay adlaw nga molabay nga wala ko mingawa niya.
“Kinahanglan kong motuo nga dunay mga adlaw sa dihang gimingaw og maayo si Elizabeth sa iyang panimalay. Pero mituo siya kang Jesukristo ug mitugot sa Iyang gahum nga motrabaho diha sa iyang kinabuhi. Igo na kana aron makasugakod siya. Ang samang gahum nakatabang nako samtang misalig ko sa akong Langitnong Amahan alang sa kalig-on, maanaa man sa duol o wala ang akong pamilya dinhi sa yuta.”
Ang Kahapdos sa Kamatayon
Si Elizabeth, 1856, Liverpool, England
Sa taas nga biyahe sa dagat gikan sa India paingon sa England, ang masuso nga anak ni Elizabeth grabe gayud nga nasakit. Namatay siya ug gilubong didto sa Liverpool. Sa wala madugay miingon si Elizabeth nga ang pagkamatay sa iyang anak hilabihan ka sakit nga wala na siya masayud kon makapadayon pa ba siya. Naguol ug nag-inusara, pero gidasig ni Elder Franklin D. Richards sa Korum sa Napulog Duha ka mga Apostoles, kinsa nagserbisyo isip presidente sa European Mission, milayag si Elizabeth paingon sa Boston, Massachusetts, USA.
Si Rosalene, 2006, New York, USA
Sa wala madugay human gibalhin sa mga Pacini ang ilang nagkadako nga pamilya ngadto sa New York, nagbati og sayo si Rosalene. Gikonsiderar sa mga doktor ang pag-opera aron mapagawas ang bata tungod kay nagkaus-os ang pitik sa iyang kasingkasing. Pero sa dihang nahimo nang normal ang pitik sa iyang kasingkasing, mipauli ang pamilya nga nahuwasan.
Atol sa usa ka follow-up nga appointment pipila ka adlaw ang milabay, wala makabantay og pitik sa kasingkasing ang doktor. Ang ilang anak nga lalaki napagawas pipila ka oras ang milabay—nga patay nang daan.
“Ang pagkamatay sa akong anak sakit kaayo sa dughan,” miingon si Rosalene. “Wala pa gayud ako mobati og sama kahaw-ang sukad human nila gikuha ang iyang gamayng lawas gikan sa akong mga bukton.”
Mibiyahe ang pamilya ngadto sa Utah aron ilubong siya tupad sa inahan ni Rosalene. Sulod sa mga semana nga milabay, si Rosalene dili makabiya ug makapadayon sa iyang kinabuhi.
“Siguro nasabtan nako og gamay kon nganong naghunahuna si Elizabeth kon makapadayon pa ba siya,” miingon si Rosalene. “Pero nahimo niya. Mahimo natong makita ang atong kaugalingon niana nga kahimtang sa usa ka higayon sa atong kinabuhi. Pero dili kita mahimong mohunong. Magpadayon kita pinaagi sa pagsalig sa atong Manluluwas labaw pa sa atong gibuhat sa una, ug sa katapusan atong makita ang mga milagro nga naglibut kanatong tanan.”
Ang mga Tingtugnaw sa Kinabuhi
Si Elizabeth, 1856, Iowa, USA
Human makatabok sa kadagatan, nabantayan ni Elizabeth ang iyang kaugalingon diha sa usa ka bag-o gayud nga kultura. Mibiyahe siya pinaagi sa tren paingon sa Iowa, USA, ang katapusan sa padulngan sa tren nianang higayuna. Miabut pagka-Hulyo 1856, miapil si Elizabeth sa Willie handcart company.
Magpadayon Lang [Ever Onward], ni Joseph Brickey
Ang pag-antus sa Willie ug Martin handcart company narekord gayud og maayo. Ang mga pundok naulahi pagbiya nianang tuiga ug naabtan og sayo nga tingtugnaw didto sa Rocky Mountains. Nangaging ug kulang sa pagkaon, sobra sa 200 ang nangamatay.
Apil sa pundok sa tigluwas nga gipadala ni Presidente Brigham Young mao ang bana ni Elizabeth, nga si William. Ang managtiayon nagkita pag-usab diha sa lawom nga snow ug makapakaging nga hangin.
Human maulii didto sa Salt Lake City, gitapos sa managtiayon ang ilang biyahe didto sa Cedar City, pipila lamang ka milya kon asa nagsugod si Rosalene.
Si Rosalene, 2007, Hong Kong, China
Sama ni Elizabeth pipila ka henerasyon na ang milabay, sa wala madugay nabantayan ni Rosalene ang iyang kaugalingon nga mitabok sa kadagatan aron mopuyo sa dili pamilyar nga kultura sa dihang ang iyang bana midawat og posisyon didto sa Hong Kong.
“Ang ubang tawo milambo tungod sa kausaban ug adventure, pero morag sobra na kaayo kini alang nako,” miingon si Rosalene.
Nakakita na usab siya og kalig-on diha sa iyang Manluluwas ug diha sa plano sa Dios alang kaniya. Pinaagi sa suporta sa iyang pamilya ug minahal nga mga sister sa iyang ward, nakat-unan ra ni Rosalene ang pagmahal ug paghatag og bili sa iyang bag-o nga palibut ug mga kasinatian.
Naagian Na Kini Sa Uban Kaniadto
Samtang maningkamot kita nga mosunod kang Jesukristo, makaagi kitang tanan og mga pagsulay—ang kaugalingon natong mga kapatagan ug kadagatan nga tabukunon ug mapintas nga mga tingtugnaw nga sagubangunon. Pero naagian na kini sa uban kaniadto. Atong makit-an ang paglaum ug kalig-on diha sa ilang mga istorya bahin sa pagsalig sa Manluluwas.
Nahibalo si Rosalene nga morag anaa pa siya sa tunga-tunga sa iyang biyahe, pero kay nakakita sa kinatibuk-an sa istorya ni Elizabeth, dili niya kapugngan ang pagkonsiderar sa katapusan sa iyang kaugalingong istorya.
“Siguro duna koy pipila ka hiyas sama ni Elizabeth, siguro wala pud. Pero nanghinaut ko nga kon makita sa akong mga anak ang akong kinabuhi, makakita sila og mga pagkasusama—nga pareho kaming matinud-anon hangtud sa katapusan ug gitugutan namo ang among mga pagsulay nga mopalambo kanamo aron mas mahisama sa atong Manluluwas.”
Kay nahibalo sa kalig-on nga iyang naangkon gikan niadtong nakasinati na niini kaniadto, gipaambit ni Rosalene kadtong mga istorya ngadto sa iyang mga anak.
“Kay nahibalo sa ilang mga istorya, nahibalo kita nga mihimo sila og lisud nga mga butang,” miingon si Rosalene. “Ug nahibalo kita sa rason ug sa tinguha. Karon ako nang turno nga ipadayon kana nga tradisyon sa pagtuo diha ni Jesukristo ug ang pagpahinungod ngadto sa Iyang ebanghelyo, ug ipaambit kini sa kaugalingon nakong mga anak.”