Mga Young Adult
Pagdiskubre sa Akong Pagkabalaan
Ang tagsulat nagpuyo sa New York, USA.
Human sa katuigan sa panglimbasug nga madawat ang akong kaugalingon, sa katapusan nakasinati ko og milagro nga nakatabang nga akong masabtan ang akong mahangturong bili.
Mga paghulagway gikan sa Getty Images
Sukad pa sa akong pagkabata, nanglimbasug ko sa akong gibug-aton ug sa pagdawat sa akong kaugalingon. Sa sinugdanan, ang mga angga nga akong nadawat tungod sa akong gibug-aton morag wala ray epekto, pero paglabay sa panahon, nagsugod ko sa pagtuo nga ang negatibong mga butang nga nasulti mahitungod sa akong panagway nagpasabut usab og negatibong mga butang mahitungod sa akong personalidad.
Isip tin-edyer, nagsugod ko sa pagkaamgo nga, bisan kon ganahan ko sa akong pisikal nga mga characteristic, ang matang sa akong lawas wala mohaum sa mga gilauman sa kalibutan. Ug ganahan ko sa akong hilum nga personalidad, pero dili usab kadto ang gilauman sa mga tawo gikan nako—ang mga magtutudlo gusto nga mosulti ko sa klase, ang mga lalaki mas ganahan og tabian nga mga babaye, ug pirme ko sultihan nga kinahanglan ko nga mahimong mas outgoing kay sa kon unsa gayud ako. Sa hinay-hinay, ang akong bili sa kaugalingon nagsugod sa pagkaminus.
Sa akong katuigan sa young adult naguol ko, dili komportable sa akong lawas, ug nangutana nganong wala ko himoa sa Ginoo nga matahum og gamay ug mas makapainteresado. Gisulayan nako ang dugang pag-diet kay sa unsay angay nakong himoon, ug kataw-anan lang, sa dihang naningkamot ko nga mas mogaan, mas nagkabug-at hinoon ko. Ang pagpabiling dalaga, hilumon, ug sobra sa timbang nga young adult morag dili kaayo maayo.
Mibati ko nga napilde ug nakadesisyon nga mao ako kon unsa ako, bisan kon wala gayud ako makuhai og timbang nga gusto nako o mahimong mas tabian. Bisan kon mihunong ko sa pagkasuko og maayo sa akong kaugalingon, layo pa gihapon ko sa pagtan-aw sa akong kaugalingon isip usa ka matahum, importante nga anak sa Dios. Miundang na lang ko sa pagsulay nga makit-an ang akong bili.
Kahayag nga Akong Gikinahanglan
Usa ka adlaw dunay milagro nga nahitabo samtang nagbasa ko sa pakigpulong ni Sister Mary G. Cook, asawa ni Elder Quentin L. Cook sa Korum sa Napulog Duha ka mga Apostoles, gikan sa Septyembre 2016 nga tibuok kalibutan nga debosyonal alang sa mga young adult nga giulohan og “Find Joy in Everyday Life.” Akong nabasa: “Sa pag-anhi nato dinhi sa yuta, gidala nato ang atong balaang kinaiya isip mga anak sa Dios. Ang atong indibidwal nga bili nagagikan sa langit.” Akong gibati nga morag ang akong hunahuna sa katapusan nabuksan sa usa ka kahayag nga gikinahanglan kaayo nako pero akong gihunahuna nga dili gayud nako maangkon. Nakaamgo ko nga, sa una, mibati ko nga morag sayop nga ganahan ko sa akong kaugalingon tungod kay wala ko mohaum sa panglantaw sa kalibutan kon unsa gayud ang matahum, dunay bili nga babaye. Karon andam na ko nga moangkon nga ganahan ko sa akong hilumon ug yinabag nga personalidad, kalkag nga kulot nga buhok, brown nga mga mata, morag patatas nga ilong, dako nga pahiyum, ug bisan ang akong sobra sa gibug-aton nga lawas nga naghimo gihapon sa unsay gikinahanglan nako nga buhaton niini. Nagmapasalamaton ko nga nahimong nilalang sa Dios. Sa katapusan akong nasabtan nga wala Siya maglalang og mga sayop.
Human sa daghan kaayong katuigan sa emosyonal ug pisikal nga mga panglimbasug ug pag-antus, sa katapusan nakakat-on ko og kamatuoran nga alang sa daghan mahimong klaro na: ang akong indibidwal nga bili walay labut niining kalibutana! Gikan kini sa langit. Kanunay na kining anaa kanako, bisan kon wala ko makaamgo niini. Wala kini desisyuni sa media, sa akong mga kaedad, o ni bisan kinsa pero sa Langitnong Amahan ug ni Jesukristo, ug nagtan-aw Sila nako nga bililhon kaayo nga ang Manluluwas namatay alang kanako.
Usa ka Pundasyon diha ni Kristo
Ang pagkahibalo gikan sa Espiritu mahitungod sa akong bili diha sa atubangan sa Dios nakapausab nako sa daghan kaayong paagi. Nahigugma na usab ako sa kinabuhi. Mas mapasalamaton ko sa dili maihap nakong mga panalangin. Mibati ko og dakong tinguha nga maningkamot pa gayud sa pagbuhat sa unsay matarung ug mas motuo sa akong kaugalingon ug sa akong mga damgo. Nakapahimo ni nako nga gusto nga mas mabination ug mapailubon sa mga tawo sa akong palibut ug mas nakapaduol nako ngadto sa Manluluwas.
Ang mga tingog sa kalibutan kanunayng nanawag ug naghusga, pero karon duna na koy lig-ong kahibalo bahin sa akong bili nga dili gayud nako gustong kalimtan. Kana nga kahibalo nakahatag nako og kalinaw ug kalipay nga gusto nakong ipaambit sa tanan nga akong mahimamat. Pinaagi nianang debosyonal nga pakigpulong, akong nakat-unan nga bisan ang akong bili ug pagsalig sa kaugalingon magkinahanglan og lig-ong pundasyon diha ni Kristo aron “nga sa panahon nga ang yawa mopadala sa iyang mapintas nga mga hangin, oo, ang iyang mga panâ diha sa alimpulos, oo, sa diha nga ang tanan niya nga ulan nga yelo ug ang iyang mapintas nga unos mohampak diha kaninyo, kini walay gahum ibabaw kaninyo sa pagbitad kaninyo ngadto sa bung-aw sa pagkauyamot ug walay katapusan nga pagkaalaot, tungod sa lig-on nga sukaranan diin kamo natukod nga mao ang tinuod nga tukuranan, usa ka tukuranan diin kon ang mga tawo magtukod dili sila mapukan” (Helaman 5:12).
Mapasalamaton ko sa Ginoo ug sa mahangturong bili nga Iyang nakita diha kanatong tanan. Mapasalamaton ko alang sa dinasig nga kababayen-an sama ni Sister Cook nga naningkamot nga mosunod sa ebanghelyo ug mopaambit sa kaalam niini. Mapasalamaton ko alang niining kinabuhi, alang sa milagro sa atong mga lawas ug mga hunahuna, ug alang sa kabalaan nga anaa sulod sa matag usa kanato.