6 ka Rason nga Kita Nagkinahanglan sa Simbahan!
Daghang mga butang sa kinabuhi opsyonal. Apan aron mamahimong matang sa tawo nga kamo kinahanglang mahimo, kinahanglan nga inyong sundon ang plano sa Langitnong Amahan nga gihimo alang kaninyo.
Nakadungog ba kamo og usa ka tawo nga nangutana ngano nga kita adunay simbahan? O tingali nganong nagkinahanglan kita og simbahan? Ngano nga dili man lang sila mahimong espiritwal sa ilang kaugalingon—moadto sa kabukiran o sa baybayon o sa laing espesyal nga dapit ug mobati nga suod ngadto sa Dios—ug tawgon kini nga maayo?
Tinuod gayud nga ikaw mahimong suod ngadto sa Dios bisan asa ka (gani, usa kini ka nindot nga ideya!), apan ang Langitnong Amahan adunay mas daghan pa kay sa pagkaespiritwal lang. Gusto Siya nimo nga mahimong labing maayo kutob sa mahimo. Gani, gusto Siya nga ikaw makapanunod sa tanang Iyang gipanag-iya ug makaangkon og kinabuhing dayon. Ug Siya adunay plano ug organisasyon aron ikaw makahimo niana. Ang plano mao ang plano sa kaluwasan, ug Ang Simbahan ni Jesukristo sa mga Santos sa Ulahing mga Adlaw mao ang organisasyon—“ang tinuod ug buhi nga simbahan diha sa ibabaw sa tibuok yuta” (D&P 1:30).
Ania ang unom ka rason ngano nga kita nagkinahanglan sa Simbahan.
1. Sa Pagkat-on ug Pag-apil sa Ebanghelyo ni Jesukristo
Usa sa mga panalangin sa pagkamiyembro sa Simbahan mao nga kita makat-on sa kahingpitan sa ebanghelyo (tan-awa sa D&P 1:17–23). Kon kita adunay sinsero nga tinguha sa pagkat-on, ug kon kita mapainubsanon, mainampoon, makugihon, ug masulundon, kita makaangkon og pagpamatuod ug adunay paglaum sa Pagkabanhaw sa Pag-ula ni Jesukristo.
Pinaagi sa mga lider sa Simbahan ug mga materyal sa Simbahan, makat-on usab kita mahitungod sa ubang importante nga doktrina, lakip sa Pagpahiuli sa ebanghelyo, sa pagtawag sa mga propeta karon, ug sa tinuod nga matang sa Dios nga Kapangulohan. Ang pagsunod subay sa tinuod nga doktrina makahatag nato og hingpit nga kalipay.
2. Sa Pagdawat og Importante nga mga Ordinansa ug mga Pakigsaad
Ang trabaho sa Langitnong Amahan mao “ang pagpahinabo sa pagka-imortal ug sa kinabuhing dayon sa tawo” (Moises 1:39). Apan usahay tingali kita makalimot usab sa atong bahin! Maangkon nato ang mga panalangin sa kinabuhing dayon pinaagi sa pagsunod sa mga ordinansa ug mga pakigsaad sa ebanghelyo. Si Presidente Russell M. Nelson miingon: “Dili kita makahanduraw sa atong dalan ngadto sa presensya sa Dios. Kinahanglan nga mosunod kita sa mga balaod niadtong mga panalangin nga gipasikad [tan-awa sa D&P 130:20–21].”1
Ang mga ordinansa nga atong giapilan ug ang mga pakigsaad nga atong himoon gikinahanglan nato aron makabalik ngadto sa presensya sa atong Langitnong Amahan ug magpuyo uban Kaniya. Kadto nga mga ordinansa ug mga pakigsaad nagkinahanglan sa priesthood—nga anaa lamang sa tinuod nga Simbahan sa Dios. Kon wala kadto nga mga pakigsaad, mawala kita.
3. Sa Pagtabang sa Usag Usa Diha sa Dalan
Si Elder D. Todd Christofferson sa Korum sa Napulog Duha ka mga Apostoles mitudlo, “Usa ka dakong rason nga ang Ginoo adunay usa ka simbahan mao ang pagmugna og usa ka komunidad sa mga Santos nga mosuporta sa usag usa diha sa ‘higpit ug pig-ot nga dalan nga padulong sa kinabuhing dayon’ [2 Nephi 31:18].”2
Sa simbahan, makapalambo kita og maamumahong mga relasyon sa uban. Makatabang kita sa usag usa nga makalahutay sa malisud nga panahon, makagiya, ug makalakaw tupad sa usag usa (tan-awa sa “Ako Anak sa Dios,” Songbook sa mga Bata, nu. 2; Mga Taga-Efeso 2:19). Si Elder Jeffrey R. Holland sa Korum sa Napulog Duha ka mga Apostoles miingon, “Kitang tanan mga anak sa Dios, ug kinahanglan nga kita motudlo sa usag usa; magtinabangay kita sa ‘pagpangita sa dalan.’”3 Ang Simbahan mao ang sakto nga lugar sa pagbuhat niana!
4. Sa Pagtabang sa mga Pamilya nga Makaangkon og Kinabuhing Dayon
Laing dakong rason nga kita adunay Simbahan mao ang pagtabang sa mga pamilya nga makaangkon og kinabuhing dayon. Ang ordinansa sa sealing diha sa templo makatugot sa mga pamilya nga magkahiusa sa kahangturan. Aron kana mahitabo, kinahanglan kita magpuyo nga takus aron makadawat niana nga mga panalangin. Ang Simbahan motabang sa mga pamilya nga motabang sa usag usa sa pagbuhat niana.
Sama sa gitudlo ni Elder Christofferson, “Ang punto sa pagtudlo sa ebanghelyo ug sa mga ordinansa sa priesthood nga gipahigayon sa Simbahan mao nga ang mga pamilya mahimong takus sa kinabuhing dayon.”4 Sa ingon, ang Simbahan makatabang nato sa pagtuman niadto nga mga pakigsaad—ug makatabang nato sa pagsuporta sa usag usa.
5. Sa Pagpanalangin sa mga Tawo sa Tibuok Kalibutan
Si Elder Christofferson miingon nga samtang magtinabangay kita diha sa Simbahan, ang Langitnong Amahan “makakab-ot sa gikinihanglang mga butang nga dili mabuhat sa mga indibidwal o gagmay nga mga grupo.”5
Nasayud ka ba nga matag tuig sa milabay nga 30 ka tuig, ang Simbahan midonar og US$40 milyon nga bili sa welfare ug humanitarian aid ug mga proyekto sa pagserbisyo? Ang ubay-ubay nga mga donasyon ug pagserbisyo sa bolunter nga gitanyag sa mga miyembro sa Simbahan nakahimo sa mga butang nga dili mahimo sa laing paagi.
Pinaagi sa atong dili ordinaryo nga programa sa misyonaryo, ang mga misyonaryo mopakigbahin sa kahayag sa ebanghelyo uban sa mga tawo sa tibuok kalibutan. Dul-an sa 105,000 ka mga misyonaryo (lakip sa mga young adult ug mga senior) nga nagsebisyo. Wow! Daghan kana nga mga tawo kay sa populasyon sa pipila ka siyudad!
Ug tungod sa mga donasyon sa mga miyembro, ang Simbahan adunay mga kapanguhaan sa pagtukod og mga templo sa tibuok kalibutan. Kutob Abril 2018, adunay 182 ka templo ang gigamit, gitukod, o gipahibalo.
6. Sa Pagtukod sa Gingharian sa Dios dinhi sa Yuta
Usa sa labing importante nga mga rason nga gitukod sa Dios ang usa ka simbahan mao nga kini ang gingharian sa Dios dinhi sa yuta (tan-awa sa D&P 65). Ang Ginoo mitugyan kang Joseph Smith ug sa tanang mga propeta ug mga apostoles sa mga yawe sa priesthood. Si Elder Christofferson mitudlo, “Sa awtoridad niini nga mga yawe, ang mga opisyales sa priesthood sa Simbahan nagpreserbar sa kaputli sa doktrina ug integridad sa Iyang makaluwas nga mga ordinansa.”6
Pinaagi sa mga lider sa Simbahan, ang Ginoo makapangalagad sa Iyang buhat ug mangalagad sa Iyang mga anak. Kon wala ang maong pagpangulo, ang tanang matang sa mini nga mga ideya ug mga pagtulun-an mohulga nga dad-on kita sa kangitngit, sa ginadili nga mga dalan. Sa laing mga pulong, aron sa pagtabang nato nga makahibalo unsaon sa pagkab-ot sa kinabuhing dayon, kinahanglan kita sa panalipod nga gihatag sa tinuod nga gitawag ug giordinahan nga mga propeta ug mga apostoles. Mahitabo lamang kana sa Iyang Simbahan.