Hangtud sa Sunod Natong Panagkita
Padayon sa Pagpaningkamot
Gikan sa “If Thou Endure It Well,” Ensign, Nob. 1984, 20–22.
Aron mahimong mananaug sa lumba sa kinabuhing dayon nagkinahanglan kini og paningkamot—kanunay nga trabaho, pagpanglimbasug, ug paglahutay uban sa tabang sa Dios.
Litrato gikan sa Getty Images
Kon maghunahuna ko sa pasidaan sa Manluluwas nga magmalipayon sa pagbuhat sa tanan nga mga butang nga ubos sa atong gahum [tan-awa sa D&P 123:17], naghunahuna ko sa amahan sa nawala nga anak. Ang amahan naguol sa pagkawala ug sa kinaiya sa iyang masinupakon nga anak. Apan walay gihisgutan sa iyang pagbangutan, “Unsay akong nabuhat?” “Unsay akong nahimo nga silotan sa ingon?” O, “Asa ako napakyas?”
Hinoon ingon og gilahutay niya nga walay kasuko sa dili maayong kinaiya sa iyang anak ug midawat kaniya pag-usab uban sa gugma. “Kay kining akong anak namatay na, apan karon nabuhi siya pag-usab; siya nawala na, apan karon hingkaplagan siya. …” (Lucas 15:24).
Kon ang mga sakop sa pamilya mopakyas kanato, magkinahanglan kita nga magkat-on og paglahutay. Basta mopakita kita og gugma, pailub, ug pagsabut, bisan kon walay kausaban ang makita, wala kita mapakyas. Kinahanglan kitang mopadayon. …
Aron mahimong mananaug sa lumba sa kinabuhing dayon nagkinahanglan kini og paningkamot—kanunay nga trabaho, pagpanglimbasug, ug paglahutay uban sa tabang sa Dios. …
… Kasakit ug mga babag moharong natong tanan. Makasinati kita og kaguol, kasubo, kamatayon, mga sala, kahuyang, mga katalagman, pisikal nga sakit, kasakit, kaguol sa hunahuna, dili makiangayon nga pagpanaway, kamingaw, o pagsalikway. Unsaon nato sa pagdawat niini nga mga hagit maoy motino kon kini mahimo bang mga babag o makatabang nato. Ngadto sa maisugon kini nga mga hagit makahimo nga posible ang kauswagan ug kalamboan. …
Usahay isip mga anak sultihan ta nga ang tanan maayo ra. Apan ang kinabuhi dili ingon niana. Bisan kinsa ka, ikaw makabaton og mga problema. Ang trahedya ug kapildihan mao ang wala paabuta nga mga babag sa mga plano sa kinabuhi. …
… Ang pagkabantog mao ang labing maayong sukod kon unsa ka maayo ang usa ka indibidwal motubag sa mga panghitabo sa kinabuhi nga ingon og sa hingpit dili makiangayon, dili resonable, ug dili angay. …
… Si Jesus mao ang Kristo. Usa sa Iyang mga timailhan sa kabantog, sa Iyang paglahutay, nagbarug kanunay nga lamdag alang sa atong pagsunod. Atol sa Iyang yutan-ong pagpakabuhi gilahutay Niya pag-ayo samtang Siya nag-antus sa panghingutas ug pagsalikway sa pinakagrabe nga matang. Mosaksi ko nga ang Dios motabang nato sa paglahutay samtang maningkamot kita sa pagsunod sa Iyang mga pagtulun-an, magtinguha sa Iyang giya, ug motuman sa iyang mga sugo.