Sa Pulpito

Unsa ang Hugot nga Pagtuo?

Ni Mary B. Ferguson

Mary B Ferguson

Litrato ni Sister Ferguson sa maayong kabubut-on sa Church History Library; gikwadro gikan sa Getty Images

Mahitungod ni Sister Ferguson

Si Mary Tyndale Baxter Ferguson (1826–1909) natawo sa Glasgow, Scotland, ug nailo sa bata pa. Human siya gipaila-ila sa Mormon nga mga misyonaryo, si Sister Ferguson mabalak-on, apan sa pagsige niya pagtuon mas nakahibalo siya nga ang Simbahan tinuod. Nabunyagan siya niadtong Oktubre 1846 ug mirekord nga isip resulta, “ang akong tanang mga higala mibiya nako ug ang akong ngalan gisalikway ingon nga dautan, tungod sa ebanghelyo.”

Sa komperensya sa Simbahan sa Scotland, nahimamat ni Mary si John Baxter, nga iyang giminyoan niadtong 1849. Mibalhin sila ngadto sa Estados Unidos niadtong 1851. Giatiman niya ang iyang bana tungod sa dili maayo nga panglawas, ang resulta sa pagtrabaho sa daghang mga tuig sa mina sa karbon. Namatay si John niadtong 1869, mibilin ni Mary nga moatiman sa ilang pito ka anak. Gihisgutan sa iyang haya ang iyang “pakigbisog sa pagpadako ug pag-atiman sa dako kaayo nga pamilya sa gagmayng mga bata, apan ang Ginoo nakadungog sa iyang pangamuyo ug mipanalangin kaniya ug milig-on kaniya.”

Si Sister Ferguson misuporta sa iyang pamilya isip usa ka nurse ug midwife. Naminyo ra siya pag-usab ug mibalhin ngadto sa Spanish Fork, Utah, nagserbisyo og daghang mga tuig isip presidente sa Relief Society didto. Ang iyang kasinatian mipadayag sa iyang pasalig ngadto sa Dios bisan pa sa mga hagit sa iyang kinabuhi. Ang pakigpulong nga gikutlo dinhi gihatag ngadto sa mga batan-ong babaye niadtong 1879.

pioneers around campfire

Paghulagway pinaagi ni Dan Burr

Samtang ang pagtuo mao ang unang baruganan sa ebanghelyo, gikinahanglan ang pagpangutana, Unsa ang hugot nga pagtuo? Ang mga kasulatan nagsulti nato nga “ang hugot nga pagtuo mao ang kasiguroan sa mga butang nga gilauman, ang katin-awan sa mga butang nga dili makita” [Hubad ni Joseph Smith, Mga Hebreohanon 11:1]. … Sa ingon kon kita mosunod sa ebanghelyo, mosunod ang mga panalangin; apan kon kita moingon nga kita mituo ug dili mosunod, nan kawang ang atong pagtuo. Sama kini sa lawas nga walay espiritu, patay na. Tungod niining buhi nga hugot nga pagtuo, akong batan-ong mga igsoong babaye, nga nakaingon sa inyong mga amahan ug mga inahan sa pagsunod sa ebanghelyo sa ilang kaugalingong yuta ug panimalay; taliwala sa pagbiay-biay ug pagpanggukod, pinaagi sa hugot nga pagtuo nga ilang gibiyaan ang ilang mga panimalay ug mga kaliwat ug sa tanan nilang mahal nga kabtangan ug misakay og barko sa dakong lawod, … misalig sa gahum ni Jehova nga luwas nga modala nila ngadto sa dapit sa kapahulayan; ug daghan kanila nga wala gayud makasinati og mga pagsulay ug mga kalisud sa kinabuhi. … Hunahunaa kini, akong batan-ong mga igsoong babaye: ang inyong mga amahan ug mga inahan nagbiyahe og sobra sa liboan ka milya (1,609 km) nagguyod og kariton, nga gikargahan sa ilang pagkaon ug mga gamit sa pangkatulog, sa pagluto, mga sinina ug uban pa, daghan nila dunay gagmay nga mga bata; mitabok sa mga suba nga taga-hawak ug miagwanta sa taas nga agianan sa grabe nga balas, ug bisan pa sa ilang campfire sa gabii ang ilang mga kanta sa pagdayeg natisok sa ilang mga dughan; aduna silay kasiguroan nga wala makita; pinaagi sa hugot nga pagtuo nakaabut sila niining mga walog; dili pa kini ang tambok nga mga walog nga inyong nakita karon. Pinaagi sa hugot nga pagtuo ilang giugmad ang yuta nga dili matuboan ug pinaagi sa mga panalangin sa Dios milampos sa paghimo sa kamingawan nga mamulak sama sa rosas. …

Magkulang ang akong panahon sa paghisgot sa mga pagsulay sa atong hugot nga pagtuo tungod sa mga gangis, apan-apan, huwaw, baha, ug usab sa pagpanggukod sa atong mga kaaway; apan sa tanan kita napanalanginan pag-ayo ug malipayon nga katawhan; ug pinaagi sa hugot nga pagtuo tumong nato nga motubo ug modaghan ug mokatap sa lagyong dapit, sama ni Abraham sa karaan, sa atong pagdaghan nga walay katapusan.

Karon, akong minahal nga mga batan-on, ayaw kamo paghunahuna nga tungod kay daghan kami og nahimo wala na kamoy buhaton; kinahanglan mokatap kamo sa lagyong dapit. Ayaw kamo paghunahuna nga ang teritoryo sa Utah makapaigo sa mga anak sa Zion. Kinahanglan kamong magtukod og bag-ong mga kolonya. …

Busa, pakigbisog kamo sa pagpanalipod sa tinuohan niining katapusang mga adlaw ngadto sa inyong mga amahan, nga kamo unta makahimo pinaagi sa hugot nga pagtuo sa pagpahinabo sa mga katuyoan ni Jehova; ug hinaut nga ang makapausab nga impluwensya sa Espiritu sa Dios mosulod diha sa mga anak sa Zion, nga kini mahimong aktibo makapalimpyo diha kanila, mamunga og daghang mga bunga ngadto sa pagkamatarung.

Kining serye naghatag og importansya sa kinabuhi sa mahalarong kababayen-an ug sa ilang mga mensahe, gikutlo gikan sa libro nga At the Pulpit: 185 Years of Discourses by Latter-day Saint Women (2017).