Makaserbisyo ba Ako Didto?
Gikan sa unang sentimo nga akong gibutang sa akong alkansiya alang sa misyon, nasayud ko nga gusto ko nga moserbisyo. Nagtigum ko og kwarta sulod sa 12 ka tuig sa dihang ang pahibalo miabut nga ang mga sister makaserbisyo na sa edad nga 19. Bisan og wala ko makasiguro kon sakto na ba ang panahon alang nako, ang Ginoo mitubag sa akong mga pag-ampo, ug gibati nako nga nadasig nga sugdan ang akong mga papeles sa misyon.
Gusto ko nga ang akong tawag sa misyon mao ang sakto alang kanako ug nasayud nga ang pagkamatinuoron ngadto sa akong mga lider sa Simbahan, ilabi na sa akong panglawas, mao ang bugtong paagi nga mobati og kalinaw. Duna koy patol, usa ka kondisyon nga makaingon sa dili matagna nga pag-ataki. Maayo na lang, kay ang akong kondisyon makontrolar sa hingpit sa tambal. Sa gihapon, posible nga ang akong pag-salig niini makahatag og limitasyon asa ako makaserbisyo.
Hunahunaa ang akong kasurprisa sa dihang gitawag ko nga moserbisyo sa Dominican Republic Santo Domingo East Mission! Adunay problema: akong nahibaloan nga ang akong tambal wala didto sa Dominican Republic. Naglibug ko. Ngano nga ang Ginoo midasig sa mga lider sa Simbahan sa pagpadala nako didto nga wala man ang akong tambal didto?
Ang akong pamilya ug ako nag-ampo alang sa tubag. Gibati nako ang kusog nga kombiksyon nga ang Ginoo gusto gayud nga ako moserbisyo sa Dominican Republic, mao nga naningkamot mi. Ang akong doktor misulat nako og 18 ka bulan nga resita, apan ang among insurance mobayad lamang og usa ka tuig nga bili sa tambal, maong kami ang mobayad sa katapusang 6 ka bulan. Sa among pagpadayon uban sa hugot nga pagtuo, sa katapusan nakakita mi og resonable nga opsyon.
Sa dihang na-set apart ko, ang akong presidente sa stake mipanalangin nako nga ang akong kondisyon dili makaapekto nako sa akong misyon—usa ka saad nga ako makapamatuod nga natuman. Bisan og ako gihagit sa akong pisikal nga mga limitasyon, nasayud ko nga pinaagi sa Pag-ula ni Jesukristo, makahimo ko sa pagbuntog sa mga hagit nga akong giatubang sa dili pa ug atol sa akong misyon.