5 ka Butang nga Itudlo sa Doktrina ug mga Pakigsaad Kanimo mahitungod sa Pagkahimong Misyonaryo
Kon ikaw nag-andam alang sa misyon o nangita og mga paagi sa pagpakigsulti sa imong mga higala mahitungod sa imong mga pagtuo, niay giya nga nindot kaayo nga mahimo nimong tawgon nga laing manwal sa misyonaryo.
Kini ang Doktrina ug mga Pakigsaad. Niini makita nato ang bag-ong gipadayag ug maanindot nga mga doktrina mahitungod sa mahangturong mga pamilya, unsay mahitabo kon kita mamatay, ug giunsa pag-organisar ang Simbahan ni Jesukristo. Apan makita usab nato—nga gibalik-balik—ang mga sugo sa pagpakigbahin sa ebanghelyo. Gani, uban sa tanang mga saad ug mga pahimangno nga gihatag niini sa mga misyonaryo, mahimo nimong isipon kini nga basahon sa kasulatan isip giya sa pagpakigbahin sa ebanghelyo.
Pananglitan, ania ang lima ka talagsaong mga kamatuoran nga imong makat-unan mahitungod sa misyonaryo nga buhat gikan lang sa pagbasa sa Doktrina ug mga Pakigsaad.
1. Dili ka kinahanglang mabalaka asa ka paingon.
D&P 80:3: “Busa, panglakaw kamo ug isangyaw ang akong ebanghelyo, gani ngadto sa amihanan o ngadto sa habagatan, ngadto sa silangan o ngadto sa kasadpan, kini dili igsapayan, kay kamo dili molakaw nga masayop.”
“Dili ko motuo nga ang mga pulong nga ‘kini dili igsapayan’ nga gigamit sa Ginoo niini nga kasulatan, nagsugyot nga wala Siya maghunahuna kon asa mangalagad ang Iyang mga sulugoon. Sa pagkatinuod, naghunahuna Siya og maayo. … Iyang dasigon, giyahan, ug tudloan ang Iyang gitugutan nga mga sulugoon. Samtang ang mga misyonaryo maningkamot nga mahimong mas takus ug sarang nga mga himan sa Iyang mga kamot ug mohimo sa ilang labing maayo aron matinud-anong motuman sa ilang mga katungdanan, nan uban sa Iyang tabang sila ‘dili masayop’—bisan asa sila moserbisyo.”1
—Elder David A. Bednar
2. Mahala ang mga kasulatan, ug ikaw makahibalo unsay isulti.
D&P 84:85: “Mahala sa kanunay diha sa inyong mga hunahuna ang mga pulong sa kinabuhi, ug kini ihatag kaninyo niini nga takna kana nga bahin nga igahin ngadto sa matag tawo”
“Sa paghatag nimo og importansya sa mga pulong sa mga kasulatan ug sa mga propeta sa ulahing mga adlaw pinaagi sa pagtuon ug hugot nga pagtuo, ang imong tinguha sa pagpaambit sa ebanghelyo modako. Ikaw gisaaran nga ang Espiritu motabang kanimo nga mahibalo kon unsay isulti kon ikaw magtudlo.”2
—Isangyaw ang Akong Ebanghelyo
3. Ang mga tawo nga nangita sa ebanghelyo anaa bisan asa.
D&P 123:12: “Kay aduna pay daghan sa ibabaw sa yuta diha sa tanan nga mga tinuohan, mga pundok, ug mga pundok sa relihiyon, kinsa nabutaan pinaagi sa maliputon nga paglingla sa mga tawo, diin sila naghulat aron sa pagpangilad, ug kinsa natago gikan sa kamatuoran tungod kay sila wala masayud asa kini pangitaa.”
Naglibut kaninyo, matag adlaw, ang mga higala ug silingan ‘kinsa natago gikan sa kamatuoran tungod kay sila wala masayud asa kini pangitaa.’ Samtang kamo giaghat sa Espiritu, mahimo kamong mopakigbahin og hunahuna, pagdapit, text o tweet nga mopaila sa inyong mga higala sa mga kamatuoran sa gipahiuli nga ebanghelyo.”3
—Elder David A. Bednar
4. Pag-ampo og maayo aron makatudlo og maayo.
D&P 42:14: “Ug ang Espiritu ihatag nganha kaninyo pinaagi sa pag-ampo diha sa hugot nga pagtuo; ug kon kamo dili makadawat sa Espiritu kamo dili angayang motudlo.”
“Ang mga misyonaryo kinahanglang moluhod ug mangamuyo sa Ginoo sa pagpaluag sa ilang dila ug mamulong pinaagi niini sa pagpanalangin niadtong ilang tudloan. Kon buhaton nila kini, usa ka bag-ong kahayag ang moabut sa ilang kinabuhi. Adunay tumang kadasig alang sa buhat. Makahibalo sila nga sa tinuod nga pagsabut, sila mga sulugoon sa Ginoo nga namulong alang Kaniya. Ilang mabantayan ang lain-laing tubag gikan sa ilang gitudloan.”4
—Presidente Gordon B. Hinckley (1910–2008)
5. Ang Espiritu Santo mopamatuod niadtong imong sultihan.
D&P 100:7–8: “Apan usa ka sugo Ako mohatag nganha kaninyo, nga kamo mopahayag sa bisan unsa nga butang nga inyong ipahayag sa akong ngalan, diha sa kaligdong sa kasingkasing, diha sa espiritu sa kaaghup, sa tanan nga mga butang. Ug Ako mohatag nganha kaninyo niini nga saad, nga kon mohimo kamo niini ang Espiritu Santo mosangyaw sa pagpamatuod ngadto sa tanan nga mga butang bisan unsa ang inyong isulti.”
“Ang Espiritu Santo makalihok pinaagi sa Kahayag ni Kristo. Ang usa ka magtutudlo sa mga kamatuoran sa ebanghelyo wala magtanom og butang nga wala mailhi o bag-o alang sa usa ka hamtong nga tawo o bata. Kon dili, ang misyonaryo o magtutudlo nakigkontak sa Espiritu ni Kristo nga anaa nang daan. Ang ebanghelyo ingon og ‘sinati’ na nila.”5
—Presidente Boyd K. Packer (1924–2015)
Paghimo og Tumong
Kini sinugdanan pa lamang. Samtang ikaw magtuon sa Doktrina ug mga Pakigsaad niining tuiga, paghimo og tumong sa pagkat-on kutob sa imong mahimo mahitungod sa misyonaryo nga buhat. Dayon buhata ang tanan sa pagsugod sa pagsunod sa pipila niini nga mga pagtulun-an. Hinumdumi: “Busa, kon kamo adunay tinguha sa pag-alagad sa Ginoo, kamo gitawag ngadto sa buhat; kay tan-awa ang umahan puti ug andam na sa pag-ani” (D&P 4:3–4).