Ang Katapusang Pulong
Unom ka mga Paagi aron sa Paghinumdom Kanunay sa Manluluwas
Ni Elder Gerrit W. Gong
Sa Korum sa Napulog Duha ka mga Apostoles
Gikan sa pakigpulong sa Abril 2016 nga kinatibuk-ang komperensya.
Matag semana, sa pag-ambit sa sakrament, makigsaad kita nga kanunayng mohinumdom sa Manluluwas. Migamit sa dul-an sa 400 ka mga pakisayran sa kasulatan [scripture reference] sa pulong nga mohinumdom, aniay unom ka paagi nga kita kanunayng makahinumdom Kaniya.
Una, kanunay kitang makahinumdom Kaniya pinaagi sa pagkamasaligon sa Iyang mga pakigsaad, mga saad, ug mga kasiguroan.
Ikaduha, kanunay kitang makahinumdom Kaniya pinaagi sa mapasalamatong pag-ila sa Iyang impluwensya sa tibuok natong kinabuhi.
Ikatulo, kanunay kitang makahinumdom Kaniya pinaagi sa pagsalig sa dihang ang Ginoo mipaniguro kanato nga “Siya kinsa naghinulsol sa iyang mga sala, ang mao gipasaylo, ug Ako, ang Ginoo, dili na mahinumdom kanila.” (D&P 58:42).
Ikaupat, Iya kitang gidapit sa paghinumdom nga Siya kanunayng moabi-abi kanato sa pagpauli.
Ikalima, kanunay kitang makahinumdom Kaniya sa adlawng Igpapahulay pinaagi sa sakrament. Sa katapusan sa Iyang mortal nga pagpangalagad ug sa pagsugod sa Iyang pagpangalagad—human sa pagkabanhaw—ang atong Manluluwas mikuha og pan ug tubig ug mihangyo nga atong hinumduman ang Iyang lawas ug dugo.
Sa ordinansa sa sakrament, mosaksi kita sa Dios nga Amahan nga kita andam sa pagdala nganha kanato sa ngalan sa Iyang Anak ug kanunayng mohinumdom Kaniya ug maghupot sa Iyang mga sugo, nga Iyang gihatag kanato, nga kita sa kanunay makabaton sa Iyang Espiritu uban kanato (tan-awa sa Moroni 4:3; 5:2; D&P 20:77, 79).
Sa katapusan, ang ikaunom, nagdapit kanato ang Manluluwas sa kanunay nga paghinumdom Kaniya sama sa Iyang kanunay nga paghinumdom kanato.
Ang atong Manluluwas nag-ingon:
“Oo, kini sila mahikalimot tingali, apan Ako dili gayud makalimot kanimo.
“Tan-awa, Ako mikulit kaninyo diha sa mga palad sa akong mga kamot” (Isaias 49:15–16; tan-awa usab sa 1 Nephi 21:15–16).
Nagpamatuod Siya: “Ako mao siya kinsa gibayaw. Ako si Jesus nga gilansang sa krus. Anak Ako sa Dios” (D&P 45:52).
Mapaubsanon kong mopamatuod ug manghinaut nga kita sa kanunay mohinumdom Kaniya—sa tanang panahon, sa tanang butang, ug sa tanang dapit kon asa man kita (tan-awa sa Mosiah 18:9).