Vakabibitaki na Veiqaravi

Sa na vakacegu na veituberi kei na siko vuvale, a kacivaka o Peresitedi Russell M. Nelson ena soqoni ni yakavi ni Sigatabu ni koniferedi raraba. “Na Veiqaravi,” e dua “na iwalewale vou ka vakalou” ni veikauwaitaki Vakarisito vei ira na tani, ena vakarautaka e dua na sasaga semati me sotava na gagadre vakayalo ka vakayago talega.

Erau a vosa talega o Sister Jean B. Bingham, na Peresitedi Raraba ni iSoqosoqo ni Veivukei, kei Elder Jeffrey R. Holland ena Kuoramu n iApositolo Le Tinikarua ena ivakarau ena vakamuai kina vakavinaka cake na igu ni veikuoramu ni Matabete i Melikiseteki kei na iSoqosoqo ni Veivukei mai na iwalewale vou oqo me ia na veiqaravi me vaka na iVakabula (raica na tabana 101 kei na 104).

Me ra veiqaravi na iSakisaki kei na Leba vakaitokani ni veiqaravi vei ira na marama ena iSoqosoqo ni Veivukei. Ena dua na veivakatarogi vakavulatolu, era na veitalanoa na turaga kei na marama dauveiqaravi kei ira na iliuliu baleta na leqa kei na veika vinaka vei ira era qarava. Na iwiliwili ni veivakatarogi era vakayacora na iliuliu ena dua na vulatolu sai koya duadua na ripote volai ena vakayacori. Sa bibi me ia na veisikovi ena gauna e rawa kina, ia e sega ni okati ena veiqaravi e dua na ivakarau tudei me vakayacori kina na veitaratara e veivula.

“Era rawa ni wasea na itabagone na isolisoli duidui kei na tubu vakayalo ena nodra veiqaravi tikivi ira na qasecake ena cakacaka ni veivakabulai,” e kaya o Sister Bingham. Nodra vakaitavitaki na itabagone ena vakalevutaka talega na iwiliwili ni lewenilotu era veiqaravi vei ira na tani ka vukei ira na itabagone me ra “vakarau vakavinaka me ra qarava nodra itavi vakailiuliu ena Lotu kei na itikotiko ka ra vakaitavi talega ena matavuvale.”

“O keimami ena valenivolavola liu ni Lotu e sega ni gadreva me kila na ivakarau se na vanua se na gauna o veitaratara kina kei ira na nomu tamata,” e kaya o Elder Holland; “keimami gadreva ga me kila ka kauwaitaka ni ko ni sa vakayacora vakakina ka vakalougatataki ira ena veisala kece sara o ni rawata.”

Me vaka na ivola mai vei iratou na Mataveiliutaki Taumada, na veisau ena veiqaravi ena taura toka e dua na gauna ia e dodonu me caka ena kena gauna totolo ga e rawa. Na Ministering.lds.org e solia na ikuri matailalai, oka kina na isau ni veitaro dau tarogi wasoma. Ena vakuri ena mata oya ena veisiga kei na macawa lako mai na vidio veidusimaki kei na ivurevure tale eso.

Tekivu mai na June, ena okati ena Liaona e dua na itukutuku vakavula na “iVakavuvuli ni Veiqaravi” me vukea nodra kila na lewenilotu na ivakarau me Vakarisito vakalevu cake kina nodra veiqaravi vakataki ira.