Elder José A. Teixeira
Mataveiliutaki ni Vitusagavulu
A nanuma lesu o Elder José A. Teixeira e dua na lesoni a vulica ni se gonetagane mai Potukali. Ena dua na soqo vakamatavuvale, a dro me la’ki siwa. E vakila ni dodonu me tukuna vei rau nona itubutubu na vanua e lako kina, ia a mani lewa me kua, ni rau osooso tiko ena veivosaki.
Ena vica na auwa e muri, rau qai kunei koya nona itubutubu lomaleqa e batini uciwai. Mai na veika a sotava oya, a vulica me talairawarawa sega walega vei rau nona itubutubu ia ena vakasolokakana talega ni Yalo Tabu.
Me tekivu mai na gauna oya, sa vakaitovotaki koya o Elder Teixeira me dau rogoca na domo malua lailai. Eratou a vakaveikilaitaki kei na nona matavuvale ki na kosipeli ena 1976, ni oti na kena dolavi o Potukali ki na cakacaka ni kaulotu. A papitaiso o koya ni yabaki 16 ka qai veiqaravi e muri ena Tabana ni Kaulotu mai Lisbon Portugal.
“E tiko ena noda digidigi na mana sega ni cakitaki rawa me veisautaka noda bula,” e kaya o Elder Teixeira, ka a tokoni me lewe ni Mataveiliutaki ni Vitusagavulu ena 31 ni Maji, 2018. “Na isolisoli oqo e dua na ivakatakilakila matalia ni veivakabauti ena vukuda ia ena gauna vata oqori sa itavi ni tamata yadua me vakayagataka ena yalomatua,” a vakavulica ena koniferedi raraba ni Epereli 2009.
A rawata o Elder Teixeira na koroi ni daunivika kei na vakatulewa ni bisinisi ka cakacaka ena Lotu vakadauniyau raraba. A veiqaravi talega ena Mataivalu Waqavuka ni Potukali me tiki ni dua na tabana ni NATO. Ena gauna oya, a kacivi me dairekita ni veika raraba ni vanua ena Lotu. Sega ni dede, rau sa sota kei na watina, o Maria Filomena Lopes Teles Grilo. Erau a vakamau ena 1984 ena Valetabu mai Bern Switzerland ka rau nodra itubutubu e tolu na gone.
A sucu o José Augusto Teixeira da Silva mai Vila Real, Potukali, ena 24 ni Feperueri, 1961. Sa veiqaravi o koya vakadaunivakasala ena matabisopi, peresitedi ni tikina, peresitedi ni iteki, Vitusagavulu ni iWasewase, ka peresitedi ni Tabana ni Kaulotu e Brazil São Paulo South. A tokoni me Vakaitutu Raraba ena Vitusagavulu ena ika 5 ni Epereli, 2008. E veiqaravi tiko oqo vaka-Peresitedi ni iWasewase na Ceva kei Amerika ena Ceva ka na tekivu veiqaravi ena Mataveiliutaki ni Vitusagavulu ena 1 ni Okosita, 2018.
Mai na veika kece tale, e vakasalataki keda o Elder Teixeira ena koniferedi raraba ni Epereli 2015 me da “vakatitobutaka noda kila na iVakabula. … Meda sa kakua ni lokuca ki na siga ni mataka na veika eda rawa ni cakava nikua. Oqo na gauna me da lako mai kina vei Karisito.”