Soqoni ni Matabose ni iMatai ni Siga Tabu

Ena imatai ni Sigatabu ni veivula, na soqoni ni kuoramu kei na Soqosoqo ni Veivukei ena sega ni oka kina na lesoni e vakatavulica e dua na qasenivuli. Me kena isosomi, era na liutaka na soqoni ni matabose na mataveiliutaki ni kuoramu ni italatala qase kei na iSoqosoqo ni Veivukei. Ena soqoni ni matabose ni imatai ni Siga Tabu oqo, era na veivakasalataki vakai ira na kuoramu ni italatala qase kei na iSoqosoqo ni Veivukei me baleta na nodra dui ilesilesi, madigi, kei na veibolebole; ka vuli mai na nodra rai titobu se veika era sotava; ka tuvanaka na sala mera vakayacora kina na veika a uqeti ira kina na Yalo. Na veivosaki oqo me na vakadeuci kina na ivolanikalou veidonui kei na nodra ivakavuvuli na parofita era bula tiko.

Era na sega ni tautauvata na veisoqoni yadua ni matabose. Oqo eso na idusidusi me vukea nodratou liutaka vagumatua na mataveiliutaki na matabose.

Ni se bera na soqoni ni matabose

Mo dou:

Kila rawa tu na veika e gadrevi, madigi, kei na bolebole
Digitaka ena masumasu e dua na ulutaga me veivosakitaki.
Sureta na lewe ni kuoramu se ira na marama ni iSoqosoqo ni Veivukei mera vakavakarau tiko mai mera na mai wasea na nodra nanuma kei na veika era sa sotava.

Kakua ni:

Vakarautaka e dua na lesoni
Vakasamataka tiko mai e dua na iwali digitaki se na ka me caka.

Ena gauna ni soqoni ni matabose

Mo dou:

Sureti ira na lewenikalasi mera wasea na gauna era a cakava kina na veivakauqeti vakayalo kei na ituvatuva mai na veisoqoni sa oti.
Vakaraitaka na ulutaga ni soqoni ka vakayaloqaqataki ira na lewenikalasi mera veivakasalataki vakai ira baleta na ulutaga, ka vakasaqara na kena iwali kei na veidusimaki mai na ivolanikalou, nodra vosa na parofita, kei na Yalo Tabu.
Tu vakarau mo cakava na veika sa veivosakitaki. E rawa ni oka kina na ituvatuva vakailawalawa se nodra ituvatuva yadua na tamata.

Kakua ni:

Lewa na veivosaki.
Tovolea mera vakauqeti na kalasi ena nomu nanuma.
Veivosakitaka na veika rivarivabitaki se ka maroroi.
Vakavulica e dua na lesoni.
Vakasaurarataka e dua me vakaitavi.

Ni sa oti na soqoni ni matabose

Mo dou:

Taleva lesu na ituvatuva kei na ilesilesi a vakayacori ena soqoni ni matabose.
Vakasaqara na sala mera oka kina o ira a sega ni tiko ena soqoni ena vuku ni nodra veikacivi se dua tale na vuna. Mo tukuna vei ira na ituvatuva sa mai vakayacori.
Solia na gauna vei ira na lewenikalasi mera wasea na veika era sa sotava ena soqoni era tarava mai.

Na Ulutaga ena Matai ni Siga Tabu ena Soqoni ni Matabose

Na vakasama ni ulutaga ni soqoni ni matabose e rawa ni lako mai na soqoni ni mataveiliutaki, soqoni ni matabose ni tabanalevu, na ituvatuva ni iwasewase, na veivakauqeti vakayalo era a ciqoma na iliuliu ni ra veiqaravi vei ira na lewenilotu, kei na veivakauqeti ni Yalo Tabu. Na iulutaga eso e ra e vakatutu walega. E rawa ni ra kila na iliuliu eso tale na gagadre era vakauqeti me ra veitalanoataka.

Na cava eda rawa ni cakava meda qaravi ira kina era tiko voliti keda? (raica na Mosaia 23:18).
Eda na vakaliuca veitarataravi vakacava na noda ilesilesi?
Eda na wasea vakacava na kosipeli vei ira na noda itokani kei ira na kai noda? (raica na Alama 17
Eda na taqomaki keda vakacava kei na noda matavuvale mai na itukutuku raraba tawayaga kei na iyaloyalo vakasisila?
Na cava meda na cakava meda tubera ka vaqaqacotaki ira noda gone kei na itabagone ena noda tabanalevu?
Eda na vakaitavi vakalevu cake vakacava ena cakacaka ni tuva kawa kei na sokalou e valetabu?
Eda na sureta vakacava na veivuke ni Turaga ni da vakasaqara na noda isaunitaro vakosipeli ka vakasaqara meda kila vakatitobu na kosipeli?
Eda na vaqaqacotaka vakacava na noda ivakadinadina ni Turaga kei na Nona kosipeli ka vukea na noda vuvale me bula rawati koya vakayalo?